Lajme

Shtëpi dhe rrugë të vërshuara, ndërprerje në furnizimin me ujë – moti i keq shkaktoi kaos në rajonin e Shkupit, Kumanovës dhe Tetovës

Janë vërshur shtëpi, rrugë, ka pasur raportime edhe për ndërprerje të energjisë elektrike, pas stuhisë së djeshme që i kaploi rajonin e Shkupit, Kumanovës dhe Tetovës.

Në numrin e vetëm të thirrjeve për raste urgjente 112 në Qendrën për Menaxhim me Kriza (QMK), ishin raportuar, ndërsa edhe më tutje raportohen, sipërfaqe të vërshuara, oborre, bodrume, shtëpi, objekte, drunj të rënë, shtylla elektrike, çati të dëmtuara, ulluqe, automobilë dhe të ngjashme.

“Të gjitha informacionet ishin selektuar në mënyrë adekuate dhe u ishin dërguar vetqeverisjeve lokale dhe shërbimeve dhe institucioneve kompetente”, potencojnë nga QMK sot në mëngjes.

Gjatë natës pas stuhisë që goditi rajonin e Shkupit, ka pasur gjashtë raportime për drunjt të rënë dhe të përkulura dhe degë të thyera, katër përçues të thyer, shtylla të përkulura dhe probleme të tjera me kabllot elektrike dhe telefonike, tetë shtëpi të përmbytura, përmbytje të bodrumeve dhe garazheve – 12, për rrugë të përmbytura – pesë, për probleme në furnizimin me energji elektrike – tre, për çati të dëmtuara, xhama të thyer dhe çati dhe ulluqe të shkëputura nga shtëpitë dhe ndërtesat – katër dhe po aq për automjetet e dëmtuara të udhëtarëve.

Në komunën e Kumanovës, gjithashtu, ka pasur numër të madh të raportimeve për drunj të rënë dhe rrugë të vërshuara në shumë lagje. Por edhe për sipërfaqe, oborre, hapësira të bodrumeve dhe objekte përdhesë dhe shtëpi të vërshuara.

Sipas të dhënave, pas reshjeve të mëdha të shiut në territorin e Tetovës, ishte bllokuar rruga lokale për fshatin Vicë në Malin Sharr, si dhe rruga në kazermën e Tetovës që ishte i stërmbushur me ujë dhe ku ka pasur një veturë të bllokuar. Janë evidentuar kanalizime të bllokuara në pjesën e sipërme të qytetit dhe në Reçicë të Madhe. Sasi të madhe të ujit ka pasur në shtëpi të vërshuara, në oborre dhe në bodrume.

“Shtabi komunal i krizës ishte aktiv dhe nga NPK “Kanalizimi” nga Tetova dhe shërbimet e tjera komunale kompetente dhe institucione dërgonin ekipe dhe individë në intervenim”, shkruan në kumtesë.

Bëhet thirrje për kujdes para dhe gjatë kohës së paqëndrueshmërisë së paralajmëruara lokale të motit.

Sipas paralajmërimit nga DPHM, deri nesër moti do të jetë i ndryshueshëm – i paqëndrueshëm, më i freskët, me shi të rrëmbyeshëm dhe bubullima.

Për fundjavë pritet që moti të jetë i qëndrueshëm dhe më i nxehtë, ndërsa bubullima të reja dhe shi të rrëmbyeshëm priten nga e hëna në orët e vona të pasdites.

Lajme

Unioni i Shoqatave Shqiptare në Mërgim shpërndan 6 mijë litra ujë për banorët e Gostivarit

Unioni i Shoqatave Shqiptare të Gostivarit në Mërgim ka realizuar sot një aksion humanitar për shpërndarjen e ujit të pijshëm për banorët e komunës së Gostivarit, në kushte të mungesës së ujit.

Gjatë aksionit u shpërndanë 6 mijë litra ujë, të paketuar në 600 bidonë, në afërsi të tregut të madh të qytetit, me synimin që ndihma të arrijë edhe te banorët e lagjeve më të largëta.

Në kumtesën e Unionit thuhet se aksioni nuk synon ta zgjidhë problemin me furnizimin me ujë, por të ofrojë mbështetje për qytetarët në këtë situatë.

“Jemi të vetëdijshëm se me këtë aksion nuk do ta zgjidhim problemin me ujin në Gostivar, por dëshmojmë se jemi krah i Gostivarit dhe i vëllezërve tanë në këto ditë të vështira të mungesës së ujit për pije”, thuhet në kumtesën e Unionit.

Unioni falënderoi ekipin, shoqatat anëtare, vullnetarët dhe donatorët që kontribuan në realizimin e aksionit.

Lajme

6 ditë pas stuhisë, Shkupi ende i mbuluar nga pemët rrëzuara

Ndonëse sot është dita e gjashtë prej kur Shkupi u përfshi nga një stuhi e fuqishme me erë prej 130 km/h, autoritetet komunale ende nuk kanë arritur të mënjanojnë dëmet. Nëpër rrugë e parqe gjithandej, pemët dhe degët e thyera vazhdojnë të pengojnë lëvizjen e lirë të qytetarë.

Komunat më të goditura nga stuhia ishin Karposhi, Çairi, Aerodromi dhe Qendra. Alsat vizitoi edhe sot disa parqe dhe rrugë të Çairit. Në shumë vende përsëri hasëm në degë të thyera. Disa prej tyre ishin grumbulluar në një vend, e të tjera ishin ashtu si kanë mbetur nga dita e martë.

“Ndonëse kanë kaluar gati një javë që nga dita kur stuhi e fuqishme goditi Qytetin e Shkupit, gjithandej nëpër bulevarde dhe parqe shohim se degët nga drunjtë e thyer ende kanë mbetur të pa pastruara”, raporton Zekirija Haxhiu, gazetar.

Drunjtë e rrëzuar dhe degët e thyera, nga stuhia lanë pas vetes shumë vetura e oborre të dëmtuara. Dhjetëra qytetarë nga komuna të ndryshme, kanë paraqitur dëmet tek autoritetet lokale dhe presin komisionet që të bëjnë vlerësimin e tyre.

Lajme

Bastisje në Shkup, arrestohet një 23-vjeçar nga fshati Brezë

Një 23-vjeçar nga fshati Brezë i Shkupit është arrestuar pasi gjatë një bastisjeje në shtëpinë dhe objektet e tij ndihmëse është gjetur një sasi e konsiderueshme kokaine.

Sipas njoftimit të Ministrisë së Punëve të Brendshme, bastisja është kryer nga zyrtarët e Njësisë për Luftimin e Trafikimit të Paligjshëm në bashkëpunim me Njësinë e Policisë Intervenuese pranë SPB Shkup.

“Personi S.B. (23) është privuar nga liria në Stacionin Policor Gazi Babë sipas nenit 215 të Kodit Penal dhe, pas dokumentimit të plotë të rastit, ndaj tij do të parashtrohet kallëzimi përkatës”, thuhet në njoftimin e MPB-së.