Ministri i Ekonomisë dhe Punës, Besar Durmishi, sot mori pjesë në forumin “NextGen CareerUp” i cili u mbajt në Tetovë i organizuar nga Instituti për Lidership dhe Politika Publike (ILPP), me mbështetjen e Mbretërisë së Holandës.

Në kuadër të forumit, ministri Durmishi ishte pjesë e panel diskutimit “Tejkalimi i hendekut: nga arsimi në punësim”, kushtuar sfidave me të cilat përballen të rinjtë kur hyjnë në tregun e punës, nevojës për aftësi praktike dhe bashkëpunimit më të mirë ndërmjet institucioneve arsimore, kompanive dhe institucioneve shtetërore.

Në fjalën e tij, ministri theksoi se krijimi i mundësive cilësore për të rinjtë është një nga prioritetet e Ministrisë së Ekonomisë dhe Punës, ku vëmendje e veçantë i kushtohet masave aktive të punësimit, praktikës, sipërmarrësisë dhe zhvillimit të shkathtësive që korrespondojnë me nevojat reale të ekonomisë.

“Detyra jonë është të ndihmojmë çdo të ri të bëjë hapin më të rëndësishëm – nga arsimi në përvojën e parë të punës. Diploma është bazë e rëndësishme, por të rinjtë kanë nevojë edhe për njohuri praktike, mentorim dhe mundësi për të treguar potencialin e tyre. Qëllimi ynë është të krijojmë kushte në të cilat punësimi i parë nuk do të jetë pengesë, por fillimi i një zhvillimi të suksesshëm profesional”, theksoi ministri Durmishi.

Ai theksoi se Plani Operativ për Punësimin për vitin 2026 parashikon mbështetje për mbi 10.000 qytetarë, me theks të veçantë te të rinjtë e papunë deri në moshën 29 vjeç. Plani përfshin disa masa aktive, ndër të cilat grante për vetëpunësim, punësim të subvencionuar, trajnime për profesione deficitare dhe praktika, përmes të cilave parashikohet të përfshihen 1.150 të rinj.

“Nuk ka zgjidhje të vetme që u konvenon të gjithë të rinjve. Dikush ka nevojë për trajnim shtesë, dikush tjetër për përvojë të parë praktike dhe dikush tjetër për mbështetje për të filluar biznesin vetanak. Prandaj, politikat tona synojnë krijimin e mundësive të ndryshme, me një qëllim të përbashkët – që të rinjtë të kenë një perspektivë reale për punë, përparim dhe një të ardhme të sigurt në vendin e tyre”, tha Durmishi.

Theks i veçantë në diskutim iu kushtua nevojës për lidhje më të madhe midis arsimit të lartë dhe sektorit privat, si dhe rëndësisë së praktikës dhe mentorimit në përgatitjen e të rinjve për mjedisin e punës.

Ministri theksoi se praktika është e rregulluar me ligj dhe se thelbi i saj nuk është vetëm fitimi i përvojës së punës, por edhe sigurimi i një procesi mësimor cilësor, me detyra të përcaktuara qartë, kompensim adekuat dhe mbështetje mentoruese.

“Të rinjtë nuk kanë nevojë vetëm për mundësinë për të hyrë në një kompani, por edhe për mundësinë për të mësuar diçka atje, për të fituar vetëbesim dhe për të zhvilluar kompetenca profesionale. Prandaj, mentorimin duhet ta shohim si investim në stafin e ardhshëm. Në të njëjtën kohë, kompanitë duhet t’i njohin të rinjtë si potencial që duhet të zhvillohet, e jo si fuqi punëtore nga e cila pritet menjëherë përvojë e plotë”, theksoi ministri.

Duke folur për nevojat e tregut të punës, Durmishi theksoi se programet arsimore dhe masat aktive të punësimit duhet të përshtaten vazhdimisht me ndryshimet teknologjike, digjitalizimin dhe nevojat e kompanive.

Në këtë drejtim, ai theksoi rëndësinë e qasjes rajonale, veçanërisht në Rajonin e Pollogut, ku ekziston potenciali për bashkëpunim më intensiv midis universiteteve, kompanive lokale, Agjencisë së Punësimit dhe institucioneve që sigurojnë mbështetje për inovacione dhe sipërmarrësi.

“Dua që forume të tilla të mos përfundojnë vetëm me diskutime, por të rezultojnë me aktivitete konkrete. Propozimi im është të fillojmë me një iniciativë të përbashkët në Rajonin e Pollogut, përmes së cilës do të lidhim të rinjtë, universitetet, kompanitë dhe institucionet. Me qëllime të qarta dhe rezultate të matshme, mund të krijojmë model që do të zbatohet më tej edhe në rajone të tjera”, theksoi Durmishi.

Ministri theksoi se suksesi i politikave ekonomike nuk matet vetëm me numrin e personave të përfshirë në masat aktive, por mbi të gjitha me numrin e të rinjve që kanë arritur të punësohen, të përparojnë profesionalisht ose të fillojnë biznes vetanak.

Paneli i diskutimit përfshiu perspektivat e politikave ekonomike, arsimit të lartë dhe mbështetjes për inovacioneve, me pjesëmarrjen e përfaqësuesve të INOVA-s, Universitetit “Nënë Tereza” dhe Universitetit të Tetovës. Forumi “NextGen CareerUp” ka për qëllim të nxisë bashkëpunim konkret institucional dhe të kontribuojë në krijimin e mundësive më të mira për arsim, përvojë praktike, punësim dhe zhvillim profesional të të rinjve në Maqedoninë e Veriut.

Nën ndikimin e masës ajrore të lagësht dhe të paqëndrueshme, nesër veçanërish pasdite dhe gjatë natës do të ketë reshje të përkohshme të shiut. Lokalisht, reshjet do të jenë të rrëmbyeshme të shoqëruara me bubullima. Në disa lugina do të ketë kushte për mjegull gjatë mëngjesit, informon DPHM.

Të premten në mëngjes priten reshje lokale të shiut, ndërsa gjatë ditës është paralajmëruar erë mesatare deri e përforcuar nga drejtimi verior.

Sipas sinoptikëve, të shtunën do të ketë mot stabil, ndërsa nga e diela dhe në ditët në vijim do të mbizotërojë mot me vranësira të ndryshueshme dhe më i freskët me reshje lokale të shiut.

Gjykata Themelore në Prishtinë e ka shpallur fajtor Millorad Gjokoviqin për krime lufte kundër popullsisë civile dhe e ka dënuar me 10 vjet burgim.

Aktgjykimin e ka shpallur kryetarja e trupit gjykues, gjyqtarja Donika Shala-Abdyli, e cila bëri të ditur se në dënim do t’i llogaritet edhe koha e kaluar në paraburgim.

“Gjykata shpall këtë aktgjykim: Në emër të popullit, i akuzuari Millorad Gjokoviq shpallet fajtor, sepse në periudhën e luftës në Kosovë, më 7 maj 1999, në fshatin Ozdrim, Komuna e Pejës, i akuzuari, në cilësinë e policit rezervë, me persona të tjerë, i ka shkelur rregullat e së drejtës ndërkombëtare. Gjykata, në bazë të dispozitave të Ligjit Penal të ish-Jugosllavisë, të akuzuarin e dënon me 10 vjet burgim, ku do t’i llogaritet edhe koha e paraburgimit”, tha Shala-Abdyli.

Rasti ishte rihapur për shqyrtim gjyqësor më 27 korrik të këtij viti, pasi në Institutin për Krimet e Kryera Gjatë Luftës në Kosovë nuk ishte gjetur deklarata e dëshmitares Nurije Krasniqi, për të cilën ajo kishte thënë se e kishte dhënë në polici pas përfundimit të luftës.

Në atë kohë, kryetarja e trupit gjykues kishte deklaruar se gjykata vlerësonte se ende nuk ishin shteruar të gjitha mundësitë për sigurimin e kësaj prove. Gjatë dëshmisë së saj, Krasniqi kishte treguar se pas luftës kishte dhënë deklaratë në polici lidhur me rastin, por nuk kishte mundur ta kujtonte datën e saktë.

Sipas aktakuzës së Prokurorisë, të ngritur më 23 qershor 2023, Gjokoviq akuzohej se gjatë viteve 1998–1999, si pjesëtar i forcave policore dhe ushtarake serbe, kishte kryer veprime kundër popullsisë civile shqiptare në fshatin Ozdrim të Pejës dhe në fshatrat përreth. Aktakuza përfshinte akuza për vrasje, bastisje, rrahje, maltretime, arrestime, torturë, trajtim mizor dhe çnjerëzor, mbajtje në kushte skllavërie, dëbim dhe deportim të dhjetëra civilëve, si dhe plaçkitje, djegie e shkatërrim të shtëpive të shqiptarëve.

Sipas Prokurorisë, forcat e rregullta ushtarake serbe kishin hyrë në pjesën veriore të fshatit Ozdrim, përmes rrugës rajonale Pejë–Mitrovicë, ndërsa nga pjesa perëndimore, në kufi me Vitomiricën, kishin hyrë grupe paramilitare, ku kishte edhe pjesëtarë të njësive speciale ushtarake. Në aktakuzë thuhet se këto forca kishin filluar të qëllonin me armë në drejtim të popullsisë civile, duke vrarë gjashtë civilë shqiptarë: I.K., Sh.K., E.M., R.Sh., Z.Sh. dhe M.H.

Prokuroria kishte pretenduar gjithashtu se tre civilë të tjerë, A.G., H.G. dhe M.G., të plagosur nga të shtënat, fillimisht ishin dërguar në Spitalin e Pejës, por më pas ishin ekzekutuar dhe varrosur në fshatin Lutogllavë.

Po ashtu, sipas aktakuzës, pesë civilë shqiptarë, R.K., Z.K., A.K., A.K. dhe A.Sh., ishin vrarë gjatë ofensivës, por trupat e tyre nuk ishin gjetur dhe ata vazhdonin të figuronin si persona të zhdukur.