Lajme

Nikolloski: Autostrada nga Shkupi në Bllacë do të ndërtohet, por unë nuk do të bëj kr’im

Autostrada nga Shkupi në Bllacë do të ndërtohet dhe do të ndërtohet, por unë nuk do të bëj krim dhe nuk do t’i lejoj qytetarët e Maqedonisë të paguajnë 70 milionë euro më shumë për shkak të ndryshimeve në rrugën e bërë nga Qeveria e kaluar, tha sot ministri i Transportit Aleksandar Nikolloski.

Në përgjigje të pyetjes në seancën e sotme të Kuvendit kushtuar pyetjeve të deputetëve, ai theksoi se deri më tani nuk ka zgjidhje autostrade, pavarësisht se janë ndërtuar dy kilometra autostradë, e cila, siç tha ai, nuk fillon askund dhe nuk përfundon askund.

“Ato dy kilometra nuk lidhen me autostradën ekzistuese nga ana e Kosovës, dhe fillojnë nga kufiri ndërmjet Maqedonisë dhe Kosovës. Për këtë arsye nuk është askund dhe nuk përfundon askund sepse përfundon në një vrimë prej 50 metrash”, tha Nikolloski.

Në foltoren kuvendore ai ka bërë të ditur dokumentet në të cilat siç tha ai konfirmohet se projekti është vonuar qëllimisht dhe është realizuar në këtë mënyrë që një kompani të fitojë tenderin për ndërtimin e tuneleve.

Konsulenti teknik, kompania “Sues”, e cila është përzgjedhur për mbështetje teknike në ndërtimin e autostradës Shkup-Bllacë, siç ka treguar ai, më 31 maj të këtij viti i ka dërguar një letër drejtorit të atëhershëm të NPRRSH-së, Ejup Rustemi, në të cilën, në pikën 4 – kostot për projektin, thotë se shpenzimet rriten nga 172.1 milionë euro në 240 milionë euro sepse ai e ndryshoi projektin dy herë. “Sues” më 17 shtator i ka dorëzuar një dokument të ri, tani drejtorit aktual të NPRRSH-së, Koce Trajanovski, në të cilin në pikën 1 – kushtet e referencës për projektin, thonë se tunelet janë projektuar qëllimisht gabim dhe se nuk janë projektuar në përputhje me standardet evropiane.

“Unë nuk do ta realizoj krimin e Ejup Rustemit dhe qytetarët e Maqedonisë nuk do të paguajnë 70 milionë euro më shumë me mundësinë e aneksit prej 20 për qind dhe të shkojë deri në 300 milionë euro, nuk do ta lejoj këtë. Tunelet e Rustemit janë projektuar kështu sepse atë projekt të tuneleve mund ta fitojë vetëm një kompani nëse ka pasur tender sepse teknikisht vetëm ajo kompani mund të ndërtojë tunele të tilla. As unë, as kryeministri, as Trajanovski, e më së paku BERZH-i nuk jemi naiv të financojmë krimin”, tha Nikolloski.

Ai bëri të ditur se kompanitë Jubaj 2 Amet, Frukta Fruta, Kadis Holding dhe Atlantik Shpknjp janë kompanitë që kanë blerë parcelat nga persona fizikë ku është dashur të kalonte traseja e autostradës, ndërsa parcelat janë rishitur disa herë.

“Nuk ka pasur asnjëherë një prezantim publik të tre traseve, që është detyrim ligjor. Mjetet për autostradën janë miratuar për herë të parë në vitin 2019, janë konfirmuar në vitin 2020. Pse nuk është shpallur tender në vitin 2021, që të shiten parcelat dhe të bëhet tenderi që ta marrë vetëm një kompani dhe vetëm ajo të ndërtojë tunele”, theksoi Nikolloski.

Nga foltorja kuvendore ai i bëri thirrje Prokurorisë Publike që ta hetojë plotësisht rastin.

Lajme

Uji në Gostivar pastrohet nga ndotja

Më në fund uji në Gostivar është pastruar nga ndotja fekale dhe tash mund të përdoret si ujë teknik, por jo për pije dhe për përgatitje të ushqimit. Kjo u bë e ditur nga Komiteti Drejtues për menaxhim me kriza. Emilija Anevska nga “Ujësjellësi i Shkupit” tha se janë marrë gjashtë mostra nga konsumatorët në Gostivar dhe për tri ditë radhazi nuk janë evidentuar baktere koliforme. Megjithatë, monitorimi do të vazhdojë deri në konfirmimin se uji është i sigurt edhe për pije.

“Dua të them se uji mund të përdoret teknikisht, por gjithsesi qytetarët të mos e përdorin për pije dhe gatim. Në ditët në vazhdim do ta rrisim numrin e vendeve matëse në komunën e Gostivarit dhe do ta bëjmë kontrollin themelor në përputhje me rregulloren për ujë të pijshëm. Me monitorim të vazhdueshëm do të mund të vërtetojmë se uji në ditët në vazhdim do të mund të përdoret edhe për pije”, tha Emilija Anevska nga “Ujësjellësi i Shkupit”.

Ministri i Punëve të Brendshme, Pançe Toshkovski, u bëri apel drejtorëve të ndërmarrjeve publike dhe të gjithë personave që kanë lidhje direkte ose indirekte me cilësinë e ujit, që të veprojnë me përgjegjësi maksimale. Ai tha se shëndeti dhe siguria e qytetarëve duhet të jenë prioritet dhe se çdo përgjegjës duhet t’i zbatojë obligimet ligjore, veçanërisht në sigurimin e ujit të sigurt për pije.

“Dua t’u dërgoj një mesazh për të ardhmen të gjithë përgjegjësve në kuadër të komunave në territorin e Maqedonisë. Shpresoj që kjo të shërbejë si mësim dhe që, njëherë e përgjithmonë, në të ardhmen të veprojnë me profesionalizëm maksimal dhe në përputhje me kompetencat e tyre të përcaktuara me ligj sa i përket kontrollit të cilësisë së ujit. Sepse me shëndetin dhe sigurinë e qytetarëve nuk bëhet lojë. Çdo përgjegjësi duhet të merret me seriozitetin dhe profesionalizmin më të madh, veçanërisht përgjegjësia që lidhet me ujin, qoftë ujë teknik për përdorim apo ujë për pije”, tha , Pançe Toshkovski.

Edhe nga Komuna e Gostivarit njoftuan se uji nga rrjeti i ujësjellësit tashmë mund të përdoret për qëllime teknike.
Nga Komuna thanë se falë angazhimit të institucioneve lokale dhe qendrore, si dhe të gjitha palëve të përfshira në proces, po ndërmerren masat e nevojshme për sanimin e gjendjes.

Lajme

Nga 1 gushti shtrenjtohet ngrohja qendrore në Shkup, faturat rriten për rreth 140 denarë

Komisioni Rregullator për Energjetikë (KRRE) ka vendosur që çmimi i ngrohjes për konsumatorët e EMV-së të rritet mesatarisht me 5,96%, duke e rritur faturën mesatare mujore për rreth 140 denarë (nga 2.353 në 2.493 denarë), përcjell TV21. Për konsumatorët që furnizohen përmes ish-Ngrohtores “Shkup Veri”, tani kompania Energy Ecolink, çmimi do të rritet mesatarisht me 3,6 për qind, ndërsa për shfrytëzuesit e ESM Energjetika shtrenjtimi do të jetë rreth 5 për qind. Sipas KRRE-së, vendimi është marrë pas analizave ekonomike dhe teknike, ndërsa gjatë sezonit të kaluar sistemit të ngrohjes i janë bashkuar 1.521 konsumatorë të rinj.

Lajme

BDI: VLEN në panik, kur nuk i ke numrat, i porosit anketat

Bashkimi Demokratik për Integrim (BDI) ka reaguar ndaj anketës së publikuar nga koalicioni VLEN, duke e akuzuar atë se po përpiqet të krijojë një epërsi të rreme përmes, siç i quan, “anketave të fabrikuara”.

Sipas BDI-së, anketa nuk ofron transparencën e nevojshme, pasi, sipas reagimit, nuk dihet se kush e ka porositur dhe financuar, si është përzgjedhur mostra, kur është zhvilluar terreni dhe cilat kanë qenë pyetjet e plota të anketimit.

Në reagim thuhet gjithashtu se agjencia që ka realizuar anketën nuk ka pasur aktivitet serioz publik në matjen e opinionit gjatë dy viteve të fundit dhe se është riaktivizuar pikërisht në periudhën kur, sipas BDI-së, VLEN-it i nevojiten rezultate për të mbuluar rënien e mbështetjes politike.

BDI përmend edhe emrin e Vesna Kuzmanoviq, duke ngritur dyshime se, sipas saj, nuk bëhet fjalë për një matje të mirëfilltë të opinionit publik, por për një “operacion propagandistik” me qëllim krijimin e një perceptimi të favorshëm për VLEN-in.

Në fund të reagimit, BDI vlerëson se publikimi i anketave nuk mund të ndryshojë vullnetin e qytetarëve, duke e cilësuar materialin e publikuar si “propagandistik” dhe duke akuzuar VLEN-in për, sipas saj, servilizëm në Qeveri, degradim të përfaqësimit shqiptar dhe përpjekje për të fshehur dobësinë politike.