Lajme

Lazim Destani u bën thirrje shqiptarëve për unitet dhe dalje masive në zgjedhje

Në një takim të organizuar në Cyrih, me pjesëmarrjen e afaristëve, profesorëve dhe aktivistëve të komunitetit shqiptar në Zvicër, filantropi Lazim Destani përcolli një mesazh të qartë për rëndësinë e unitetit dhe pjesëmarrjes qytetare në zgjedhjet lokale në Kosovë dhe Maqedoninë e Veriut.

Në fjalën e tij, z. Destani tha se politika është pjesë e jetës shoqërore, por nuk duhet të kthehet në arsye për përçarje.

“Ne kemi kaluar periudha të vështira si komb. Është e rëndësishme që shqiptarët të marrin pjesë masivisht në zgjedhje, duke ruajtur unitetin dhe vëllazërinë. Vetëm të bashkuar jemi të fortë, të ndarë mbetemi të dobët”, u shpreh ai.

Në ngjarje u lexua edhe një përshëndetje e ambasadorit të Maqedonisë së Veriut në Bernë, Shkëlqesia e Tij z. Rexhep Demiri, i cili përmes një mesazhi telefonik përshëndeti të pranishmit dhe vlerësoi rolin e diasporës si faktor unifikues.

Takimi mblodhi një numër të madh pjesëmarrësish, mes tyre Prof. Dr. Omer Xhemaili, Blerim Destani, Dan Ibrahimi, Nazmi Jakurti, Florim Useini, Afrim Mehmeti, Atdhe Jasiqi, Jetmir Alimi, Prof. Dr. Xhavit Lipaj, Dashnim Hebibi, Adis Tairi dhe shumë të tjerë nga fusha të ndryshme.

Ngjarja në Cyrih tregoi edhe një herë se diaspora shqiptare është e angazhuar dhe e përfshirë në proceset shoqërore dhe politike, duke mbetur një urë e rëndësishme bashkëpunimi dhe solidariteti për shqiptarët kudo që ndodhen.

Lajme

E dhimbshme, tifoz i Fenerbahçes ndërron jetë gjatë ndeshjes

Një tifoz i Fenerbahçes, Yaşar Gerçek, ka ndërruar jetë gjatë ndeshjes pas një sulmi në zemër.

Klubi e ka konfirmuar lajmin me dhimbje, duke shprehur ngushëllime për familjen, të afërmit dhe gjithë komunitetin e Fenerbahçes.

Në të njëjtën ndeshje, Fenerbahçe u mposht në shtëpi nga Beşiktaşi me rezultat 2-1.

Lajme

Skandal në Tetovë! I akuzuari pengoi mjekët teksa po shpëtonin të lënduarin

Tetovë – Incident gjatë një ndërhyrjeje të Ndihmës së Shpejtë në Tetovë. Një 40-vjeçar nga qyteti është shoqëruar në polici pasi dyshohet se ka penguar ekipin mjekësor teksa po i jepte ndihmë një këmbësori të lënduar në një aksident trafiku.

Ngjarja ka ndodhur më 5 shtator, rreth orës 19:10, në rrugën “Ilinden” në Tetovë.

Sipas denoncimit të bërë në SPB Tetovë nga një punonjës i Shërbimit të Ndihmës së Shpejtë, gjatë ofrimit të ndihmës mjekësore, R.U. (40) nga Tetova dyshohet se ka prishur rendin dhe qetësinë publike me bërtitje, ngritje zëri dhe sjellje të papërshtatshme ndaj ekipit mjekësor.

Policia e ka shoqëruar personin në stacion dhe ndaj tij është përgatitur parashtresa përkatëse.

Lajme

163 km/h në rrugë ku lejoheshin 80!

Rumuni “fluturon” nëpër Maqedoni, kapet në Tabanoc

Shpejtësi marramendëse në autostradën A1! Një shtetas rumun është ndaluar nga policia pasi është kapur duke drejtuar automjetin me 163 kilometra në orë, në një pjesë të rrugës ku shpejtësia maksimale e lejuar ishte vetëm 80 km/h.

Ngjarja ka ndodhur më 4 shtator 2026, rreth orës 06:30, në autostradën A1, pranë Demir Kapisë.

Sipas policisë, 49-vjeçari H.V.S. nga Rumania po drejtonte një automjet tip Audi, me targa rumune, kur sistemi i mbikëqyrjes “Qyteti i Sigurt” regjistroi shkeljen.

Ai u identifikua si person që dyshohet se ka kryer veprën penale “drejtim i pamatur i automjetit”, sipas nenit 297-a të Kodit Penal.

Rreth orës 11:20, kur automjeti po dilte nga vendi përmes pikës kufitare Tabanoc, policia e ndaloi dhe e arrestoi shtetasin rumun.

Ai u dërgua në Stacionin Policor të Negotinës për procedurë të mëtejshme, ndërsa ndaj tij pritet të ngrihet kallëzim penal përkatës.

Nga 80 në 163 km/h – më shumë se dyfishi i shpejtësisë së lejuar!