Lajme

Vidhen akumulatorët në Manastir, dëmi 10 milionë denarë

Ministria e Punëve të Brendshme (MPB) ka njoftuar se Sektori për Punë të Brendshme (SPB) në Manastir ka paraqitur kallëzim penal në Prokurorinë Themelore Publike ndaj katër personave nga Resnja, Manastiri dhe Ohri, të dyshuar për përfshirje në vjedhje të rëndë dhe fshehje të sendeve të vjedhura.

Sipas të dhënave të MPB-së, personat me inicialet M.M. (39) dhe I.B. (19) kanë kryer dy herë vjedhje të rëndë në periudhën nga 1 shkurti deri më 23 prill 2025, në segmentin hekurudhor nga Manastiri deri në fshatin Kremenicë. Ata dyshohet se kanë marrë një sasi të konsiderueshme akumulatorësh, pronë e Ndërmarrjes Publike për Infrastrukturë Hekurudhore – Hekurudhat e Maqedonisë së Veriut.

Ndërkohë, personat D.N. (29) nga Manastiri dhe M.XH. (27) nga Ohri akuzohen se kanë blerë akumulatorët e vjedhur për një shumë të caktuar parash, ndonëse kanë qenë të vetëdijshëm për prejardhjen e paligjshme të mallrave dhe nuk e kanë raportuar rastin në polici.

Dëmi material i shkaktuar nga kjo vepër penale vlerësohet në 10.606.746 denarë.

Gjykatësi i procedurës paraprake ka caktuar masën e paraburgimit prej 30 ditësh për dy të akuzuarit e parë.

Lajme

Mickoski: Kemi çmimet e naftës më të ulëta në rajon

“Ndjekim situatën me naftën. Ne ende jemi vend, i cili është me çmimet më të ulëta në rajon kur bëhet fjalë për benzinën dhe dizelin. Do të reagojmë ashtu siç kemi reaguar edhe deri më tani. Qytetarët duhet të jenë të qetë. Ne do të vazhdojmë të jemi shteti me çmimin më të ulët të benzinës dhe dizelit edhe pse është prodhim i bursës dhe nuk është prodhim që varet nëse është biznesmen më i mirë apo më i keq, politikan më i mirë apo më i keq. Të gjithë blejmë nga vendi i njëjtë”, deklaroi Hristijan Mickoski, Kryeministër./Alsat.mk.

Lajme

Bilall Kasami promovon rrugën e re në lagjen “Dardania”: Infrastrukturë moderne për banorët

Kryetari i Komunës së Tetovës, Bilall Kasami, ka bërë të ditur se është promovuar rruga e re në lagjen “Dardania”, një projekt infrastrukturor që, sipas tij, është realizuar sipas standardeve moderne.

“Me shumë kënaqësi sot promovuam rrugën në lagjen ‘Dardania’, një rrugë e re, moderne dhe me të gjitha standardet!

Instaluam rrjet të ri ujësjellësi, vendosja e anësoreve dhe asfaltimi i rrugës!

Ju qoftë përhajr banorëve!”, ka shkruar Kasami.

Lajme

Zjarri në Parkun e Gazi Babës, nën kontroll

Zjarri që përfshiu Parkun e Gazi Babës është vënë nën kontroll, njoftoi Qendra për Menaxhim me Kriza (QMK). Sipas drejtorit të QMK-së, Muhamed Ali, ekipet e Brigadës së Zjarrfikësve të Qytetit të Shkupit kanë ndërhyrë në terren, ndërsa situata aktualisht po stabilizohet.

“Zjarri në Parkun e Gazi Babës është vënë nën kontroll. Qendra për Menaxhim me Kriza reagoi menjëherë, duke kontaktuar dhe koordinuar institucionet kompetente, ndërsa Brigada Kundër Zjarrit e Qytetit të Shkupit ndërhyri me shpejtësi dhe profesionalizëm në terren. Personalisht isha i pranishëm në vendngjarje për të koordinuar aktivitetet dhe për të ndjekur nga afër zhvillimin e situatës. Gjendja po stabilizohet, ndërsa ekipet kompetente do të vazhdojnë të qëndrojnë në terren deri në shuarjen e plotë të zjarrit. Apelojmë tek të gjithë qytetarët që, nëse vërejnë zjarr, tym apo ndonjë situatë që mund të paraqesë rrezik, ta raportojnë menjëherë në numrin emergjent 112. Njëkohësisht, u bëjmë thirrje qytetarëve që gjatë këtyre ditëve me temperatura të larta të jenë të kujdesshëm gjatë lëvizjes në zonat malore dhe pyjore, të shmangin çdo veprim që mund të shkaktojë zjarr dhe të respektojnë rekomandimet e institucioneve kompetente”, theksoi Muhamed Ali, drejtor i QMK-së.