Lajme

Janë shitur dy apartamente nga pasuria e konfiskuar e Nikolla Gruevskit

Një pjesë e pasurisë së konfiskuar të ish-kryeministrit Nikolla Gruevski është shitur, pasuri kjo që ishte vendosur në shitje si pjesë e procedurës në rastin “Parcela në Vodno”, përcjell TV21.

Siç konfirmojnë nga Agjencia për Menaxhimin e Pasurisë së Konfiskuar për “Fokus”, janë shitur me sukses dy apartamente në rrugën “Bihaçka”, ndërsa për tre apartamentet e tjera në kompleksin elitar “Panorama” në Vodno, ankandi ende nuk ka përfunduar.

Apartamenti më i madh, me sipërfaqe prej 57 metrash katrorë, fillimisht u ofrua për 63.000 euro, por u shit për një çmim prej 131.186 euro. Ndërkaq, apartamenti më i vogël, me sipërfaqe prej 38 metrash katrorë, i cili filloi me një çmim prej 44.000 euro, përfundimisht u shit për 90.016 euro.

Identiteti i blerësit apo blerësve deri më tani nuk është bërë publik.

Pasuria e Gruevskit u konfiskua si pjesë e vendimit gjyqësor në rastin “Parcelat në Vodno”, ku ai u dënua me burg efektiv për pastrim parash dhe përvetësim të paligjshëm të pasurive të paluajtshme përmes personave të tretë. Shitja e kësaj pasurie ka për qëllim kompensimin e dëmit të shkaktuar në buxhetin e shtetit.

Lajme

I dha 15 mijë euro ryshfet për të dalë nga burgu, mbeti edhe në burg edhe pa para

Një i dënuar nga burgu i Prilepit raportoi se është mashtruar me 890,000 denarë (rreth 15 mijë euro), pasi një person i premtoi se do ta ndihmonte ti ulej dënimi me burg.

Sipas raportit të paraqitur në Sektorin e Punëve të Brendshme të Prilepit, mashtrimi ka ndodhur gjatë dy muajve të fundit, transmeton Lideri.mk. I dënuari deklaroi se personi K.K. e kishte bindur se kishte një mënyrë për të ndërmjetësuar për uljen e dënimit dhe i kishte dhënë para disa herë.

Pasi kuptoi se premtimet nuk po përmbusheshin dhe se ishte mashtruar, ai e raportoi rastin në polici. Institucionet kompetente po marrin masa për të sqaruar incidentin dhe për të përcaktuar të gjitha rrethanat./Lideri

Lajme

Kasami: Ndeshje spektakolare me një frymë të vërtet vëllazërore

Kryetari i Komunës së Tetovës dhe një nga liderët e koalicionit VLEN, Bilall Kasami, ka reaguar pas ndeshjes mes KF Shkëndija dhe Shkëndijës së Haraçinës, duke e cilësuar atë si një përballje spektakolare dhe me atmosferë të veçantë sportive, përcjell tetova1

Kasami përgëzoi ekipin e KF Shkëndija për fitoren, ndërsa vlerësoi edhe paraqitjen dhe karakterin e treguar nga skuadra e Shkëndijës së Haraçinës.

Kasami bëri të ditur se ndeshjen e ndoqi nga afër në tribunë, së bashku me kryetarin e Komunës së Haraçinës, Daut Beqiri.

Postimi i plotë i Kasamit:

“Ndeshje spektakolare, e mbushur me gola dhe me një frymë të vërtetë vëllazërore në fushë. Urime fitoren KF SHKËNDIJA dhe një bravo të madhe për Shkëndijën e Haraçinës për lojën dhe karakterin e treguar!

Në tribuna, bashkë me kryetarin e Haraçinës, Daut Beqiri!”, ka përfunduar Kasami./tetova1.mk/

Lajme

MPB me njoftim të rëndësishëm për sistemin “Safe City”

Ministria e Punëve të Brendshme njofton qytetarët se nuk ka nevojë të sjellin faturat për gjobat e paguara nga sistemi i trafikut “Safe City” që i kanë paguar në bankë ose elektronikisht në stacionin e policisë.

Sistemi i Ministrisë së Punëve të Brendshme lidhet automatikisht me sistemin e Ministrisë së Financave dhe qytetarët janë të detyruar të plotësojnë fletëpagesën sipas udhëzimeve ligjore të procesverbalit, që do të thotë se numri unik nga procesverbali duhet të futet saktë në seksionet “numri i thirrjes” dhe “qëllimi i pagesës” të fletëpagesës.
U bëjmë apel qytetarëve që të mos e sjellin faturën e gjobave të paguar në stacionin e policisë, me qëllim që të kursejnë kohë dhe të shmangin turmat e panevojshme.