Lajme

Zgjedhjet Lokale 2025 në RMV: emrat e parë të mundshëm të kandidatëve

Ndonëse partitë politike ende nuk i bëjnë të ditur kandidatët për komuna, megjithatë jozyrtarisht po përmenden disa emra.

Përveç Visar Ganiut, nga VLEN për Çairin mund të kandidojë Izet Mexhiti, derisa është biseduar edhe për Kaltrina Zekollin.

I pyetur se a do të jetë ai kandidati për Çairin, Mexhiti tha:

“Për momentin VLEN ka angazhuar agjenci serioze për anketim, në çdo komunë ku gravitojnë shqiptarët – janë diku 16 komuna. Anketat do të na japin orientimin për kandidatët, pra nuk flasim për emra të përveçëm”.

Nga Fronti Europian, emri i parë që flitet jozurtarisht për Çairin është Bujar Osmani, ndërsa në lojë është edhe Abdylselam Selami. Nga ky koalicion thonë se së shpejti do të ketë vendim.

“Në kuadër të Frontit janë zhvilluar bisedimet për kandidatët për kryetar komunash, së shpejti do të ketë një zgjidhje”, tha Skender Rexhepi, kryetar i Lëvizjes Populli.

Në komunën e Likovës lakohet emri i kryetarit aktual Erkan Arifi nga radhët e BDI-së, i cili është në përfundim të mandatit të dytë. Ndërkaq nga VLEN përmenden Iljasa Abazi, kryetar i degës së Altërnativës – Likovë dhe Mustafa Veseli nga LD.

Në Saraj përfliten emrat e Blerand Ramadanit nga ASh e Taravarit, nga BDI Blerim Bexheti por edhe Rafiz Aliti, ndërsa nga VLEN Muhamet Elmazi i cili është drejtor ekzekutiv në Nomagas dhe Orhan Murtezani i cili është ministër aktual për Çështje europiane.

Në Tetovë përfliten Bajram Rexhepi dhe Faton Ahmeti nga BDI, por nga Fronti Europian mund të kandidohet edhe Ilir Demiri, Ash krahu i Selës. Sa i përket VLEN për një mandate të dytë pritet të kërkojë votat e qytetarëve, kryetari aktual, Bilall Kasami.

Për komunën e Gostivarit, BDI ka gjasa ta nxjerr Valdet Xhaferin, ndërsa VLEN të mbështesë ekonomistin Visar Ademi. Nga ASH Taravari mund të kandidohet vet Taravari ose Valbon Limani.

Në Kërçovë për kryetar dihet që do garojë Shkodran Alili si kandidat i pavarur, ndërsa Fatmir Dehari pritet të jetë kandidat i BDI-së për të tretën herë. VLEN ka gjasa të garojë me Fatmir Limanin.

E në Strugë lakohet emri i afaristit Mendi Qyra si kandidat i VLEN-nit dhe Zijadin Sela nga Fronti Europian.
Ndryshe zgjedhjet lokale në Maqedoninë e Veriut do të mbahen në tetor të këtij viti. /TV21/

Lajme

Elezi: VLEN po e kthen përfaqësimin e drejtë dhe adekuat në ligj

Përfaqësuesi i VLEN-it, Afan Elezi, ka deklaruar se përfaqësimi i drejtë dhe adekuat nuk është dhuratë politike, por parim kushtetues që buron nga Marrëveshja Kornizë e Ohrit dhe një nga shtyllat kryesore të karakterit multietnik të shtetit.

Sipas tij, për më shumë se dy dekada kjo çështje ka mbetur pa një zgjidhje ligjore të qëndrueshme, duke u trajtuar përmes mekanizmave të përkohshëm dhe interpretimeve të ndryshme, por pa një ligj të veçantë.

“Për gati 23 vite kjo çështje mbeti pa ligj të veçantë. Arsyet i dimë, kishim arnime, mekanizma të përkohshëm dhe interpretime të ndryshme, por asnjëherë ligj”, ka theksuar Elezi.

Ai ka vlerësuar se me ardhjen e VLEN-it në përfaqësimin e shqiptarëve janë hapur procese që, sipas tij, nuk janë iniciuar gjatë dy dekadave të kaluara.

“Për vetëm 24 muaj ne sollëm ligj dhe po e avancojmë Marrëveshjen e Ohrit. Ky është një hap historik dhe një përgjigje serioze ndaj boshllëkut institucional që u krijua pas shfuqizimit të balancuesit”, ka deklaruar Elezi.

Në fund, ai ka bërë thirrje që të gjitha subjektet politike të mbështesin këtë proces, duke theksuar se tashmë është koha për vendime konkrete dhe jo për retorikë politike.

“Ky është momenti kur secili duhet të tregojë nëse është në anën e historisë. Nuk ka më vend për patriotizëm të rrejshëm. VLEN nuk bën zhurmë për të drejtat e shqiptarëve, por i kthen ato në ligj. VLEN shqiptarët po i bën ligj”, ka përfunduar Elezi.

Lajme

Deputetja e VLEN Mimoza Musa merr pjesë në Konferencën e 5-të në Parlamentin Evropian në Bruksel

Deputetja e Kuvendit të Republikës së Maqedonisë së Veriut nga koalicioni VLEN, Mimoza Musa, mori pjesë më 23 dhe 24 qershor në Konferencën e 5-të me temë “Kapërcimi i hendekut ndërmjet pjesëmarrjes politike të të rinjve dhe politikave rinore”, e mbajtur në Parlamentin Evropian në Bruksel.

Në këtë aktivitet, së bashku me deputetë dhe përfaqësues të shoqërisë civile nga vendet e Ballkanit Perëndimor, u diskutuan tema të rëndësishme që lidhen me politikat rinore dhe përfshirjen e të rinjve në proceset vendimmarrëse.

Gjatë punimeve të konferencës, u trajtuan çështje si avancimi i politikave për të rinjtë, sfidat e shëndetit mendor te gjeneratat e reja, si dhe nevoja për rritjen e pjesëmarrjes së tyre në jetën publike dhe politike. Po ashtu, u theksua rëndësia e perspektivës evropiane për vendet e rajonit dhe forcimi i bashkëpunimit ndërmjet Ballkanit Perëndimor dhe Bashkimit Evropian.

Pjesëmarrësit shkëmbyen përvoja dhe ide mbi mënyrat se si mund të krijohen më shumë mundësi për të rinjtë, duke synuar politika më gjithëpërfshirëse dhe më afër nevojave të tyre.

Deputetja Musa vlerësoi rëndësinë e këtyre forumeve ndërkombëtare si hapësira ku ndërtohen ura bashkëpunimi dhe ku forcohet dialogu për të ardhmen e gjeneratave të reja në rajon.

https://www.facebook.com/share/p/1HGPU1rqzd/

Lajme

Ali Ahmeti priti në selinë e BDI-së të riun nga Gostivari, Naser Veliun

Kreu i Bashkimit Demokratik për Integrim (BDI), Ali Ahmeti, priti sot në selinë e partisë Naser Veliun nga Gostivari, nipin e bashkëveprimtarit të tij të hershëm, të ndjerit Naser Veliu.

Gjatë takimit, Veliu u prezantua si elektroinxhinier i diplomuar në universitete prestigjioze në Mbretërinë e Bashkuar. Takimi u vlerësua si një mundësi për bashkëbisedim me të rinj të arsimuar dhe me përgatitje profesionale, të cilët, sipas Ahmetit, përfaqësojnë një brez me potencial për të kontribuar në zhvillimin shoqëror dhe institucional.

Ahmeti theksoi rëndësinë e përfshirjes së të rinjve në procese shoqërore dhe profesionale, duke vlerësuar se kapitali njerëzor i arsimuar jashtë vendit është një vlerë e shtuar për komunitetin dhe vendin.

Në përfundim të takimit, ai i uroi Naser Veliut suksese të mëtejshme në rrugëtimin e tij profesional dhe personal.

Ja postimi plotë:

Sot kisha kënaqësinë ta pres në selinë e BDI-së Naser Veliun, të riun nga Gostivari, nipin e bashkëveprimtarit tim të hershëm, të ndjerit Naser Veliu.

Naseri është elektroinxhinier, i diplomuar në universitete prestigjioze në Angli. Takime me të rinj të arsimuar, të përgatitur profesionalisht dhe me vizion për të ardhmen janë gjithmonë të këndshme dhe japin shpresë se brezat e rinj do të vazhdojnë të kontribuojnë me dije, përkushtim dhe përgjegjësi për zhvillimin e shoqërisë sonë.

I uroj suksese të mëtejshme në rrugëtimin e tij profesional dhe personal.