Lajme

Mickoski: Nuk do t’ia lustrojë këpucët politikanëve europian

Qeveria e Maqedonisë së Veriut nuk ka as plan konkret që të vazhdojë rrugën e integrimit evropian e as nuk lëshon pe në çështjen me Bullgarinë. Kryeministri Hristijan Mickoski pretendon që do të vazhdojë përkushtimin në rrugën evropiane, por nuk ka bërë të qartë për opinionin se në çfarë mënyrë do t’i shpëtojë izolimit. Sipas Mickoskit, argumentet janë në anën e Maqedonisë pasi siç është shprehur ai, “nuk është është argument ne jemi brenda ju jeni jashtë, nëse dëshironi të anëtarësoheni duhet të pranoni gjithçka që dëshirojnë ata”. Sipas tij, është diktat dhe ai nuk do të pranojë diktate dhe shantazhe.

Hristijan Mickoski, kryeministër

“Nëse mendoni se duhet t’ia lustrojmë këpucët disa politikanëve dhe vendeve anëtare të Bashkimit Evropian dhe se ajo është mënyra dhe rruga e duhur, kërkoj ndjesë por unë nuk jam bashkëbisedues i mirë. Me mua mund të flitet vetëm në bazë të argumenteve. Unë nuk jam person kokëfortë përkundrazi jam shumë konstruktiv dhe çdoherë që argumentet e bashkëbiseduesit i prijnë argumentet e mia. Por, fatkeqësisht këto dy dekada, pothuajse dy dekada e gjysmë nuk dëgjova asnjë argument pse nuk duhet të jemi pjesë e familjes evropiane, ndërsa kam dëgjuar shumë argumente që paraqesin pengesë artificiale pse ne të mos jemi”.

Sa i përket qëndrimit të partnerit qeveritar VLEN në lidhje me porcesin eurointegrues, Mickoski tha bisedojnë për shumë çështje konstruktive, përfshirë këtu edhe integrimin e shtetit të BE, megjithatë la të nënkuptohet se kanë qëndrime të ndryshme për këtë temë.

Hristijan Mickoski, kryeministër

“Çdo herë, edhe në një familje mund të ndodhë që të ketë mendime të ndryshme. Por, në fund është e rëndësishme që së bashku do të dilni nga ai diversitet. Apo, ka një maksimë të bukur e cila thotë “Bukuria është në diversitet”, por çdoherë dalim si partnerë dhe çdoherë dalim me gjuhë të përbashkët. Kështu që, prioritet i kësaj qeverie është lufta kundër korrupsionit, prioritet i kësaj qeverie është zhvillimi ekonomik i shtetit dhe ajo që paraqet interes i qytetarëve”.

Po ashtu kryeministri tha se po punojnë në reformat gjyqësore për çka tha se, kanë metodoligjidhe plan konkret se si duhet të veprohet si dhe planifikojnë që të konsultojnë edhe ekspertë dhe do të dalin me plan veprimi se si do ta realizojnë atë.

Lajme

Ahmeti: Deklaratat e Kurtit për gjuhën shqipe u përdorën nga antishqiptarët, më gërryente në shpirt

Kryetari i Bashkimi Demokratik për Integrim, Ali Ahmeti, ka folur lidhur me statusin e gjuhës shqipe në Maqedonia e Veriut.

Në Debat Plus, Ahmeti tha se qëndrimet e kryeministrit të Kosovës, Albin Kurtit kanë ndikuar në “delegjitimimin” e kërkesave të shqiptarëve dhe i kanë dhënë argumente politike kryeministrit të Maqedonisë së Veriut, Hristijan Mickoski.

Kurti: S’po rrezikohet gjuha shqipe në Maqedoni të Veriut, pasi s’ka qenë kurrë gjuhë zyrtare

Sipas tij, edhe deklarimet se gjuha shqipe nuk ka qenë gjuhë zyrtare kanë krijuar një situatë shqetësuese, duke u përdorur nga qarqe antishqiptare.

Ahmeti u shpreh se kjo ka ndikuar negativisht në të drejtat dhe përfaqësimin e shqiptarëve, duke theksuar se “gjuha po kontestohet dhe nuk përdoret më si më parë në institucione”.

“Që ne na delegjitimoi dhe që u dha argument Kristian Mickoskit dhe fuqi politike, që kryeministri po i mbështesë ata forca politike. Kryeministri i Kosovës po del dhe thotë se gjuha shqipe kurrë s’ka qenë zyrtare. Dhe javë të tëra antishqiptarët më të mëdhenj, e vendosnin në ekran kryeministrin e Kosovës, që mua më gërryente në shpirt, ja kryeministri i Kosovës thotë që gjuha shqipe s’ka qenë zyrtare dhe nuk është.

Ishte kryeministri i Kosovës që shqiptarëve këtu ua hoqi të drejtën legjitime, legjitimitetin… kjo me ka brengosur nga kryeministrit. Sepse i tërë devalvimi i situatës këtu, asnjë hap prapa nuk ka shkuar. Që dy vjet këtu nga një hap shkohet. Kontestohet gjuha, dhe nuk përdoret më, siç është përdorur nëpër institucione. Përfaqësimi i drejtë është heq”, ka thënë Ahmeti.

Këto komente vijnë në një kohë kur debati për gjuhën shqipe është intensifikuar në Maqedoninë e Veriut, pas protestave të studentëve shqiptarë në Shkup, të cilët kërkojnë që provimet profesionale të mund të mbahen edhe në gjuhën shqipe, në përputhje me legjislacionin ekzistues.

Lajme

Ministri izraelit i Mbrojtjes: Lufta me Iranin mund të rifillojë “së shpejti”

Ministri i Mbrojtjes i Izraelit, Israel Katz, ka paralajmëruar se lufta me Iranin mund të rifillojë “së shpejti”, transmeton Anadolu.

“Është e mundur që së shpejti të na duhet të veprojmë përsëri për të siguruar arritjen e objektivave”, tha Katz gjatë një aktiviteti ushtarak në selinë e Ministrisë së Mbrojtjes në Tel Aviv.

“Irani ka pësuar goditje jashtëzakonisht të rënda gjatë vitit të kaluar, goditje që e kanë kthyer vite prapa në të gjitha fushat”, shtoi ai në deklaratat e tij të raportuara nga gazeta Yedioth Ahronoth.

Kërcënimet izraelite për një rifillim të mundshëm të sulmeve ndaj Iranit shihen nga vëzhguesit si pjesë e përpjekjeve për të shtyrë SHBA-në drejt një veprimi të ri ushtarak.

Javën e kaluar, Katz tha se Izraeli po pret një “dritë jeshile” nga SHBA-ja për të rifilluar luftën kundër Iranit.

Sipas Axios, Komanda Qendrore e SHBA-së (CENTCOM) ka përgatitur plane që mund të përfshijnë sulme ndaj infrastrukturës iraniane, si dhe opsione më të gjera si rritja e presionit detar në Ngushticën e Hormuzit.

Propozimet thuhet se synojnë ta detyrojnë Iranin të kthehet në negociata me më shumë fleksibilitet, veçanërisht për çështjen bërthamore.

SHBA-ja dhe Izraeli nisën sulme ndaj Iranit më 28 shkurt, duke nxitur kundërpërgjigje nga Teherani ndaj aleatëve të SHBA-së në Gjirin Persik dhe duke mbyllur Ngushticën e Hormuzit.

Një armëpushim u shpall më 8 prill përmes ndërmjetësimit të Pakistanit, i ndjekur nga bisedime në Islamabad më 11 prill, por nuk u arrit marrëveshje. Presidenti amerikan, Donald Trump, më vonë e zgjati armëpushimin pa një afat të ri, me kërkesë të Pakistanit.

Lajme

Qeveria: Ulja e çmimeve të karburanteve vazhdon deri më 18 maj

Qeveria informon opinionin se, pas diskutimeve me kompaninë OKTA dhe me qëllim të zbutjes së presioneve të çmimeve mbi qytetarët dhe ekonominë, zbritja e karburanteve vazhdon deri më 18 maj 2026.

Kjo është një masë që siguron ulje të çmimeve me pakicë, me zbritjen që arrin në 3 denarë për litër për naftën dhe 2 denarë për litër për benzinat me 95 dhe 98.

Nga Qeveria thonë se mbesin të përkushtuar për të marrë masa në kohë dhe efektive për të mbrojtur standardet e jetesës së qytetarëve, veçanërisht përballë një krize çmimesh të importuara dhe sfidave globale të energjisë.

“Në koordinim me institucionet kompetente dhe operatorët ekonomikë, ne do të vazhdojmë të monitorojmë situatën dhe të reagojmë në përputhje me rrethanat, me qëllim sigurimin e stabilitetit dhe parashikueshmërisë në treg. Kujdesi për qytetarët dhe mbështetja e ekonomisë mbeten përparësia jonë kryesore”, njoftojnë nga Qeveria.