Lajme

VLEN: Erkan Arifi të përgjigjet se për çfarë po e heton Policia Financiare

Koalicioni VLEN shpreh shqetësimin e thellë për keqpërdorimet e shumta që, sipas të dhënave dhe indikacioneve, janë zhvilluar ndër vite në Komunën e Likovës nën drejtimin e Erkan Arifit. Kultura e pandëshkueshmërisë, pasurimi i shpejtë dhe i dyshimtë i individëve të lidhur me pushtetin vendor, si dhe dëmtimi i interesit publik, nuk mund të tolerohen më.

Sot, kur shteti i së drejtës ka filluar të funksionojë, qytetarët kanë të drejtë të kërkojnë përgjegjësi.

Prandaj, VLEN i drejton disa pyetje publike kryetarit të Komunës së Likovës, z. Erkan Arifi:

A është e vërtetë që Policia Financiare ka ndërhyrë në Komunën e Likovës?

A janë marrë për shqyrtim dokumentacionet e disa tenderëve të zhvilluar nga komuna?

A jeni subjekt i hetimit për keqpërdorime të rënda financiare?

Në vend të deklaratave populiste dhe tentativave për të devijuar vëmendjen, qytetarët meritojnë përgjigje të qarta dhe transparente. Është koha që z. Arifi të sqarojë publikisht pse ka hyrë në radarët e Policisë Financiare dhe çfarë fshihet pas pasurimit të tij personal dhe familjar.

Nëse është e vërtetë që qytetarët e Likovës janë rrezikuar seriozisht nga ndotja me arsen – një akuzë tejet e rëndë – atëherë kjo çështje duhet të hetohet urgjentisht deri në fund dhe përgjegjësit të dalin para drejtësisë.

Skemat korruptive që raportohen në Komunën e Likovës janë pasqyra më e qartë e mënyrës se si është ushtruar pushteti nga BDI për më shumë se dy dekada – si në nivel lokal ashtu edhe në atë shtetëror. Retorikat nacionaliste, kërcënimet me destabilizim apo fushatat me ngjyrim emocional nuk mund të fshehin të vërtetën: pushteti i tyre ka qenë i ndërtuar mbi klientelizëm, tenderë dhe shfrytëzim të resurseve publike.

Qytetarët shqiptarë e ndalën këtë model qeverisjeje në zgjedhjet parlamentare të vitit të kaluar. Më 19 tetor, me votën e tyre, do të ndalin edhe plaçkitjen e pushtetit lokal.

Koalicioni VLEN është i vendosur që të çojë përpara procesin e përgjegjësisë dhe transparencës. Të gjithë ata që kanë abuzuar me besimin e qytetarëve dhe me fondet publike, do të përballen me drejtësinë.

Lajme

Deputetja e VLEN Mimoza Musa merr pjesë në Konferencën e 5-të në Parlamentin Evropian në Bruksel

Deputetja e Kuvendit të Republikës së Maqedonisë së Veriut nga koalicioni VLEN, Mimoza Musa, mori pjesë më 23 dhe 24 qershor në Konferencën e 5-të me temë “Kapërcimi i hendekut ndërmjet pjesëmarrjes politike të të rinjve dhe politikave rinore”, e mbajtur në Parlamentin Evropian në Bruksel.

Në këtë aktivitet, së bashku me deputetë dhe përfaqësues të shoqërisë civile nga vendet e Ballkanit Perëndimor, u diskutuan tema të rëndësishme që lidhen me politikat rinore dhe përfshirjen e të rinjve në proceset vendimmarrëse.

Gjatë punimeve të konferencës, u trajtuan çështje si avancimi i politikave për të rinjtë, sfidat e shëndetit mendor te gjeneratat e reja, si dhe nevoja për rritjen e pjesëmarrjes së tyre në jetën publike dhe politike. Po ashtu, u theksua rëndësia e perspektivës evropiane për vendet e rajonit dhe forcimi i bashkëpunimit ndërmjet Ballkanit Perëndimor dhe Bashkimit Evropian.

Pjesëmarrësit shkëmbyen përvoja dhe ide mbi mënyrat se si mund të krijohen më shumë mundësi për të rinjtë, duke synuar politika më gjithëpërfshirëse dhe më afër nevojave të tyre.

Deputetja Musa vlerësoi rëndësinë e këtyre forumeve ndërkombëtare si hapësira ku ndërtohen ura bashkëpunimi dhe ku forcohet dialogu për të ardhmen e gjeneratave të reja në rajon.

https://www.facebook.com/share/p/1HGPU1rqzd/

Lajme

Ali Ahmeti priti në selinë e BDI-së të riun nga Gostivari, Naser Veliun

Kreu i Bashkimit Demokratik për Integrim (BDI), Ali Ahmeti, priti sot në selinë e partisë Naser Veliun nga Gostivari, nipin e bashkëveprimtarit të tij të hershëm, të ndjerit Naser Veliu.

Gjatë takimit, Veliu u prezantua si elektroinxhinier i diplomuar në universitete prestigjioze në Mbretërinë e Bashkuar. Takimi u vlerësua si një mundësi për bashkëbisedim me të rinj të arsimuar dhe me përgatitje profesionale, të cilët, sipas Ahmetit, përfaqësojnë një brez me potencial për të kontribuar në zhvillimin shoqëror dhe institucional.

Ahmeti theksoi rëndësinë e përfshirjes së të rinjve në procese shoqërore dhe profesionale, duke vlerësuar se kapitali njerëzor i arsimuar jashtë vendit është një vlerë e shtuar për komunitetin dhe vendin.

Në përfundim të takimit, ai i uroi Naser Veliut suksese të mëtejshme në rrugëtimin e tij profesional dhe personal.

Ja postimi plotë:

Sot kisha kënaqësinë ta pres në selinë e BDI-së Naser Veliun, të riun nga Gostivari, nipin e bashkëveprimtarit tim të hershëm, të ndjerit Naser Veliu.

Naseri është elektroinxhinier, i diplomuar në universitete prestigjioze në Angli. Takime me të rinj të arsimuar, të përgatitur profesionalisht dhe me vizion për të ardhmen janë gjithmonë të këndshme dhe japin shpresë se brezat e rinj do të vazhdojnë të kontribuojnë me dije, përkushtim dhe përgjegjësi për zhvillimin e shoqërisë sonë.

I uroj suksese të mëtejshme në rrugëtimin e tij profesional dhe personal.

Lajme

Kasami mirëpret kryetarin e Kukësit, në fokus projektet ndërkufitare

Kryetari i Komunës së Tetovës, Bilall Kasami, ka pritur në një takim kryetarin e Bashkisë së Kukësit, Albert Halilaj, me të cilin ka diskutuar për sfidat dhe perspektivat e zhvillimit lokal.

Kasami bëri të ditur se takimi shërbeu për shkëmbimin e mendimeve dhe përvojave lidhur me çështje me interes për të dy komunat, ndërsa theks i veçantë iu kushtua mundësive për realizimin e projekteve ndërkufitare.

Sipas tij, projekte të tilla mund të kontribuojnë në zhvillimin e qëndrueshëm, shkëmbimin e përvojave dhe krijimin e përfitimeve konkrete për qytetarët në të dy anët e kufirit.

Takimi u vlerësua si një hap i rëndësishëm drejt forcimit të bashkëpunimit ndërmjet Tetovës dhe Kukësit, me synim realizimin e iniciativave të përbashkëta në të ardhmen.