Lajme

Arrestohen dy gra nga Kumanova, morën kredi të shpejta në emër të 19 personave

Mashtruan 19 persona dhe morën kredi të shpejta në emër të tyre në vlerë mbi 10,8 milionë denarë, arrestohen dy gra nga Kumanova.

Zyrtarët policorë të SPB Kumanovë kanë arrestuar sot 22-vjeçaren A.S.D. dhe 34-vjeçaren M.V., të dyja nga Kumanova, nën dyshimin se, duke keqpërdorur të dhënat personale, kanë marrë kredi të shpejta konsumatore në emër të 19 personave dhe kanë përfituar në mënyrë të kundërligjshme 10.820.000 denarë.

Nga Ministria e Punëve të Brendshme njoftuan se ndaj A.S.D. është ngritur kallëzim penal për veprat penale “mashtrim” dhe “keqpërdorim i të dhënave personale”, ndërsa ndaj M.V. është ngritur kallëzim penal për “ndihmë”.

Sipas hetimeve, e dyshuara e parë, gjatë periudhës nga janari deri në korrik të këtij viti, duke vepruar sipas një plani të përgatitur paraprakisht dhe me qëllim që të përfitonte pasuri të kundërligjshme për vete dhe për të dyshuarën e dytë, në 19 raste i kishte mashtruar personat e dëmtuar.

Pa pëlqimin dhe autorizimin e tyre, ajo kishte përdorur të dhënat e tyre personale për të aplikuar për kredi të shpejta konsumatore. Pas miratimit dhe disbursimit të mjeteve, paratë përvetësoheshin në mënyrë të kundërligjshme nga të dyja të dyshuarat.

Sipas MPB-së, e dyshuara e dytë kishte vepruar në bazë të një marrëveshjeje paraprake dhe e kishte ndihmuar të dyshuarën e parë në realizimin e mashtrimit, duke ndërmarrë veprime që kishin mundësuar kryerjen me sukses të veprave penale.

Lajme

E dhimbshme, tifoz i Fenerbahçes ndërron jetë gjatë ndeshjes

Një tifoz i Fenerbahçes, Yaşar Gerçek, ka ndërruar jetë gjatë ndeshjes pas një sulmi në zemër.

Klubi e ka konfirmuar lajmin me dhimbje, duke shprehur ngushëllime për familjen, të afërmit dhe gjithë komunitetin e Fenerbahçes.

Në të njëjtën ndeshje, Fenerbahçe u mposht në shtëpi nga Beşiktaşi me rezultat 2-1.

Lajme

Skandal në Tetovë! I akuzuari pengoi mjekët teksa po shpëtonin të lënduarin

Tetovë – Incident gjatë një ndërhyrjeje të Ndihmës së Shpejtë në Tetovë. Një 40-vjeçar nga qyteti është shoqëruar në polici pasi dyshohet se ka penguar ekipin mjekësor teksa po i jepte ndihmë një këmbësori të lënduar në një aksident trafiku.

Ngjarja ka ndodhur më 5 shtator, rreth orës 19:10, në rrugën “Ilinden” në Tetovë.

Sipas denoncimit të bërë në SPB Tetovë nga një punonjës i Shërbimit të Ndihmës së Shpejtë, gjatë ofrimit të ndihmës mjekësore, R.U. (40) nga Tetova dyshohet se ka prishur rendin dhe qetësinë publike me bërtitje, ngritje zëri dhe sjellje të papërshtatshme ndaj ekipit mjekësor.

Policia e ka shoqëruar personin në stacion dhe ndaj tij është përgatitur parashtresa përkatëse.

Lajme

163 km/h në rrugë ku lejoheshin 80!

Rumuni “fluturon” nëpër Maqedoni, kapet në Tabanoc

Shpejtësi marramendëse në autostradën A1! Një shtetas rumun është ndaluar nga policia pasi është kapur duke drejtuar automjetin me 163 kilometra në orë, në një pjesë të rrugës ku shpejtësia maksimale e lejuar ishte vetëm 80 km/h.

Ngjarja ka ndodhur më 4 shtator 2026, rreth orës 06:30, në autostradën A1, pranë Demir Kapisë.

Sipas policisë, 49-vjeçari H.V.S. nga Rumania po drejtonte një automjet tip Audi, me targa rumune, kur sistemi i mbikëqyrjes “Qyteti i Sigurt” regjistroi shkeljen.

Ai u identifikua si person që dyshohet se ka kryer veprën penale “drejtim i pamatur i automjetit”, sipas nenit 297-a të Kodit Penal.

Rreth orës 11:20, kur automjeti po dilte nga vendi përmes pikës kufitare Tabanoc, policia e ndaloi dhe e arrestoi shtetasin rumun.

Ai u dërgua në Stacionin Policor të Negotinës për procedurë të mëtejshme, ndërsa ndaj tij pritet të ngrihet kallëzim penal përkatës.

Nga 80 në 163 km/h – më shumë se dyfishi i shpejtësisë së lejuar!