Lajme

Valë e madhe e të nxehtit në Evropë, Gjermania dhe Hungaria më të prekurat

Të paktën 193 milionë njerëz në Evropë, përfshirë 75 milionë në Gjermani, pritet të përjetojnë temperatura mbi 35 gradë Celsius në një moment të caktuar sot, sipas llogaritjeve të AFP. Kjo është një rritje nga dje, ndërsa vala e të nxehtit lëviz gradualisht drejt verilindjes së kontinentit.

Në përgjithësi, temperaturat maksimale pritet të kalojnë 30°C në zonat e Evropës ku jetojnë më shumë se 404 milionë banorë, pak më të ulëta se një ditë më parë. Kjo analizë, bazuar në parashikimet nga Shërbimi Meteorologjik Gjerman dhe parashikimet e popullsisë për vitin 2025 nga Qendra e Përbashkët e Kërkimit, është në përputhje me të dhënat nga OJQ-ja austriake Klimadashboard.

Dje, një model moti i llogaritur në orën 3:00 GMT parashikoi se 150 milionë njerëz do të ekspozoheshin ndaj temperaturave mbi 35°C.

Ndër zonat më të prekura nga temperaturat jashtëzakonisht të larta të shtunën është Gjermania, ku rreth 82 milionë njerëz pritet të ekspozohen ndaj temperaturave mbi 30 gradë Celsius, nga të cilët 75 milionë do të duhet të përballen me temperatura mbi 35°C.

Në Hungari, pothuajse i gjithë vendi do të ekspozohet ndaj temperaturave mbi 35°C të shtunën, duke prekur më shumë se 9 milionë banorë, transmeton Klankosova.tv

Vala e të nxehtit preku edhe një pjesë të madhe të Austrisë, përfshirë kryeqytetin Vjenë, Republikën Çeke, veçanërisht Pragën, dhe pjesë të mëdha të Polonisë.

Temperaturat do të kalojnë 30°C në pjesën më të madhe të Kontinentit të Vjetër, nga Greqia dhe Italia në Danimarkë dhe në majën jugore të Suedisë, megjithëse kushtet në Londër, Portugali dhe pjesë të Spanjës pritet të mbeten relativisht të pandryshuara.

Parashikuesit e motit në Francë presin që temperaturat të kalojnë 35°C në një zonë me rreth 26 milionë banorë, më pak se një ditë më parë.

Për të përcaktuar këto të dhëna, AFP përdori një metodë të ngjashme me atë të organizatës Klimadashboard, duke kombinuar një model parashikimi të motit nga Deutscher Wetterdienst (DWD), shërbimi meteorologjik gjerman, me dendësinë e popullsisë.

Duke qenë se saktësia e atij modeli është afërsisht 6.5 km, ai nuk mund ta pasqyrojë plotësisht gjendjen e ishujve të nxehtësisë urbane, tha për AFP-në David Jablonski i organizatës joqeveritare Klimadashboard.

Prandaj, analiza “me shumë mundësi nënvlerëson numrin e njerëzve të prekur nga temperaturat e larta në zonat urbane me popullsi të dendur”, thuhet në faqen e internetit të European Heat Tracker.

Lajme

Lazim Destani feston ditëlindjen, urimi i të birit Blerim emocionon ndjekësit

“Urime ditëlindjen, babë i dashur!” – mesazhi i aktorit të njohur për të atin

Sot është një ditë e veçantë për familjen Destani. Biznesmeni dhe filantropi i njohur shqiptar, Lazim Destani, feston ditëlindjen, ndërsa në këtë ditë të veçantë nuk ka munguar urimi i të birit, aktorit me famë ndërkombëtare, Blerim Destani.

Me një mesazh të shkurtër, por plot dashuri e emocion, Blerimi ka zgjedhur rrjetet sociale për t’ia uruar ditëlindjen të atit.

“Urime ditëlindjen, babë i dashur!”, ka shkruar aktori, duke e shoqëruar urimin me një fotografi të ngrohtë përkrah të atit.

Një urim i thjeshtë në fjalë, por që përcjell shumë për marrëdhënien e veçantë mes babait dhe të birit.

Lazim Destani prej vitesh është një nga emrat e njohur të diasporës shqiptare, i vlerësuar për aktivitetin e tij në biznes, por edhe për kontributin në iniciativa humanitare, sociale dhe në mbështetje të komunitetit shqiptar.

Lajme

Vrasja në Ksamil, gjykata lë në burg Sokrat Vatën: Çfarë u vendos për të arrestuarit e tjerë

Gjykata e Sarandës ka caktuar masat e sigurisë për personat e arrestuar pas ngjarjes së rëndë në Ksamil, ku humbi jetën një turist portugez.

Për autorin e dyshuar të vrasjes, Sokrat Vatën është caktuar masa e sigurisë “arrest në burg”.
Po ashtu me masën e arrestit me burg janë lënë edhe dy shtetasit turq, Ezgi Parlak dhe Nuh Mahmutoglu.

Për Ildi Cekanin dhe Ardit Kasemin është caktuar arresti në burg për një afat 45-ditor.
Ndërkohë, për Luciano Seferin, Moisi Matushajn, Romeo Shehun dhe Kristo Koshon është vendosur masa “detyrim për t’u paraqitur në policinë gjyqësore”.

Lajme

VANDALIZËM NË MALIN SHARR: Dëmtohen shtyllat që orientonin alpinistët

Shtyllat e shenjëzimit dimëror për orientim të vizitorëve në Malin Sharr janë dëmtuar. Këta shtylla janë vendosur në shtegun nga Kodra e Diellit deri tek Maja e Titos. Sipas kryetarit të Komunës së Bogovinës Feti Abazi, mbi 45 nga 112 shtyllat e vendosura janë dëmtuar, shkatërruar ose larguar. “Ky është një dëm i madh për një projekt të realizuar me mbështetjen e Ambasadave të Austrisë, Republikës Çeke dhe Sllovakisë, me pjesëmarrjen e vullnetarëve dhe bizneseve lokale nga Komuna e Bogovinës dhe Tetovës. Turizmi malor është një potencial i jashtëzakonshëm për zhvillimin e Komunës së Bogovinës. Prandaj, çdo akt vandalizmi dëmton jo vetëm një investim, por edhe përpjekjet tona për ta zhvilluar dhe promovuar Malin Sharr si destinacion turistik”, shkruan në reagimin e tij kryetari i Komunës së Bogovinës Feti Abazi.

Ka reaguar edhe Ambasada e Austrisë. Nga Ambasada theksojnë se dëmi nuk është vetëm financiar, pasi shkatërrimi i shënjimeve mund të rrezikojë drejtpërdrejt sigurinë e alpinistëve, veçanërisht gjatë kushteve të vështira dimërore me borë, mjegull, erëra të forta dhe dukshmëri të reduktuar. Ambasada pret që institucionet kompetente të zbardhin të gjitha rrethanat dhe të ndërmarrin masat e nevojshme ligjore ndaj personave përgjegjës. “Shënjimi i shtigjeve malore nuk është vetëm një shtyllë apo një shenjë. Në kushte me borë, mjegull dhe stuhi, ai mund të bëjë dallimin ndërmjet kthimit të sigurt dhe humbjes në mal”, thuhet në reagim.

Shënjimi i kësaj traseje, e gjatë rreth 11 kilometra, u vendos nga nëntori i vitit 2025 deri në fund të korrikut 2026, me pjesëmarrjen e më shumë se 25 vullnetarëve, të cilët investuan një angazhim të konsiderueshëm dhe orë pune në transportin dhe vendosjen e pajisjeve. Nga Parku Kombëtar “Mali Sharr” thonë se në kushtet e dimrit, shenjëzimi veror mbulohet nga bora, ndërsa në pjesë të caktuara shtegu dimëror devijon qëllimisht nga ai veror për shkak të rrezikut nga ortekët dhe rreziqeve të tjera. “Shtyllat janë të prodhuara për kushte të vështira malore dhe janë të shënuara me shenja shumë të dukshme me ngjyrë të kuqe dhe të verdhë, në mënyrë që të jenë të dallueshme edhe në borë, mjegull, gjatë natës dhe në kushte me dukshmëri të reduktuar. Kjo nuk është vetëm dëm material. Çdo shtyllë e hequr ose e shkatërruar nënkupton edhe humbjen e një pike orientimi, e cila në kushte të vështira dimërore mund të jetë vendimtare për sigurinë e alpinistëve”, thonë nga Parku Kombëtar “Mali Sharr”. Rasti është raportuar në Stacionin Policor. Më 19 gusht 2026, një ekip profesional i policisë, në prani të përfaqësuesve të Parkut Kombëtar Mali Sharr, ka kryer inspektim në terren dhe ka dokumentuar lokacionet ku është konstatuar dëmtimi dhe largimi i pajisjeve.

Shoqatat malore theksojnë se ky nuk është vetëm dëm material. “Pas pajisjeve të shkatërruara qëndron diçka shumë më e rëndësishme, pra mundi i njerëzve që punuan që Mali Sharr të jetë më i sigurt dhe më mirë i përgatitur për alpinistët dhe vizitorë”, thuhet mes tjerash në reagimin e shoqatave malore. (koha.mk)