Lajme

Identifikohet i dyshuari për vrasjen e 42-vjeçarit në Nerasht të Tetovës

Sektori per Pune te Brendshme (SPB) Tetovë, e ka identifikuar të dyshuarin për vrasjen e 42 vjeçarit A.B. në fshatin Nerasht, që ndodhi para dy ditësh. Bëhet fjalë për një person të arratisur nga burgu ku po vuante dënim prej 40 vjetësh për një vrasje të kryer në vitin 2019.

Burime brenda policisë thonë se dorasi rezulton të ishte i afërt me tanimë të ndjerin A.B., 42 vjeçar, ndërsa deri tek vrasja, ka ardhur si pasojë biznesit të narkotikëve, por edhe të parave që vazhdimisht i kërkoheshin tanimë të ndjerit, në emër të haraçit për rastin e vrasjes së ndodhur para dhjetë vitesh.

Policia dyshon se vrasësi tanimë fshihet në njërin nga shtetet fqinje dhe po bëhen të gjitha përpjekjet për arrestimin e tij dhe kthimin në burgun e Idrizovës.

Dyshimet e para se personi në fjalë mund të jetë dorasi kanë ardhur nga deklaratat e familjarëve të afërt, por edhe nga identifikimet që janë bërë nga kontrolli i celularëve.

Ditëve të fundit, po kontrollohen intenzivisht nga Policia edhe kamerat e sigurisë të objekteve të ndryshme, për të parë edhe rutën e lëvizjes së të dyshuarit.

Në krim dyshohet të ketë qenë i përfshirë edhe një person i tretë, identifikimi i të cilit, për shkaqe të hetimit, nuk bëhet publik.

Nga ana tjetër, krim teknika është duke kryer ekspertizë veturës ku sipas policisë ka ndodhur vrasja.

42 vjeçari A.B. u gjet i vrarë në veturën e tij ndërsa një ditë më parë familjarët e kishin paraqitur në polici si të zhdukur. Trupi i tij u gjet nga kalimtarë të rastit në fshatin Nerasht.

Me urdhër të Prokurorisë janë siguruar kamerat nga disa objekte, për të rënë në gjurmë të vrasësit./ Alsat.mk

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.