Lajme

Një goditje për Temu-n, një zhgënjim për qytetarët: Pragu tatimor për porositë deri në 22 euro hiqet – të gjitha dërgesat do të kenë TVSH

Porositë e lira online nga jashtë vendit së shpejti do të bëhen më të shtrenjta. Qeveria ka propozuar ndryshime që do të heqin përjashtimin nga taksat për dërgesat deri në 22 euro. Sipas të dhënave nga Administrata Doganore, vetëm në qershor, qytetarët e Maqedonisë së veriut porositën rreth 250 ton mallra nga Temu, nga të cilat pothuajse 95 mijë kilogramë ishin pa TVSH.

Me ndryshimet në Ligjin për Tatimin mbi Vlerën e Shtuar, të gjitha produktet e porositura nga jashtë vendit – pavarësisht nga vlera e tyre – do t’i nënshtrohen taksës. Kjo do të thotë që çdo dërgesë, nga një gjilpërë te një xhaketë, do të bëhet më e shtrenjtë me 18 përqind, e njëjtë me normën e TVSH-së.

Propozimi është paraqitur tashmë në Parlament dhe, nëse miratohet, do t’i japë fund praktikës aktuale të qytetarëve që blejnë me çmime më të ulëta përmes platformave të huaja elektronike si “Temu”, “Ali Express” dhe të tjera. Qeveria pret që kjo masë të rrisë të ardhurat buxhetore.

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.