Lajme

Tetovës i shtohet një magjistër i shkencave islame

Hoxhë Ali Ashani nga Tetova mbron me sukses magjistraturën në Fikh në Universitetin ez-Zejtuna të Tunisit

Sot, më 25 qershor 2026, hoxhë Ali Ashani nga Tetova e mbrojti me sukses disertacionin e magjistraturës në fushën e Fikhut në Universitetin ez-Zejtuna të Tunisit, duke u vlerësuar me notën maksimale.

Universiteti ez-Zejtuna njihet si një nga institucionet më të vjetra dhe më prestigjioze të dijes islame në botë. Për shekuj me radhë, ai ka luajtur një rol të rëndësishëm në formësimin e mendimit dhe ndërgjegjes islame, veçanërisht në Maghribin islam dhe më gjerë. Në auditorët e tij kanë studiuar dhe ligjëruar figura të shquara si Ibn Arafe, Ibn Halduni, Ibn Ashuri dhe shumë dijetarë të tjerë, të cilët kanë lënë gjurmë të pashlyeshme në trashëgiminë intelektuale islame.
Tema e disertacionit të hoxhë Ali Ashanit ishte: “Fetvatë dhe inteligjenca artificiale – Problematika juridike dhe kriteret e përdorimit”, një trajtesë bashkëkohore që shqyrton sfidat juridike islame që sjell zhvillimi i shpejtë i inteligjencës artificiale.
Pas mbrojtjes, ai u shpreh se rrugëtimi i tij akademik kishte nisur “midis shtyllave të Haremit të Medines” dhe tashmë vazhdon “nën hijen e ullirit të Tunisit”, duke shprehur shpresën që Allahu t’i mundësojë vijimin e studimeve edhe në nivel doktorature.

Ky sukses përbën një arritje të rëndësishme jo vetëm për hoxhë Ali Ashanin dhe familjen e tij, por edhe për Tetovën dhe komunitetin shqiptar në përgjithësi, të cilit i shtohet edhe një magjistër i shkencave islame me përgatitje të lartë akademike.

Lajme

Kasami për protestën: BDI “hedh gurin dhe fsheh dorën”

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në “TV Koha” duke komentuar protestën e së nesërmes në Tetovë thotë se BDI në një farë forme luan rolin e saj në stilin “hedh gurin dhe fsheh dorën”!

Sipas tij, bëhet fjalë për situatë absurd.

“BDI nuk deklarohen se qëndrojnë zyrtarisht pas protestës. Këshilltarët e BDI-së para një kohe kërkuan seancë të jashtëzakonshme të Këshillit komunal dhe kur morën informatë se kjo nuk është çështje e Këshillit komunal dhe në situatë kur Këshilli komunal mund të përsërisë gabimin që është bërë në 2007, me automatizëm Këshilli komunal shkon në zgjedhje në bazë të Ligjit dhe Kushtetutës dhe e heshtën atë çështje. Duke e ditur që faji më shumë është i atyre, sepse nuk kemi ne aspak faj si VLEN as në pushtetit qendror e as në atë lokal, ata po mundohen edhe një herë të ‘hedhin gurin dhe të fshehin dorën’. Konkretisht ata duhet të tregojnë se cili është faji i kësaj qeverise aktuale të komunës dhe kësaj qeverie aktuale në pushtetin qendror”, ka thënë Kasami.

Lajme

Kasami: Vendimi i Gjykatës Kushtetuese nuk do të ndryshojë asgjë

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha ka thënë se vendimi i Gjykatës Kushtetuese për emrat e rrugëve në Tetovë, nuk do të ndryshojë asgjë.

I pyetur se çfarë do të ndodhë me fatin e rrugës “Dervish Cara”, Sheshin “Iliria” dhe cili do të jetë epilogu, Kasami shprehet i prerë:

“Vendimi i Gjykatës Kushtetuese nuk do të ndryshojë asgjë. Komuna do të vazhdojë të përdorë emërtimet e vitit 2007 e këndej, institucionet do të vazhdojnë të përdorin emërtimet si gjithmonë, ndërkohë Komuna e Tetovës do të vazhdojë me procesin e emërtimit të rrugëve. Ky proces do të përfundojë konform Ligjit dhe Kushtetutës dhe nga ai moment edhe këta rrugë dhe shumë rrugë tjera do të kenë emërtime shqiptare”, ka thënë mes tjerash Kasami.

Lajme

Kasami: BDI dhe Gjykata Kushtetuese të sinkronizuar dakorduan vendimin

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha duke komentuar protestën e nesërme tha se qytetarët nuk do t`i përgjigjen pozitivisht protestës së BDI-së, duke pranuar se integristët megjithatë kishin harxhuar kohën e tij, siç tha ai, “për të trajtuar një problem inekzistent”.

Ai tha se le të tregojnë se cila është përgjegjësia e Tetovës, cila është përgjegjësia e kësaj qeverie që ne siç tha, “të dalim e t`u përgjigjemi”.

“E vetmja përgjegjësi këtu është e Gjykatës Kushtetuese dhe e BDI-së që në mënyrë të sinkronizuar dakordojnë një vendim për abrogim të këtij vendimi në momentin kur jemi në fazën finale të emërtimit të rrugëve konform Kushtetutës dhe Ligjit. Dhe një herë duhet të pyes publikisht BDI-në ‘A është edhe një tentim i BDI-së, për të ndalur procesin e emërtimit të rrugëve në Tetovë?”, ka thënë Kasami.