Lajme

Kasami prezanton projektet kulturore të Kapitullit të Dytë të zhvillimit të qytetit

Kryetari i Komunës së Tetovës, Bilall Kasami, gjatë një paraqitjeje publike ka theksuar rëndësinë e zhvillimit kulturor dhe artistik të qytetit, duke vënë në pah rezultatet e arritura në mandatin e parë dhe projektet e planifikuara për periudhën e ardhshme.

Kasami tha se në mandatin e parë është ringjallur jeta kulturore e Tetovës, e cila për shumë vite kishte qenë në gjendje letargjie. Ai rikujtoi se përmes dhjetëra aktiviteteve, festivaleve dhe organizimeve, Tetova është shndërruar në një qendër të gjallë artistike dhe kulturore, ku “Vera Tetovare” është bërë simbol i bashkimit të të gjitha gjeneratave në festë të artit, kulturës dhe sportit.

“U kujdesëm që Tetova t’i pasqyrojë edhe vlerat e saj historike. Rrugën e Butiqeve e bëmë me kalldrëm, duke ia dhënë pamjen që e meriton,” theksoi kryetari Kasami.

Në kuadër të planeve për mandatin e ardhshëm, ai njoftoi për ndërtimin e Sahat Kullës pranë Xhamisë së Sahatit, në vendin ku ka ekzistuar para disa shekujsh, si një simbol që i rikthen Tetovës identitetin e saj historik dhe njëkohësisht shton vlerat turistike të qytetit.

Po ashtu, Kasami paralajmëroi ndërtimin e një biblioteke dhe leximore moderne, të pajisura me literaturë bashkëkohore dhe hapësira të përshtatshme për të rinjtë që duan të mësojnë dhe të zhvillohen.

Në plan është edhe themelimi i një qendre kulturore komunale, si dhe krijimi i manifestimeve të reja kulturore e artistike, me mbështetje të veçantë për krijuesit e rinj.

“Tetova do të jetë një qytet i gjallë dhe shumë aktiv në art e kulturë,” u shpreh Kasami, duke shtuar se epoka e kaosit dhe neglizhencës në qytet ka përfunduar. Zhvillimi që kemi arritur në këto 4 vite nuk guxon të ndalet. Tetova nuk guxon të kthehet prapa. Tetova vazhdon përpara me Kapitullin e Dytë të zhvillimit, edhe më shumë, edhe më mirë, edhe më fuqishëm,” tha Kasami.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.

Lajme

DAP me paralajmërim për qytetarët: Dërgohen mesazhe të rreme, mos hapni linqe

Drejtoria e të Ardhurave Publike paralajmëron për mesazhe të rreme SMS, përmes të cilave qytetarët njoftohen se rimbursimi i tatimit është gati.

Në mesazhe përfshihet një link, i cili mund të përdoret për keqpërdorimin e të dhënave personale dhe bankare.

Nga DAP-i apelojnë qytetarët të mos e hapin linkun dhe të mos vendosin të dhëna të ndjeshme.

Të gjitha informacionet duhet të kontrollohen ekskluzivisht përmes kanaleve zyrtare të DAP-it dhe ueb-faqes ujp.gov.mk.

Qytetarëve u bëhet thirrje të jenë të kujdesshëm dhe t’i paralajmërojnë edhe të afërmit e tyre për mashtrimin e mundshëm.

Lajme

Dera e ashensorit u hap dhe u mbyll papritur, lëndohet rëndë një vajzë 3-vjeçare nga Shkupi

Më 24.08.2026, në orën 20:00, në SPB Shkup, E.Z. (30) nga Shkupi ka denoncuar se më 22.08.2026 rreth orës 18:15, derisa ajo dhe fëmijët e saj ndodheshin në ashensorin e një ndërtese banimi në territorin e Radishanit, dera e ashensorit papritmas është hapur dhe mbyllur,.

Nga hapja e mbyllja e shpesh vajza trevjeçare është tërhequr dhe ka pësuar lëndime të rënda trupore, të konstatuara në Institucionin e Shëndetit Publik “Shën Naum Ohridski” në Shkup.

Po ndërmerren masa për zbardhjen e rastit./ZYRTARE.net