Lajme

Vauçerët për inverter qytetarët mund t’i marrin vetëm të enjten

Ministria e Energjetikës do të shpërndajë vauçer për inverter vetëm nesër gjatë orarit të punës. Qytetarët të cilët kanë aplikuar për vauçerët duhet ta marrin nesër duke filluar nga ora 09:00 e mëngjesit deri në ora 17:00 dhe se kohë tjetër nuk ka. Vauçerët duhet të merren personalisht nga personi i cili ka aplikuar. Kjo do të thotë se personat të cilët janë në punë nesër nëse nuk mund të marrin të lirë për të marrë vauçerët që kanë aplikuar, atëherë vauçeri i tyre do të skadojë. Banorët e qytetit të Shkupit dhe nga komunat e rajonit të Shkupit, vauçerët duhet t’i marrin në qendrën e sportive “Boris Trajkovski”. Për qytetet e tjera do të shpërndahen në Qendrat e Punësimit.

Kur është shpallur thirrja para 10 muajve, në shkurt, nga Ministria e Ekonomisë theksuan se vauçerët do të dërgohen me postë për mos të krijuar turmë. Mirëpo, me ardhjen e VMRO-DPMNE-së në pushtet, ky projekt u mor përsipër nga Minstria e re e Energjetikës dhe u vendosë që vauçerët të jepen brenda një dite.

Ministria e Energjetikës të martën pasdite në faqen e saj njoftoi se vauçerët do të jipen më 7 nëntor, të enjtën, mirëpo për këtë nuk ka pasur asnjë njoftim ose konferencë për media që qytetarët te informohen. Ndërsa vauçerët duhet të përdoren deri më 30 nëntor.

Përndryshe për këtë projekt janë siguruar 4.1 milionë euro ose ka para për rreth 6000 vauçerë. Thirrja ka pranuar gjithsej 18.805 kërkesa pas dy thirrjeve publike. Kërkesa për shpalljen që nuk është për konsumatorët në nevojë kanë paraqitur 14.500 aplikantë dhe në shpalljen për konsumatorët vulnerabël 4.305 aplikantë.

Sipas shpalljes publike për përkrahje financiare përmes ndarjes së vauçerëve për blerje dhe instalim të kondicionerëve inverter me efikasitet të lartë për konsumatorët në nevojë për vitin 2024, ofrohen vauçerë prej 27.000 denarë për personat me të ardhura të ulëta me dy anëtarë dhe 35.000 denarë për amvisëri me tre anëtarë. Për amvisëritë me katër anëtarë parashihet vaucer prej 30.000 denarë, ndërsa për amvisëritë me pesë e më shumë anëtarë – 45.000 denarë. Gjithashtu, për konsumatorët jo të cenueshëm nga rajoni i Pellagonisë dhe Jugperëndimit janë siguruar vauçerë prej 25.000 denarë, ndërsa për rajonet e tjera nga 23.000 denarë.

Lajme

Zbulohen fitimet e biznesit legal të Gruevskit në Hungari?!

Ish-kryeministri Nikolla Gruevski, i cili nga viti 2018 jeton në Hungari, prej disa vitesh ka të regjistruar një kompani konsulence përmes së cilës siguron të ardhura nga shërbimet e biznesit, njoftoi portali hungarez “444”.

Sipas të dhënave që transmeton ky portal, Gruevski në vitin 2021 ka themeluar kompaninë “I.C.I.C Kft.”, e regjistruar për aktivitete konsulence. Bëhet fjalë për një kompani të vogël pa punonjës, e cila vepron në fushën e këshillimit për biznes dhe menaxhim.

Pasqyrat financiare tregojnë se kompania në vitin 2025 ka realizuar të ardhura prej rreth 9.600 euro, përkatësisht 3,4 milionë forinta hungareze.
Në vitin 2024, të ardhurat kanë qenë pak më të larta dhe kanë arritur në rreth 11.600 euro, respektivisht 4,1 milionë forinta.

Sipas të dhënave të publikuara, kompania në vitin 2025 ka përfunduar me një fitim prej rreth 5.650 euro, ose pothuajse 2 milionë forinta. Edhe pse të ardhurat nuk janë të larta, ato tregojnë se firma ka një aktivitet të vazhdueshëm që nga themelimi i saj.

Mediumi hungarez shton se të ardhurat e rregullta mund të tregojnë për një klient të përhershëm ose për një rreth të kufizuar klientësh, por në të dhënat e disponueshme nuk specifikohet se kush i shfrytëzon shërbimet e kësaj kompanie.

Ky informacion publikohet në një periudhë kur sërish është hapur çështja e statusit juridik të Gruevskit në Hungari. Portali hulumtues “VSquare” njoftoi se ish-kryeministri dyshohet se ka marrë shtetësinë hungareze në vitin 2022, bazuar në interesin shtetëror hungarez.

Një informacion i tillë deri më tani nuk ka ndonjë konfirmim zyrtar publik nga autoritetet hungareze. Kryeministri Hristijan Mickoski deklaroi se Qeveria nuk ka informacion zyrtar nëse Gruevski posedon shtetësi hungareze.

Nga Ministria e Drejtësisë njoftuan se Gruevski vazhdon të jetë shtetas i Maqedonisë së Veriut dhe se institucionet po i vijojnë procedurat lidhur me ekstradimin e tij, në përputhje me legjislacionin vendas, marrëveshjet dypalëshe dhe konventat ndërkombëtare.

Rasti mbetet aktual për shkak të procedurave gjyqësore që po zhvillohen në Maqedoni, si dhe për shkak të pyetjeve lidhur со statusin dhe qëndrimin e tij në Hungari.(INA)

Lajme

Personi që humbi jetën mbrëmë në Shkup, pas përplasjes me motor, është një 19 vjeçar

Një aksident i rëndë trafiku ka ndodhur mbrëmë në rrugën e Plastikave në Shkup, ku janë përplasur një veturë dhe një motoçikletë.

Menjëherë pas aksidentit, në vendngjarje kanë mbërritur ekipet e Ndihmës së Shpejtë, të cilat kanë ndërmarrë përpjekje për reanimimin e të riut 19 vjeçar i cili ka drejtuar motoçikletën dhe më pas e kanë transportuar me urgjencë drejt Spitalit të Qytetit.

Megjithatë, pavarësisht përpjekjeve të mjekëve për ta shpëtuar, vdekja e M.F. është konstatuar në orën 23:11.

Policia ka bllokuar pjesërisht segmentin rrugor ku ndodhi aksidenti dhe ka kryer këqyrjen e vendit të ngjarjes për të përcaktuar shkaqet dhe rrethanat e plota të aksidentit. Hetimet janë në vazhdim.

Lajme

Lista e re e Forbes, Samir Mane thyen rekordin duke arritur në 1.9 miliardë $ pasuri

Nëse një vit më parë, Samir Mane hyri për herë të parë në listën e miliarderëve të Forbes, këtë vit, ai e ka shtuar me 500 milionë dollarë amerikanë pasurinë e tij, sipas të dhënave që publikoi revista globale.

Biznesmeni i njohur shqiptar, ortak i vetëm i disa shoqërive tregtare dhe një grupi të madh biznesi, në listën e miliarderëve Forbes 2026 rezulton në vendin e 2.177 mes 3.428 miliarderësh.

Vitin e kaluar Forbes regjistroi 2.933 miliarderë dhe Mane ishte në vendin e 2.356.

Për vitin 2026, sipas Forbes, Samir Mane, 58 vjeç, ka thyer rekordin e tij duke arritur të rrisë pasurinë në 1.9 miliardë dollarë ose gati 162 miliardë lekë të rinj.

Samir Mane është themeluesi dhe presidenti i BALFIN Group, një konglomerat investimesh me seli në Tiranë, Shqipëri”, thotë Forbes.

Ndërsa shton: BALFIN zotëron qendra tregtare, rrjete dyqanesh elektronike dhe lodrash në Ballkanin Perëndimor, si dhe një bankë dhe projekte të pasurive të paluajtshme luksoze në Shqipëri.

Mane u largua nga regjimi komunist i Shqipërisë në vitin 1991 dhe u vendos në Austri si refugjat. Në vitin 1993, ai nisi të shiste pajisje elektroshtëpiake në Shqipëri.

Në vitin 1998 themeloi Neptun, një rrjet dyqanesh elektronike në Shqipëri, ndërsa në vitin 2005 u kthye në vend për të hapur qendrën e parë tregtare moderne në Shqipëri.

BALFIN zotëron gjithashtu pasuri të paluajtshme në Shtetet e Bashkuara, Kanada dhe Austri, si dhe parqe logjistike dhe një universitet privat në Shqipëri.