Profesori universitar në Universitetin i Tetovës, Festim Halili do të mbajë edhe këtë semestër një cikël ligjëratash në fushën e Inteligjencës Artificiale në Graz University of Technology.

Halili bëri të ditur se angazhimi i tij akademik në Austri përfaqëson jo vetëm një kontribut personal, por edhe një hap konkret drejt forcimit të bashkëpunimit ndëruniversitar dhe ndërkombëtar.

Në kuadër të kësaj vizite, janë siguruar bursa për katër studentë të informatikës – Genti, Eldari, Endriti dhe Artoni – të cilët do të ndjekin ligjëratat dhe do të përfshihen në aktivitete kërkimore në të njëjtin universitet.

Sipas Halilit, përvoja të tilla janë kyçe për zhvillimin profesional të studentëve dhe për afrimin e tyre me standardet dhe praktikat e avancuara akademike ndërkombëtare.

Ai theksoi se iniciativa të tilla janë pjesë e përpjekjeve të vazhdueshme për të krijuar mundësi konkrete për gjeneratat e reja dhe për të avancuar lidhjet akademike mes Maqedonisë së Veriut dhe institucioneve evropiane.

Më datë 15.04.2026, rreth orës 22:10, në SPB Shkup, personi me iniciale K.K.L. nga Shkupi ka denoncuar se rreth orës 17:00 është sulmuar fizikisht në vendin e saj të punës.
​Sipas denoncimit, ngjarja ka ndodhur në një klasë të një shkolle fillore në zonën e komunës së Aerodromit, derisa denoncuesja së bashku me një koleg tjetër po mbanin mbledhje me prindër. Sulmi fizik ndaj mësueses është kryer nga M.M.G. nga Shkupi, e cila është prind (nëna) e një nxënësi të asaj shkolle. Policia po ndërmerr të gjitha masat e nevojshme për zbardhjen e plotë të rastit.

Kvendi i Maqedonisë së Veriut ka miratuar zgjatjen e gjendjes së krizës për furnizimin me naftë dhe derivate, e cila do të zgjasë deri më 20 korrik 2026 dhe hyn në fuqi nga 21 prilli, pas publikimit në “Gazetën Zyrtare”, përcjell TV21.

Vendimi vjen si pasojë e situatës së rënduar ndërkombëtare të sigurisë dhe energjisë, sidomos pas përshkallëzimit të konfliktit në Lindjen e Mesme dhe ndërprerjeve serioze në transportin e naftës përmes Ngushticës së Hormuzit, një nga korridoret më të rëndësishme energjetike në botë.

Sipas autoriteteve, sulmet dhe bllokimet e fundit kanë ulur ndjeshëm rrjedhën e naftës, duke rritur rrezikun për mungesa dhe çmime më të larta në tregun global, me ndikim të drejtpërdrejtë edhe në vend. Deri më tani, Qeveria ka ndërmarrë masa për të zbutur pasojat, përfshirë uljen e TVSH-së për energjentët dhe reduktimin e akcizave për karburantet, me qëllim mbrojtjen e standardit të qytetarëve dhe sigurimin e furnizimit stabil.