Sport

Fillojnë ‘ethet’ në Kupën e Botës, përfundon faza e grupeve

Faza e grupeve në Kupën e Botës 2026 ka përfunduar zyrtarisht, duke sjellë edhe çiftet që do të përballen në raundin e 1/16 së finales. Kombëtaret më të mira të turneut kanë siguruar kalimin tutje, ndërsa tani nis faza eliminatore, ku çdo gabim mund të kushtojë me eliminim.

Në mesin e dueleve më të spikatura bie në sy përballja mes Gjermanisë dhe Paraguait, ndërsa Brazili do të sfidojë Japoninë. Kampionia në fuqi, Argjentina, do të përballet me Kepin e Gjelbër, teksa Anglia do të ketë përballë Republikën Demokratike të Kongos.

Një tjetër duel interesant pritet të jetë ai mes Portugalisë dhe Kroacisë, ndërsa Spanja do të masë forcat me Austrinë. Holanda do të përballet me Marokun, kurse Franca do të luajë ndaj Suedisë.

Kanadaja do të sfidojë Afrikën e Jugut, SHBA-ja do të ketë përballë Bosnje dhe Hercegovinën, ndërsa Belgjika do të luajë ndaj Senegalit.

Në anën tjetër të tabelës, Bregu i Fildishtë do të përballet me Norvegjinë, Meksika me Ekuadorin, Zvicra me Algjerinë, ndërsa Kolumbia do të sfidojë Ganën.

Përballjet e plota të 1/16 së finales:

Gjermania – Paraguai
Franca – Suedia
Afrika e Jugut – Kanadaja
Holanda – Maroku
Portugalia – Kroacia
Spanja – Austria
SHBA – Bosnja dhe Hercegovina
Belgjika – Senegali
Brazili – Japonia
Bregu i Fildishtë – Norvegjia
Meksika – Ekuadori
Anglia – Republika Demokratike e Kongos
Argjentina – Kepi i Gjelbër
Australia – Egjipti
Zvicra – Algjeria
Kolumbia – Gana

Nga tani e tutje nuk ka më hapësirë për gabime, pasi çdo ndeshje është me sistem eliminimi direkt dhe vetëm 16 kombëtare do të vazhdojnë rrugëtimin drejt ëndrrës për të ngritur trofeun e Kupës së Botës 2026.

Lajme

Pëson lëndim të rëndë, Shkëndija mbetet pa Drilon Islamin

Ndeshja përballë Shkëndijës së Haraçinës ka rezultuar fatale për mesfushorin e Shkëndijës së Tetovës, Drilon Islami, i cili pësoi një lëndim të rëndë pas një përplasjeje në fushë.

Nga skuadra tetovare sot përmes një komunikate kanë bërë të ditur se mesfushori i tyre ka thyer klavikulën e krahut të djathtë, ku kosovari u detyrua ta braktisë lojën dhe u transportua me ambulancë në spital në duelin e zhvilluar në Çair.

Shkëndija bënë të ditur se për momentin, ekipi mjekësor ende nuk ka vendosur nëse trajtimi do të kërkojë ndërhyrje kirurgjikale apo nëse rehabilitimi do të realizohet përmes terapisë.

Megjithatë, ajo që është e sigurt është se Islamin e pret një periudhë më e gjatë jashtë terreneve sportive, duke qenë një mungesë e rëndësishme për skuadrën tetovare./Sportmania/

Lajme

Mbrëmja e “Duelit Sportiv” përfundon me incident në mes të Liridon Lecit dhe Edonisa Aliut

Televizioni Dukagjini ka njoftuar ndërprerjen e menjëhershme të bashkëpunimit me panelistin Liridon Leci, pas një incidenti që ka ndodhur të dielën mbrëma, pas përfundimit të emisionit “Dueli Sportiv”.

Sipas reagimit të televizionit, incidenti ka ndodhur mes Lecit dhe mysafires së emisionit, ish-futbollistes Edonisa Aliu.

Drejtori i Informacionit në TV Dukagjini, Dibran Istrefi, ka bërë të ditur përmes një njoftimi në rrjetin social Facebook, se vendimi është marrë pas shqyrtimit të rrethanave të rastit.

Televizioni ka theksuar se situata të tilla janë të papranueshme, ndërsa ka bërë të ditur se me rastin po merren organet e rendit dhe të drejtësisë.

TV Dukagjini ka shprehur gatishmërinë për bashkëpunim të plotë me organet përkatëse, të cilat pritet të sqarojnë rrethanat e incidentit.

Lajme

“Ballistët” formojnë strukturën e re organizative!

Tifogrupi i Shkëndijës ka formuar sonte strukturën e re organizative, pas mbledhjes së mbajtur më 4 tetor. Kryesia e ngushtë do të përbëhet nga 6 anëtarë, ndërsa për kryetar është zgjedhur Shaban Zeneli.

Kryesia e re do të ketë përkrahjen edhe të një grupi punues, i cili do të funksionojë si strukturë më e gjerë në mbështetje të kryesisë dhe tifogrupit.

Organizimi i parë i këtij kapitulli të ri do të jetë të dielën, më 11 tetor, në udhëtimin për ndeshjen Shkëndija e Haraçinës – Shkëndija, që do të zhvillohet në stadiumin e Çairit.