Lajme

Taravari: ASH mund të rikthehet në Qeveri vetëm mbi bazën e një Marrëveshje të re

Kryetari i Aleancës për Shqiptarët, Arben Taravari, ka deklaruar se rikthimi i mundshëm i partisë së tij në Qeveri mund të ndodhë vetëm nëse ka një marrëveshje të re politike, e cila do të përfshinte garanca për nisjen e negociatave me Bashkimin Evropian dhe për ndryshimet kushtetuese.

I pyetur në emisionin “Debat në Shenja” nëse ASH mund të rikthehet në ekzekutiv, Taravari tha se do të ishte nënçmuese të kthehej aty prej nga ka dalë, por nuk e përjashtoi plotësisht një skenar të tillë.

“Vetëm me një marrëveshje të re, në të cilën do të kishte së paku garanca për fillimin e negociatave me BE-në dhe ndryshimet kushtetuese, edhe mund të diskutohet. Në të kundërtën, nuk ka çfarë të diskutohet”, deklaroi Taravari.

Duke komentuar protestën e mbajtur në Gostivar, ku qytetarë të revoltuar kërkuan ujë të pijshëm dhe u dëmtuan edhe xhamat e objektit të komunës, Taravari tha se bëhet fjalë për tentativë për defokusim të opinionit publik, në një kohë kur, sipas tij, komuna është duke realizuar rreth 20 projekte paralelisht.

Ai shtoi se nuk mund të akuzojë drejtpërdrejt BDI-në për organizimin e protestës, por la të kuptohet se pas saj qëndrojnë persona të afërt me VLEN-in.

Taravari shkoi edhe më tej, duke pretenduar se në protestë kanë marrë pjesë edhe persona që, sipas tij, njihen në Gostivar si përdorues të narkotikëve.

Në intervistë, kreu i ASH-së sulmoi edhe koalicionin VLEN, për të cilin tha se “nuk pyetet për asgjë” në qeverisje dhe se nuk ka informata për zhvillimet politike.

“S’janë fare aty, nuk kanë informata se çfarë ndodh. Mund vetëm të sulmojnë”, tha Taravari, duke shtuar se VLEN-i nuk ka fuqi reale vendimmarrëse.

Ai foli edhe për raportet e brendshme në VLEN, duke thënë se sipas përshtypjes së tij, figurat kryesore në këtë subjekt janë Izet Mexhiti dhe Adnan Azizi, ndërsa Bilall Kasami është më shumë i fokusuar në drejtimin e Komunës së Tetovës.

Sipas Taravarit, përplasja e ardhshme politike brenda VLEN-it mund të ndodhë mes grupacionit të Besës dhe atij të LD-së, ndërsa Alternativa, siç u shpreh ai, praktikisht është shkrirë.

Në fund, ai komentoi edhe rolin e Bekim Qokut, për të cilin tha se është përfaqësues i Vetëvendosjes dhe i Albin Kurtit në Maqedoninë e Veriut, duke shtuar se VLEN-i e përdor atë si figurë të ekspozuar politike.

Lajme

Petar Bogojeskit i “dhemb” propozimi i Shasivarit: Për 10 vjet, i gjithë gjyqësori do të flasë shqip!

Nacionalisti Petar Bogojeski ka reaguar ashpër ndaj përdorimit të gjuhës shqipe në sistemin gjyqësor, pas propozimit të ministrit të Drejtësisë, Jeton Shasivari, për zhvillimin e Provimit të Jurisprudencës edhe në gjuhën shqipe.

Në një status në gjuhën maqedonase, Bogojeski pretendon se brenda dhjetë vjetësh gjykatësit shqiptarë do të gjykojnë qytetarë maqedonas përmes përkthyesve, pasi, sipas tij, nuk do ta njohin gjuhën maqedonase.

“Për një kohë të shkurtër (10 vjet), do të kemi një gjykatës shqiptar etnik që do të gjykojë dy maqedonas etnikë me përkthyes, sepse nuk do ta dijë gjuhën maqedonase. Ose një prokuror…”, shkruan Bogojeski.

Ai e cilëson këtë skenar si të paqëndrueshëm dhe pretendon se përdorimi i gjuhës shqipe në sistemin gjyqësor mund ta çojë Maqedoninë e Veriut drejt kantonizimit ose federalizimit.

Bogojeski shkon edhe më tej, duke paralajmëruar se, sipas tij, ndarja mbi baza etnike mund të përhapet edhe në arsim, shëndetësi dhe administratë.

Në reagimin e tij, ai kundërshton përdorimin e shqipes si gjuhë institucionale paralele dhe kërkon që shqiptarët në Maqedoninë e Veriut ta mësojnë gjuhën maqedonase.

“Shqiptarët duhet ta kuptojnë se në Maqedoni duhet ta mësojnë dhe ta dinë gjuhën maqedonase. Shqipja është e tyre, e padiskutueshme, por nuk mund të jetë gjuhë paralele sistemore”, shkruan ai.

Në fund, Bogojeski ironizon edhe mundësinë që institucionet të përdorin përkthyes për gjuhët e vendit, ndërsa statusin e përmbyll me shprehjen “Maqedoni e mjerë”.

Lajme

NPK “SHARRI”: Uji në Tetovë i sigurtë për pije

NPK „SHARRI“ – Tetovë informon se, sipas analizave laboratorike dhe monitorimit të rregullt nga IPSH – Qendra e Shëndetit Publik Tetovë, rezultatet e dokumentuara konfirmojnë se mostrat e analizuara të ujit i plotësojnë kriteret e përcaktuara për ujë të pijshëm.

Për transparencë të plotë, NPK Sharri ka bashkangjitur edhe dokumentet laboratorike dhe njoftimin zyrtar të Qendrës së Shëndetit Publik Tetovë.

Në postimin në Facebook të NPK Sharri që e ka shpërndarë edhe Komuna e Tetovës shtrohet pyetja: Pse mund të ndihet një erë karakteristike në ujë?

Sipas tyre, Gjatë stinës së vjeshtës, veçanërisht pas reshjeve të shiut dhe rënies së gjetheve në rajonin e Malit Sharr, në ujë mund të shfaqet përkohësisht një erë karakteristike e bimësisë.

Kjo dukuri mund të lidhet me lëndët organike që çlirohen gjatë shpërbërjes së gjetheve dhe materialeve të tjera bimore, të cilat arrijnë në burimet ujore.

Por, a është uji i sigurt për pije? – shtrohet pyetja tjetër.

Prania e një ere të tillë nuk nënkupton domosdoshmërisht përkeqësim të cilësisë së ujit. Siguria e tij përcaktohet përmes analizave laboratorike dhe jo vetëm në bazë të erës apo shijes.

Sipas rezultateve të bashkëngjitura të kontrollit, uji i analizuar i plotëson kushtet për pije.

NPK „SHARRI“ – Tetovë u bën thirrje qytetarëve që nëse vërejnë ndryshime të theksuara të erës, shijes apo pamjes së ujit, që ta informojnë këtë ndërmarrje duke treguar rrugën ose lagjen ku është vërejtur dukuria.

Lajme

Morën kredi prej 12 milionë denarë në emër të disa personave, kallëzim penal ndaj dy kumanovareve dhe pesë punonjësve bankarë

SPB Kumanovë ka paraqitur kallëzim penal ndaj A.S.D. (23) dhe M.V. (35), të dyja nga Kumanova, mbi dyshime të bazuara për kryerjen e veprave penale “mashtrim” dhe “keqpërdorim i të dhënave personale”, si dhe ndaj M.P. (34), S.M. (27), N.N. (34), D.M. (48) dhe S.O. (36), mbi dyshime të bazuara për kryerjen e veprës penale “keqpërdorim i detyrës dhe autorizimit zyrtar”.

“E kallëzuara e parë, gjatë periudhës nga janari deri në korrik të vitit 2026, në 18 raste, duke shfrytëzuar të dhënat personale të disa personave, në emër të tyre dhe pa pëlqimin e tyre, ka aplikuar për kredi të shpejta konsumatore, ndërsa pas miratimit dhe pagesës së mjeteve financiare, ato janë përvetësuar në mënyrë të kundërligjshme nga e të kallëzuarës së parë dhe të dytë.
“Ndërkaq, të kallëzuarit e tjerë, të punësuar si nëpunës bankarë në një filial të një banke, kanë mundësuar realizimin e mashtrimit dhe dispozicionin e mjeteve financiare, duke i mundësuar kështu të kallëzuarës së parë dhe të dytë të përfitojnë kundërligjshëm pasuri në vlerë të përgjithshme prej 12.221.500 denarë”, thonë nga MPB.