Lajme

Vdekja e Agan Asanit, shoferi i makinës rezulton pozitiv në lëndë narkotike

Televizioni Alsat mëson ekskluzivisht se 25 vjeçari Fidan Salihi i cili më 28 maj e goditi për vdekje 13 vjeçarin Agan Asani në fshatin Çerkez të Kumanovës ka rezultuar pozitiv në lëndë narkotike. Analizat e specializuara laboratorike të bëra nga Departamenti për Ekspertiza Forenzike pran MPB-së kanë konstatuar se Fidan Salihi rezulton të jetë përdorues i lëndëve narkotike, përkatësisht përdorues i kanabisit.

Sipas burimeve të njëjta, në fund të qershorit, Departamenti i Forenzikës raportin e detajuar me analizat e të dyshuarit e ka nisur në Sektorin për Punë të Brendshme në Kumanovë. Nga aty akoma nuk ka një konfirmim nëse është pranuar dhe nëse po procedohet ose jo. Megjithëse pas pranimit të raportit, Departamenti i Komunikacionit duhet të ndërmerr masa për kualifikimin e veprës penale dhe dorëzimin e dëshmive pranë Prokurorisë Themelore Publike, ku më pas edhe duhet të caktohen masat e kujdesit ndaj të dyshuarit.

Nga rrethanat e deritanishme dhe mjetet e grumbulluara si prova materiale, duke përfshi edhe ekspertizat konkrete, rezulton se Agan Asani u godit nga 25 vjeçari në aksin e vjetër rrugorë Kumanovë-Shkup, përkatësisht në fshatin Çerkez pranë xhamisë së re. Aksidenti ka ndodhur më 28 maj në orën 21:06 minuta, ndërsa Salihi dyshohet të ketë drejtuar makinën të paktën tre fish mbi shpejtësinë e lejuar. Në aksin ku ka ndodhur aksidenti, duke pasur parasysh e së bëhet fjalë për vendbanim, shpejtësia e lejuar maksimale është 30km/h, ndërsa i dyshuari ka qenë me shpejtësi të paktën mbi 90 km/h, por kjo gjë akoma nuk është konfirmuar zyrtarisht dhe pritet të konfirmohet nga ekspertizat përkatëse gjyqësore. Në vendin e ngjarjes, pak metra nga lokacioni ku është goditur 13 vjeçari për vdekje, ka të vendosura tabela që kufizojnë shpejtësinë e lejuar me 30km/h, ndërsa paraprakisht ka edhe pengesa apo në gjuhën policore të njohura si “policë të shtrirë”.

Televizioni Alsat posedon incizimin i cili dëshmon momentin e goditjes për vdekje, por për shkak të ndjesës së hetimit, i njëjti nga ana jonë nuk do të publikohet. Agan Asani ndërroi jetë më 28 maj pak minuta pasi u godit për vdekje me makinë të cilën po e drejtonte Fidan Salihi.

Lajme

Lazim Destani feston ditëlindjen, urimi i të birit Blerim emocionon ndjekësit

“Urime ditëlindjen, babë i dashur!” – mesazhi i aktorit të njohur për të atin

Sot është një ditë e veçantë për familjen Destani. Biznesmeni dhe filantropi i njohur shqiptar, Lazim Destani, feston ditëlindjen, ndërsa në këtë ditë të veçantë nuk ka munguar urimi i të birit, aktorit me famë ndërkombëtare, Blerim Destani.

Me një mesazh të shkurtër, por plot dashuri e emocion, Blerimi ka zgjedhur rrjetet sociale për t’ia uruar ditëlindjen të atit.

“Urime ditëlindjen, babë i dashur!”, ka shkruar aktori, duke e shoqëruar urimin me një fotografi të ngrohtë përkrah të atit.

Një urim i thjeshtë në fjalë, por që përcjell shumë për marrëdhënien e veçantë mes babait dhe të birit.

Lazim Destani prej vitesh është një nga emrat e njohur të diasporës shqiptare, i vlerësuar për aktivitetin e tij në biznes, por edhe për kontributin në iniciativa humanitare, sociale dhe në mbështetje të komunitetit shqiptar.

Lajme

Vrasja në Ksamil, gjykata lë në burg Sokrat Vatën: Çfarë u vendos për të arrestuarit e tjerë

Gjykata e Sarandës ka caktuar masat e sigurisë për personat e arrestuar pas ngjarjes së rëndë në Ksamil, ku humbi jetën një turist portugez.

Për autorin e dyshuar të vrasjes, Sokrat Vatën është caktuar masa e sigurisë “arrest në burg”.
Po ashtu me masën e arrestit me burg janë lënë edhe dy shtetasit turq, Ezgi Parlak dhe Nuh Mahmutoglu.

Për Ildi Cekanin dhe Ardit Kasemin është caktuar arresti në burg për një afat 45-ditor.
Ndërkohë, për Luciano Seferin, Moisi Matushajn, Romeo Shehun dhe Kristo Koshon është vendosur masa “detyrim për t’u paraqitur në policinë gjyqësore”.

Lajme

VANDALIZËM NË MALIN SHARR: Dëmtohen shtyllat që orientonin alpinistët

Shtyllat e shenjëzimit dimëror për orientim të vizitorëve në Malin Sharr janë dëmtuar. Këta shtylla janë vendosur në shtegun nga Kodra e Diellit deri tek Maja e Titos. Sipas kryetarit të Komunës së Bogovinës Feti Abazi, mbi 45 nga 112 shtyllat e vendosura janë dëmtuar, shkatërruar ose larguar. “Ky është një dëm i madh për një projekt të realizuar me mbështetjen e Ambasadave të Austrisë, Republikës Çeke dhe Sllovakisë, me pjesëmarrjen e vullnetarëve dhe bizneseve lokale nga Komuna e Bogovinës dhe Tetovës. Turizmi malor është një potencial i jashtëzakonshëm për zhvillimin e Komunës së Bogovinës. Prandaj, çdo akt vandalizmi dëmton jo vetëm një investim, por edhe përpjekjet tona për ta zhvilluar dhe promovuar Malin Sharr si destinacion turistik”, shkruan në reagimin e tij kryetari i Komunës së Bogovinës Feti Abazi.

Ka reaguar edhe Ambasada e Austrisë. Nga Ambasada theksojnë se dëmi nuk është vetëm financiar, pasi shkatërrimi i shënjimeve mund të rrezikojë drejtpërdrejt sigurinë e alpinistëve, veçanërisht gjatë kushteve të vështira dimërore me borë, mjegull, erëra të forta dhe dukshmëri të reduktuar. Ambasada pret që institucionet kompetente të zbardhin të gjitha rrethanat dhe të ndërmarrin masat e nevojshme ligjore ndaj personave përgjegjës. “Shënjimi i shtigjeve malore nuk është vetëm një shtyllë apo një shenjë. Në kushte me borë, mjegull dhe stuhi, ai mund të bëjë dallimin ndërmjet kthimit të sigurt dhe humbjes në mal”, thuhet në reagim.

Shënjimi i kësaj traseje, e gjatë rreth 11 kilometra, u vendos nga nëntori i vitit 2025 deri në fund të korrikut 2026, me pjesëmarrjen e më shumë se 25 vullnetarëve, të cilët investuan një angazhim të konsiderueshëm dhe orë pune në transportin dhe vendosjen e pajisjeve. Nga Parku Kombëtar “Mali Sharr” thonë se në kushtet e dimrit, shenjëzimi veror mbulohet nga bora, ndërsa në pjesë të caktuara shtegu dimëror devijon qëllimisht nga ai veror për shkak të rrezikut nga ortekët dhe rreziqeve të tjera. “Shtyllat janë të prodhuara për kushte të vështira malore dhe janë të shënuara me shenja shumë të dukshme me ngjyrë të kuqe dhe të verdhë, në mënyrë që të jenë të dallueshme edhe në borë, mjegull, gjatë natës dhe në kushte me dukshmëri të reduktuar. Kjo nuk është vetëm dëm material. Çdo shtyllë e hequr ose e shkatërruar nënkupton edhe humbjen e një pike orientimi, e cila në kushte të vështira dimërore mund të jetë vendimtare për sigurinë e alpinistëve”, thonë nga Parku Kombëtar “Mali Sharr”. Rasti është raportuar në Stacionin Policor. Më 19 gusht 2026, një ekip profesional i policisë, në prani të përfaqësuesve të Parkut Kombëtar Mali Sharr, ka kryer inspektim në terren dhe ka dokumentuar lokacionet ku është konstatuar dëmtimi dhe largimi i pajisjeve.

Shoqatat malore theksojnë se ky nuk është vetëm dëm material. “Pas pajisjeve të shkatërruara qëndron diçka shumë më e rëndësishme, pra mundi i njerëzve që punuan që Mali Sharr të jetë më i sigurt dhe më mirë i përgatitur për alpinistët dhe vizitorë”, thuhet mes tjerash në reagimin e shoqatave malore. (koha.mk)