Lajme

Autostrada Shkup-Bllacë, 5 tunele dhe 12 ura, çmimi 200 milionë €, ja kush do ta ndërtoj?

Procedurat e stërzgjatura administrative për ndërtimin e aksit të mbetur prej 10.8 kilometrash të autostradës Shkup – Bllacë kanë marrë një epilog zyrtar me përzgjedhjen e kompanisë që do të kryejë punimet në terren, përcjell INA.

Pas përmbylljes me sukses të tenderit ndërkombëtar në bashkëpunim me Bankën Evropiane për Rindërtim dhe Zhvillim (BERZh), autoritetet kanë thyer praktikën e deritanishme të dhënies së megaprojekteve infrastrukturore për operatorët e huaj, duke ia besuar tërësisht projektin konsorciumit vendas të udhëhequr nga kompania vendore të ndërtimit “Granit”.

Sipas njoftimit zyrtar nga Zëvendësministrja e Transportit, Kaltrina Zekolli Shaqiri, pas takimit të përbashkët me Ministrin Aleksandar Nikoloski, drejtorin e BERZh-it, Fatih Turkmenogllu, dhe drejtorin e Ndërmarrjes Publike për Rrugë Shtetërore, Koce Trajanovski, nënshkrimi i marrëveshjes së përbashkët pritet të bëhet javën e ardhshme, menjëherë pas kompletimit të garancive bankare për kredinë dhe grantin e siguruar nga Bashkimi Evropian.

Ndërkaq, dalja e makinerive në terren dhe fillimi zyrtar i punimeve ndërtimore, përfshirë vendosjen e gurthemelit, është caktuar saktësisht për në fillim të muajit korrik të këtij viti.

Ky aks rrugor parashihet si një ndërmarrje mjaft e ndërlikuar dhe e rëndë inxhinierike për shkak të konfiguracionit të vështirë gjeografik, ku brenda këtyre kilometrave planifikohet ndërtimi i 5 tuneleve të reja, 12 urave dhe 2 galerive mbrojtëse, që kapin një total prej rreth 40 objektesh infrastrukturore.

Ministri i Transportit, Aleksandar Nikoloski, theksoi se plani dinamik parashikon që kontraktori t’i përfundojë të gjitha punimet brenda një afati prej 3.5 vitesh, duke siguruar kështu një lidhje të plotë dhe moderne autostradale që do të shërbejë si arterie kryesore tranziti për Kosovën dhe Malin e Zi.

Ky zhvillim ka ndezur menjëherë rrjetet sociale, ku krerët e koalicionit VLEN kanë shfrytëzuar momentin për të shpallur një “epokë të re” dhe për të goditur premtimet e dështuara të qeverisjes së kaluar.

Zëvendëskryeministri Izet Mexhiti reagoi në Facebook duke shkruar se ky është dallimi mes fjalëve dhe veprave, duke premtuar se çdo angazhim po kthehet në punë për një ekonomi më të fortë. Në të njëjtën linjë, kryetari i Tetovës, Bilall Kasami, pohoi se autostrada po bëhet realitet dhe se koha e demagogjisë shterpe ka mbaruar, duke shtuar se Shkupi dhe Prishtina sot janë më afër se kurrë.

Menjëherë ka pasur edhe një reagim të ashpër nga Bashkimi Demokratik për Integrim (BDI) në opozitë, të cilët akuzojnë pushtetin e ri se po lavdërohet med projektet e tyre. Sipas integristëve, ka qenë pikërisht qeveria e udhëhequr nga BDI ajo që e ka ideuar, disejnuar, projektuar dhe buxhetuar autostradën Shkup – Bllacë. Është skandaloze që kjo arterie kryesore dhe e rëndësishme është lënë pasdore për dekada, edhe pse Kosova ka qenë dhe është partneri kryesor i shkëmbimit tregtar me Maqedoninë e Veriut, por kjo arterie e shkurtër përpos lidhjes me Kosovën e lidh vendin me destinacione të rëndësishme si Shqipërinë dhe Malin e Zi. (INA)

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.