Sot është dita e fundit e mësimit për nxënësit e shkollave fillore dhe të mesme në vend. Pas përfundimit të vitit shkollor, ata do të jenë në pushim veror deri më 31 gusht.

Për më shumë se 14.500 maturantë, mësimi përfundoi më 15 maj. Ndërkohë, nesër (11 qershor), maturantët e regjistruar për provimin shtetëror të maturës do t’i nënshtrohen provimit të detyrueshëm ekstern në gjuhën amtare – maqedonase, shqipe, turke ose serbe.

Kandidatët që kanë zgjedhur maturën profesionale shtetërore dhe maturën artistike shtetërore do ta japin këtë provim më 12 qershor. Ndërkaq, pjesa e parë e maturës, provimi zgjedhor ekstern, u zhvillua më 6 qershor.

Sipas të dhënave zyrtare, nga gjithsej 14.587 nxënës të regjistruar për provimet e maturës, 12.184 do t’i nënshtrohen maturës shtetërore, 2.276 maturës profesionale shtetërore, ndërsa 127 nxënës janë regjistruar për maturën artistike shtetërore.

Në të njëjtën kohë, gjysmëmaturantët gjatë këtij muaji duhet të kryejnë regjistrimin në vitin e parë të arsimit të mesëm. Aplikimi do të bëhet në mënyrë elektronike përmes portalit Uslugi.gov.mk, duke përdorur qasjen e dedikuar për nxënësit nga llogaritë e tyre në schools.mk.

Pas aplikimit online, kandidatët do të duhet të dorëzojnë dokumentacionin e nevojshëm në shkollat ku kanë aplikuar.

Një sasi e madhe purosh me vlerë rreth 4 mijë euro është sekuestruar nga ekipet mobile të Drejtorisë së Doganave gjatë një kontrolli të detajuar të një autobusi në pikën kufitare Tabanoc.

Siç njoftojnë autoritetet doganore, kundër shtetasit të Maqedonisë së Veriut, K.B., është ngritur kallëzim penal në Prokurorinë Publike të Kumanovës për veprën penale të kontrabandës, e paraparë dhe e dënueshme sipas Kodit Penal. I dyshuari është shofer autobusi, i punësuar në një kompani që merret me transport ndërkombëtar rrugor.

Autobusi u ndalua për kontroll të hollësishëm nga ekipi doganor mobil pas dyshimeve të ngritura gjatë procedurës së rregullt kufitare. Gjatë kontrollit, nën ulëse dhe në një zgavër të fabrikuar të autobusit u zbuluan gjithsej 312 puro të prodhuesve të ndryshëm.

Sipas vlerësimeve të autoriteteve, detyrimet e papaguara ndaj shtetit arrijnë në rreth 174.900 denarë.

Produktet e akcizës që ishin objekt i tentativës për kontrabandë janë sekuestruar, ndërsa me urdhër të Prokurorisë Publike të Kumanovës do t’i dorëzohen Agjencisë për Menaxhimin e Pronës së Sekuestruar.

Nga Drejtoria e Doganave theksojnë se kontrollet e intensifikuara në pikat kufitare do të vazhdojnë edhe në periudhën e ardhshme, me qëllim parandalimin e tregtisë së paligjshme të produkteve të akcizës, mbrojtjen e interesave financiare të shtetit, ruajtjen e shëndetit publik dhe garantimin e konkurrencës së ndershme në treg.

Kryetari i Bashkimit Demokratik për Integrim, Ali Ahmeti, ka marrë pjesë në pritjen solemne të organizuar nga Matthew Lawson, me rastin e ditëlindjes së Charles III.

Përmes një postimi publik, Ahmeti theksoi se ngjarja përbënte një mundësi të veçantë për të riafirmuar miqësinë e qëndrueshme dhe partneritetin e ngushtë ndërmjet Mbretëria e Bashkuar dhe Maqedonia e Veriut, njofton TS.

Ai vlerësoi gjithashtu kontributin e vazhdueshëm të Mbretërisë së Bashkuar në avancimin e proceseve demokratike, forcimin e institucioneve dhe mbështetjen e perspektivës euroatlantike të vendit.

Me këtë rast, Ahmeti përcolli urimet e tij më të sinqerta për Mbretin Charles III, duke i dëshiruar shëndet të plotë, mirëqenie dhe suksese të mëtejshme në ushtrimin e detyrave të tij shtetërore.