Lajme

Memishi dhe Lika marrin pjesë në manifestimin jubilar për dëshmorët Bedri Alimi dhe Rametulla Ameti në Neproshten

Kryetari i komunës së Tearcës, Daut Memishi, së bashku me ish-komandantin e UÇK-së, Hazbi Lika, morën pjesë në manifestimin jubilar të organizuar në Neproshten, në nderim të 25-vjetorit të rënies heroike të dëshmorëve Bedri Alimi dhe Rametulla Ameti.

Manifestimi u zhvillua në Parkun e Dëshmorëve, ku morën pjesë familjarë të dëshmorëve, ish-bashkëluftëtarë, përfaqësues institucionalë dhe qytetarë të shumtë.

Gjatë ceremonisë u bënë homazhe dhe u vlerësua sakrifica e dëshmorëve për lirinë, ndërsa të pranishmit theksuan rëndësinë e ruajtjes së kujtesës historike dhe nderimit të atyre që dhanë jetën për idealin kombëtar.

Lajme

VLEN: Ndalimi pa shpjegim i tre zyrtarëve tanë kërkon përgjigje zyrtare!

Sot, në pikën kufitare Qafë Thanë, koordinatori i Grupit Parlamentar të VLEN-it, Bekim Qoku, deputeti Adnan Azizi dhe zëvendëssekretari i përgjithshëm i Qeverisë, Hasim Murtezani, janë ndaluar për rreth një orë pa asnjë shpjegim zyrtar, ndonëse të tre ishin të pajisur me pasaporta diplomatike.

Sipas informacioneve të komunikuara jozyrtarisht nga policia kufitare, ndaj tyre paska një ndalesë hyrjeje. Megjithatë, asnjë vendim, dokument apo arsyetim nuk u është bërë i ditur.

VLEN kërkon nga autoritetet e Republikës së Shqipërisë të informojnë opinionin publik nëse ekziston vërtet një masë e tillë. Nëse po, kush e ka marrë këtë vendim, mbi çfarë baze ligjore është mbështetur dhe cilat janë arsyet konkrete për një veprim të tillë ndaj zyrtarëve të zgjedhur dhe përfaqësuesve institucionalë.

Marrëdhëniet ndërshqiptare duhet të ndërtohen mbi transparencë, respekt institucional dhe komunikim të qartë, jo mbi ndalesa të pashpjeguara dhe procedura që lënë vend për dyshime.

Lajme

Ministri Hoxha në terren në Hasanbeg: Në vijim e sipër realizimi i një projekti të rëndësishëm për rregullimin e kanalit

Ministri i Mjedisit Jetësor dhe Planifikimit Hapësinor, Muamet Hoxha, së bashku me kryetarin e Komunës së Gazi Babës, Boban Stefkovski, sot inspektuan punimet ndërtimore për rregullimin e kanalit kullues në lagjen Hasanbeg të Shkupit.

Ministria investon 21 milionë denarë në këtë projekt, ndërsa aktivitetet ndërtimore në terren tashmë janë në fazë të avancuar me betonimin e shtratit me qëllim mbrojtjen e përhershme nga përmbytjet. Ky kanal është pjesë kyçe e sistemit hidromeliorativ për kullimin e “Fushës së Shkupit” dhe pranimin e ujërave atmosferikë.

‘Ministria e Mjedisit Jetësor dhe Planifikimit Hapësinor po zbaton një ofensivë infrastrukturore në mbarë vendin. Në këtë mënyrë, po vendosim themelet për një kthesë të vërtetë të gjelbër’, deklaroi ministri Hoxha, duke shtuar se në vijim e sipër është edhe përgatitja e katër projekteve të tjera të rëndësishme me të cilat po modernizohet infrastruktura komunale e komunës së Gazi Babës.

Ministria e Mjedisit Jetësor dhe Planifikimit Hapësinor mbetet e përkushtuar në zgjidhjen sistemike të problemeve dekadore të qytetarëve dhe në ngritjen e cilësisë së jetesës në çdo vendbanim.

Lajme

DSMacedonia me 21 medalje në Romë, e argjendtë vajza e Besart Ibraimit, Erina!

Digital School Macedonia ngriti edhe një herë flamurin lart në arenën ndërkombëtare të teknologjisë dhe inovacionit, duke fituar në total 21 medalje.

Në Grand Final të garave ndërkombëtare në Romë, Itali, nxënësit e Digital School Macedonia shkëlqyen mes pjesëmarrësve nga vende të ndryshme të botës, duke dëshmuar se talenti, përkushtimi dhe puna e palodhur nuk njohin kufij.

Në mesin e medalistëve është edhe Erina Ibraimi, vajza e futbollistit të njohur të Maqedonisë së Veriut, aktualisht anëtar i Shkëndijës së Tetovës, Besart Ibraimi.

“Këto medalje janë shumë më tepër se çmime, ato janë dëshmi e talentit, disiplinës, kreativitetit dhe punës së pandalur të nxënësve tanë, si dhe e përkushtimit të instruktorëve që i udhëhoqën drejt këtij suksesi. Nga Maqedonia e Veriut në skenën botërore, nxënësit tanë treguan se e ardhmja e teknologjisë ndërtohet nga të rinjtë që guxojnë të ëndërrojnë dhe të krijojnë. Urime të gjithë fituesve! Jemi jashtëzakonisht krenarë për secilin prej jush. Ky është vetëm fillimi i shumë sukseseve të tjera që na presin!”, thuhet në njoftimin e DsMacedonia.

Ja të gjithë fituesit e medaljeve:

🥇 Amar Demiri

🏆 1st Place Gold Medal – AI Prompt

🥇 Gold Medal – Codementum

🥉 Bronze Medal – CodeCombat

🎖 Honorable Mention – Science

🥇 Jon Abdullahi

🏆 1st Place Gold Medal – AI Prompt

🥇 Gold Medal – Codementum

🥉 Bronze Medal – Science

🥇 Eugen Papraniku

🥇 Gold Medal – 3rd Place Codementum