Lajme

Grubi ende vetëm i dyshuar, vetëm një lëndë në fazë hetimi

Ish-zëvendëskryeministri Artan Grubi në mëngjesin e së hënës, ora 06: 10, u arrestua nga policia në pikën kufitare Bllacë.

“Sot në orën 06:10, në pikën kufitare Bllacë, në hyrje të shtetit, është privuar nga liria Artan Grubi, i cili kërkohej me fletarrest ndërkombëtar për zhvillimin e hetimeve lidhur me veprën penale”, tha Goce Andreevski –MPB.

Grubi nga pika kufitare Bllacë është dërguar menjëherë në paraburgim në burgun e Shutkës.

Më herët atij iu shqiptua dënimi me 30 ditë paraburgim në mungesë, derisa ishte në arrati.

Që nga dhjetori i viti 2024, kishte ikur nga Maqedonia e Veriut drejt Kosovës, duke i paraprirë ngritjes se disa akuzave nga Prokuroria Publike disa ditë më vonë.

Komunikimi i tij i fundit ishte një status në facebook më 15 dhjetor 2024:

“Të nderuar, sot kam udhëtuar për vizitë private. Ju lutem mos shpifni dhe spekuloni. Kam udhëtuar me dokumentet e mia dhe sigurimi im personal policor është i njoftuar. Unë sa po të kryej obligimet, do të kthehem në shtëpi pranë familjes”, shkroi Grubi.

Grubi dyshohet për “Përvetësim në detyrë”, sepse kishte kryesuar një seancë qeveritare në momentin kur Qeveria e kishte obliguar Lotarinë Shtetërore të blejë terminale VLT, që të fillojë vetë organizimin e lojërave elektronike të fatit. Deri më tani nuk ka aktakuzë ndaj tij për këtë rast, dhe nuk ka as informacione se deri ku ka arritur lënda. Përveç Grubit, i dyshuar në këtë rast është edhe Përparim Bajrami, ish kryetar i Bordit Drejtues dhe ish drejtor i përgjithshëm i “Lotarisë Shtetërore”. Edhe ai është në arrati. Gjithashtu Grubi së bashku me gjyqtarin Enver Bexheti, u futën në listën e zezë të SHBA-së për përfshirje në korrupsion të konsiderueshëm, ndërhyrje politike dhe përpjekje për diskreditimin e gjyqësorit. Arsyetimi është se kanë marrë ryshfet për të ndikuar në proceset gjyqësore që lidhen me aktgjykimin penal ndaj ish-drejtorit të Drejtorisë për Siguri dhe Kundërzbulim, Sasho Mijallkov.

Lajme

Kasami për protestën: BDI “hedh gurin dhe fsheh dorën”

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në “TV Koha” duke komentuar protestën e së nesërmes në Tetovë thotë se BDI në një farë forme luan rolin e saj në stilin “hedh gurin dhe fsheh dorën”!

Sipas tij, bëhet fjalë për situatë absurd.

“BDI nuk deklarohen se qëndrojnë zyrtarisht pas protestës. Këshilltarët e BDI-së para një kohe kërkuan seancë të jashtëzakonshme të Këshillit komunal dhe kur morën informatë se kjo nuk është çështje e Këshillit komunal dhe në situatë kur Këshilli komunal mund të përsërisë gabimin që është bërë në 2007, me automatizëm Këshilli komunal shkon në zgjedhje në bazë të Ligjit dhe Kushtetutës dhe e heshtën atë çështje. Duke e ditur që faji më shumë është i atyre, sepse nuk kemi ne aspak faj si VLEN as në pushtetit qendror e as në atë lokal, ata po mundohen edhe një herë të ‘hedhin gurin dhe të fshehin dorën’. Konkretisht ata duhet të tregojnë se cili është faji i kësaj qeverise aktuale të komunës dhe kësaj qeverie aktuale në pushtetin qendror”, ka thënë Kasami.

Lajme

Kasami: Vendimi i Gjykatës Kushtetuese nuk do të ndryshojë asgjë

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha ka thënë se vendimi i Gjykatës Kushtetuese për emrat e rrugëve në Tetovë, nuk do të ndryshojë asgjë.

I pyetur se çfarë do të ndodhë me fatin e rrugës “Dervish Cara”, Sheshin “Iliria” dhe cili do të jetë epilogu, Kasami shprehet i prerë:

“Vendimi i Gjykatës Kushtetuese nuk do të ndryshojë asgjë. Komuna do të vazhdojë të përdorë emërtimet e vitit 2007 e këndej, institucionet do të vazhdojnë të përdorin emërtimet si gjithmonë, ndërkohë Komuna e Tetovës do të vazhdojë me procesin e emërtimit të rrugëve. Ky proces do të përfundojë konform Ligjit dhe Kushtetutës dhe nga ai moment edhe këta rrugë dhe shumë rrugë tjera do të kenë emërtime shqiptare”, ka thënë mes tjerash Kasami.

Lajme

Kasami: BDI dhe Gjykata Kushtetuese të sinkronizuar dakorduan vendimin

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha duke komentuar protestën e nesërme tha se qytetarët nuk do t`i përgjigjen pozitivisht protestës së BDI-së, duke pranuar se integristët megjithatë kishin harxhuar kohën e tij, siç tha ai, “për të trajtuar një problem inekzistent”.

Ai tha se le të tregojnë se cila është përgjegjësia e Tetovës, cila është përgjegjësia e kësaj qeverie që ne siç tha, “të dalim e t`u përgjigjemi”.

“E vetmja përgjegjësi këtu është e Gjykatës Kushtetuese dhe e BDI-së që në mënyrë të sinkronizuar dakordojnë një vendim për abrogim të këtij vendimi në momentin kur jemi në fazën finale të emërtimit të rrugëve konform Kushtetutës dhe Ligjit. Dhe një herë duhet të pyes publikisht BDI-në ‘A është edhe një tentim i BDI-së, për të ndalur procesin e emërtimit të rrugëve në Tetovë?”, ka thënë Kasami.