Lajme

Autobusët në gjendje kritike, autoritetet pa zgjidhje!

Vendi po gjendet në mesin e temperaturave ekstreme, ndërsa autoritetet nuk ofrojnë zgjidhje për kaosin në transportin publik. Përderisa vozitësit ankohen për kushte të këqija të punës dhe kolapsin e pasagjerëve, Këshilli i Qytetit të Shkupit nuk mund të votojë për projektin për blerjen e eko-autobusëve të kryetares Arsovska.

Një peshqir i lagur me ujë rreth qafës nuk i shpëton shoferët e autobusëve nga vapa. Njëri nga shoferët informoi për gazetën KOHA se autobusi ka kondicioner mirëpo nuk funksionon. “Autobusi duket në gjendje të mirë, mirëpo gjithmonë kemi probleme me kondicionerin, ka por nuk funksionon. Pastaj na duhet ti hapim të gjitha dritaret dhe dyert, nga atje vetëm i nxehti hynë brenda. Gjatë kësaj periudhe sëmuremi shumë shpesh, autoritetet duhet të gjejnë zgjidhje. Me këto kushte nuk është e drejtë as për ne e as për pasagjerët”, tha njëri nga shoferët e NQP-së.

Ndërkaq, edhe qytetarët janë shumë të revoltuar për katrahurën që po e përjetojnë në këto ditë me temperatura të larta. Një qytetare që po priste në stacion, tha për gazetën KOHA se ajo shpesh ka qenë dëshmitare e qytetarëve që kanë humbur ndjenjat madje edhe kanë marrë sulme në zemër nga i nxehti i madh dhe pritja me orë nëpër stacione.

“Ta mendosh që me këso lloj kushtesh përballemi në një kryeqytet të një shteti që pretendon të hy në BE, nuk është aspak në rregull. Unë udhëtoj rregullisht, dimrit kemi probleme nga i ftohti, e pastaj nëpër shi që detyrohemi të presim në stacionet gjysmë të shkatërruara. E tani na duhet të presim me orë nëpër stacionet e mbushura me njerëz dhe kosha plehrash të thyera, ku nga kjo vjen erë shumë e keqe, e si përfundim po sëmuremi dhe çdo dit po alivanoset nga një”, tha ajo.

Nga Emergjenca Mjekësore kanë konfirmuar se në dy javët e fundit, sidomos kur është shpallur faza portokalli, kanë pasur 11 ndërhyrje në autobusë apo në stacione. Por ata besojnë se numri është më i madh, pasi ka pasur edhe qytetarë më të rinj të cilët kanë raportuar për kolaps apo lëndim, por që kanë mundur të lëvizin dhe të shkojnë vetë te mjeku.

Megjithatë, nuk mund të thuhet se në një kohë të shkurtër pasagjerët dhe shoferët do të marrin autobusë më të shumtë dhe më të mirë, sepse nuk ka zgjidhje në horizont për kaosin në komunikacionin publik të qytetit. Derisa vozitësit ankohen për kushte të këqija të punës dhe udhëtarëve të fikët, Këshilli i Qytetit të Shkupit nuk mund ta votojë projektin për blerjen e autobusëve të rinj të kryetares aktuale Danela Arsovka për të vazhduar projektin për transport të shpejtë me autobus të paraardhësit të saj Petre Shilegov.

Në Këshill, pati një numër dyshifror përpjekjesh të pasuksesshme për miratimin e blerjes së autobusëve të rinj. Ndërsa, nga VMRO-DPMNE thanë se nuk ka para në buxhetin e qytetit për blerjen e autobusëve të rinj. Ndërkohë, drejtori aktual i NQP-së, Dragi Kushovski, në seancën e javës së kaluar të Këshillit të Qytetit të Shkupit tha se NQP nuk ka mjaft autobusë për të plotësuar orarin veror të vozitjes. Sipas të dhënave që tha ai, aktualisht janë rreth 200 autobusë aktivë, ku 27 prej tyre janë pa kondicioner.

Ndryshe, që nga fillimi i vitit 2024, shoferët e NQP-së kanë qenë në grevë për pagat e papaguara. Problemi u zgjidh me subvencione. Ndërkaq, Qyteti i Shkupit ka përcaktuar 11 milionë euro subvencione për pagat e punëtorëve deri në fund të vitit 2024. (koha.mk)

Lajme

Kasami mirëpret kryetarin e Kukësit, në fokus projektet ndërkufitare

Kryetari i Komunës së Tetovës, Bilall Kasami, ka pritur në një takim kryetarin e Bashkisë së Kukësit, Albert Halilaj, me të cilin ka diskutuar për sfidat dhe perspektivat e zhvillimit lokal.

Kasami bëri të ditur se takimi shërbeu për shkëmbimin e mendimeve dhe përvojave lidhur me çështje me interes për të dy komunat, ndërsa theks i veçantë iu kushtua mundësive për realizimin e projekteve ndërkufitare.

Sipas tij, projekte të tilla mund të kontribuojnë në zhvillimin e qëndrueshëm, shkëmbimin e përvojave dhe krijimin e përfitimeve konkrete për qytetarët në të dy anët e kufirit.

Takimi u vlerësua si një hap i rëndësishëm drejt forcimit të bashkëpunimit ndërmjet Tetovës dhe Kukësit, me synim realizimin e iniciativave të përbashkëta në të ardhmen.

Lajme

Filloi Misioni Monitorues i WBIF në Maqedoninë e Veriut, Bekim Sali: Fokus te zbatimi efikas dhe rezultatet konkrete për qytetarët

Filloi Misioni Monitorues i WBIF në Maqedoninë e Veriut, Bekim Sali: Fokus te zbatimi efikas dhe rezultatet konkrete për qytetarët

Ministria për Çështje Evropiane organizoi takimin e nivelit të lartë në kuadër të Misionit Monitorues të Kornizës Investuese për Ballkanin Perëndimor (WBIF), me pjesëmarrjen e përfaqësuesve të Komisionit Evropian, Delegacionit të Bashkimit Evropian, institucioneve financiare ndërkombëtare, ministrive resore dhe institucioneve zbatuese.

Në hapje të takimit, Zëvendëskryeministri i parë dhe Ministri për Çështje Evropiane, Bekim Sali, theksoi se WBIF mbetet një nga instrumentet më të rëndësishme për mbështetjen e zhvillimit ekonomik, përmirësimin e lidhshmërisë rajonale dhe avancimin e procesit të integrimit evropian të vendit.

“Përgjegjësia jonë nuk përfundon me sigurimin e financimit. Matësi i vërtetë i suksesit është implementimi. Çdo projekt i realizuar do të thotë më shumë mundësi për qytetarët, ekonomi më konkurruese dhe standard më të lartë jetese”, theksoi ministri Sali.

Ai nënvizoi se monitorimi duhet të shihet si një instrument strategjik i qeverisjes që mundëson identifikimin e hershëm të sfidave, koordinim më efikas ndërinstitucional dhe vendimmarrje të bazuar në rezultate.

Gjatë takimit u diskutuan sfidat kryesore në implementimin e projekteve infrastrukturore, përfshirë kapacitetet e njësive implementuese, procedurat e prokurimit, ndryshimet në fushëveprimin e projekteve, koordinimin ndërmjet institucioneve dhe procedurat administrative për leje dhe miratime.

Sali theksoi se Agjenda e Reformave dhe Instrumenti për Reforma dhe Rritje kanë krijuar një qasje më strategjike në planifikimin e investimeve, ndërsa fokusi në periudhën e ardhshme duhet të jetë rritja e efikasitetit të implementimit dhe sigurimi i rezultateve konkrete për qytetarët.

Pjesëmarrësit riafirmuan përkushtimin e përbashkët për forcimin e mekanizmave të monitorimit, rritjen e kapaciteteve institucionale dhe përshpejtimin e realizimit të projekteve strategjike që kontribuojnë në zhvillimin ekonomik dhe afrimin e vendit me Bashkimin Evropian.

Misioni Monitorues i WBIF do të vazhdojë gjatë dy ditëve të ardhshme me takime tematike në fushën e transportit, energjetikës dhe mjedisit jetësor, si dhe me vizitë në terren në projektin e Impiantit për Trajtimin e Ujërave të Zeza në Shkup.

Lajme

Aliu nga Brukseli: Marrëveshja për EU4Health sjell mbështetje evropiane për reformat në shëndetësi

Në Bruksel, ministri i Shëndetësisë Azir Aliu dhe Komisioneri Evropian për Shëndetësi, Oliver Varhej, firmosën sot marrëveshjen që i hap rrugë pjesëmarrjes së Republikës së Maqedonisë së Veriut në EU4Health, programin më të madh të Bashkimit Evropian në sektorin e shëndetësisë.

Gjatë ceremonisë solemne të nënshkrimit, Aliu vlerësoi se hyrja në EU4Health përbën një moment me rëndësi për afrimin evropian të sistemit shëndetësor të Maqedonisë, si edhe një dëshmi se reformat që po zbatohen në vend ecin në linjë me standardet dhe prioritetet e BE-së.

“Me nënshkrimin e kësaj marrëveshjeje, vendi ynë bëhet pjesë e përpjekjeve evropiane për forcimin e sistemeve shëndetësore, avancimin e shëndetit publik, digjitalizimin e shërbimeve shëndetësore, përmirësimin e gatishmërisë për kriza shëndetësore dhe sigurimin e një kujdesi shëndetësor më cilësor për qytetarët. Ky nuk është vetëm anëtarësim në një program evropian, por një investim në shërbime më të mira shëndetësore, institucione më të forta dhe kushte më të mira për pacientët dhe punonjësit shëndetësorë. Me EU4Health, reformat tona fitojnë mbështetje shtesë evropiane, njohuri dhe partneritete”, deklaroi ministri Aliu në fjalën e tij.

Sipas tij, akti i nënshkrimit të sotëm përçon një mesazh të rëndësishëm: Maqedonia e Veriut nuk mjaftohet vetëm me shpalljen e orientimit të saj evropian, por e kthen atë në politika konkrete dhe në mundësi të prekshme për qytetarët.

Përfshirja në këtë program do t’u japë mundësi institucioneve shëndetësore dhe ekspertëve maqedonas të marrin pjesë në rrjete evropiane, projekte të përbashkëta dhe nisma të fokusuara në përmirësimin e politikave dhe shërbimeve në shëndetësi.