Shpallja e vendimit të Hagës për denimin e ish krerëve të UÇK-së dhe deklarata e ministrit të Drejtësisë të RMV-së Jeton Shasivarit disa ditë para vendimit, vazhdojnë të jenë kryetemë në vendin tonë. Këtë herë ky diskutim u zhvillua në Kuvend, në seancën për pyetje deputetësh. Deputetja e Frontit Evropian Rina Ajdari i tha ministrit Shasivari se në statusin e tij, ai e ka barazuar viktimën me agresorin. Ndërsa edhe pas shpalljes së vendimit, në deklaratën e dhënë një ditë më parë tha se ministri fshihet pas akrobacioneve juridike dhe procedurale.
Rina Ajdari, deputete e Frontit Evropian
“Sërisht asnjë fjalë të vetme me gojën plot për të thënë atë që çdo shqiptar dhe çdo njeri dashamirës i të drejtës por edhe njohës i historisë e di se lufta e shqiptarëve në Kosovë ka qenë e pastër e drejtë dhe se krerët e saj nuk kanë kryer krime. Në vend që të shprehni një qëndrim të qartë dhe kombëtarë, zgjodhët përsëri fshehjen pas akrobacioneve juridike dhe procedurale”. /SHENJA/

Rritja e pensioneve të shtatorit do të jetë 3 për qind, konfirmoi drejtori i Fondit për Sigurim Pensional dhe Invalidor, Nikolla Memov. Rritja e pensioneve këtë herë do të bëhet sipas zgjidhjes ligjore dhe nuk do të ketë rritje lineare, siç kërkonin një pjesë e pensionistëve.

Nëse një pensionist merr pensioni prej 20,000 denarësh, i njëjti do të ketë rritje të pensionit për 600 denarë.
Shumat e reja pritet të zbatohen gjatë pagesës së pensioneve muajin e ardhshëm. Vlera e rritjes do të përcaktohet duke aplikuar përqindjen e paraparë mbi shumën aktuale të pensionit. Në Fond tashmë po bëhen përllogaritjet për shumat e reja, me qëllim që pagesa të përgatitet në kohë.

Detajet për shumën që do të marrin pensionistët pas rritjes do të varen nga lartësia e pensionit të tyre aktual.
Gjatë dy viteve të fundit, pensionet u rritën në mënyrë lineare në katër raste, për një shumë totale prej 7 mijë denarësh. Vitin e kaluar, Gjykata Kushtetuese nisi procedurë për vlerësimin e kësaj çështjeje, por në mars 2026 e ndërpreu atë, pasi nuk pati shumicë për marrjen e një vendimi.

Presidenti amerikan Donald Trump shprehu vlerësime të larta për Presidentin Recep Tayyip Erdoğan gjatë një takimi me liderë të Lindjes së Mesme, duke e cilësuar presidentin turk si një njeri “të fortë” dhe duke paralajmëruar se ai nuk është dikush me të cilin “mund të luash”.

Duke folur në takimin shumëpalësh të Këshillit të Bashkëpunimit të Gjirit (GCC) me Kryeministrin irakian, Presidentin Erdoğan, Mbretin Abdullah II të Jordanisë, Emirin e Katarit dhe Presidentin sirian Ahmed al-Sharaa, Trump veçoi Erdoğanin gjatë fjalimit të tij në këtë takim, i cili mblodhi së bashku liderë nga Turqia dhe disa vende arabe, përfshirë Sirinë, Katarin, Jordaninë, Libanin dhe Egjiptin.

“Përfshirë mikun tim këtu, nga Turqia. Ai është një njeri i fortë. Nuk mund të luash me të,” tha Trump, duke iu referuar Erdoğanit.

Më pas, Trump bëri shaka nëse fjalët e tij do të përktheheshin saktë, para se të vazhdonte me vlerësimet për presidentin turk.

“Shpresoj se do ta përkthejnë saktë këtë. Shpresoj se kemi një përkthyes të mirë, por ai është fantastik. Është një njeri fantastik,” tha Trump, duke u kthyer nga Erdoğani dhe duke e quajtur atë “miku im”.

Takimi u zhvillua në një kohë përpjekjesh intensive diplomatike për të adresuar tensionet dhe konfliktet në rritje në të gjithë Lindjen e Mesme, veçanërisht zhvillimet në rajonin e Gjirit.