Lajme

Anketa e fundit: VMRO-DPMNE 4-1 para LSDM-së. Ja si qëndrojnë partitë shqiptare?

Nga 10 deri më 27 qershor, anketuesit e agjencisë Market Vision, me porosi të MKD.mk, zhvilluan një hulumtim të opinionit publik në Maqedoninë e Veriut, i cili tregoi se partia në pushtet VMRO-DPMNE dhe lideri i saj vazhdojnë të jenë bindshëm në epërsi sa i përket besimit të votuesve. Sipas këtij sondazhi, liderët e partisë së re politike VLEN gëzojnë më shumë besim krahasuar me liderin e partisë opozitare BDI.

Në pyetjen se për cilën parti politike do të votonin në zgjedhjet e ardhshme, përgjigjet e të anketuarve tregojnë se 20,5% do të votonin për VMRO-DPMNE, 6,2% për LSDM, 5% për BDI, 4,4% për VLEN, 2,9% për Levica dhe 1,5% për ZNAM.

Nëse veçohen rezultatet e partive vetëm te të anketuarit e përcaktuar (497 nga gjithsej 1.200), raporti i epërsisë së VMRO-DPMNE-së ndaj LSDM-së mbetet pothuajse i njëjtë. Ndërkohë, mbështetja për VLEN-in po i afrohet me shpejtësi popullaritetit që gëzon BDI-ja te votuesit shqiptarë në Maqedoninë e Veriut.

Edhe te liderët e partive politike, ashtu si në vitet e fundit, Hristijan Mickoski vazhdon të ketë një epërsi bindëse ndaj liderëve të tjerë. Izet Mexhiti dhe Bilall Kasami, si kryetarë të VLEN-it, gëzojnë një mbështetje më të madhe se Ali Ahmeti, lideri i BDI-së.

Edhe ky anketim tregoi se pagat, pensionet, papunësia dhe rritja e çmimeve mbeten problemet më të mëdha me të cilat përballen qytetarët e Maqedonisë së Veriut. Në vendin e dytë renditen sërish krimi dhe korrupsioni.

Ja si janë përgjigjur të anketuarit lidhur me nivelin e kënaqësisë së tyre ndaj punës së Prokurorit të ri Publik dhe të Prokurorisë Publike.

Mosbesimi ndaj sistemit të drejtësisë vazhdon të mbetet një nga problemet kryesore me të cilat përballet Maqedonia e Veriut.

Se qytetarët e Maqedonisë së Veriut mbeten fuqishëm të përkushtuar ndaj procesit të integrimit evropian, e tregon edhe përgjigjja pozitive në pyetjen për një anëtarësim të mundshëm të vendit në Bashkimin Evropian, duke pranuar edhe modelin për të cilin tashmë po diskutohet – anëtarësim pa të drejtë vetoje. Madje, 80,3% e të anketuarve do ta pranonin edhe një formë të tillë anëtarësimi.

Hulumtimi u realizua në periudhën 10–27 qershor mbi një mostër prej 1.200 të anketuarish, përfaqësuese sipas gjinisë, moshës, përkatësisë etnike, rajonit dhe llojit të vendbanimit, në përputhje me të dhënat e regjistrimit të popullsisë rezidente të vitit 2021.

Anketa u zhvillua me metodën CATI (Computer Assisted Telephone Interview), pra përmes intervistave telefonike, me një madhësi kampioni që siguron 95% interval besueshmërie dhe margjinë gabimi 3%.

Lajme

Lazim Destani feston ditëlindjen, urimi i të birit Blerim emocionon ndjekësit

“Urime ditëlindjen, babë i dashur!” – mesazhi i aktorit të njohur për të atin

Sot është një ditë e veçantë për familjen Destani. Biznesmeni dhe filantropi i njohur shqiptar, Lazim Destani, feston ditëlindjen, ndërsa në këtë ditë të veçantë nuk ka munguar urimi i të birit, aktorit me famë ndërkombëtare, Blerim Destani.

Me një mesazh të shkurtër, por plot dashuri e emocion, Blerimi ka zgjedhur rrjetet sociale për t’ia uruar ditëlindjen të atit.

“Urime ditëlindjen, babë i dashur!”, ka shkruar aktori, duke e shoqëruar urimin me një fotografi të ngrohtë përkrah të atit.

Një urim i thjeshtë në fjalë, por që përcjell shumë për marrëdhënien e veçantë mes babait dhe të birit.

Lazim Destani prej vitesh është një nga emrat e njohur të diasporës shqiptare, i vlerësuar për aktivitetin e tij në biznes, por edhe për kontributin në iniciativa humanitare, sociale dhe në mbështetje të komunitetit shqiptar.

Lajme

Vrasja në Ksamil, gjykata lë në burg Sokrat Vatën: Çfarë u vendos për të arrestuarit e tjerë

Gjykata e Sarandës ka caktuar masat e sigurisë për personat e arrestuar pas ngjarjes së rëndë në Ksamil, ku humbi jetën një turist portugez.

Për autorin e dyshuar të vrasjes, Sokrat Vatën është caktuar masa e sigurisë “arrest në burg”.
Po ashtu me masën e arrestit me burg janë lënë edhe dy shtetasit turq, Ezgi Parlak dhe Nuh Mahmutoglu.

Për Ildi Cekanin dhe Ardit Kasemin është caktuar arresti në burg për një afat 45-ditor.
Ndërkohë, për Luciano Seferin, Moisi Matushajn, Romeo Shehun dhe Kristo Koshon është vendosur masa “detyrim për t’u paraqitur në policinë gjyqësore”.

Lajme

VANDALIZËM NË MALIN SHARR: Dëmtohen shtyllat që orientonin alpinistët

Shtyllat e shenjëzimit dimëror për orientim të vizitorëve në Malin Sharr janë dëmtuar. Këta shtylla janë vendosur në shtegun nga Kodra e Diellit deri tek Maja e Titos. Sipas kryetarit të Komunës së Bogovinës Feti Abazi, mbi 45 nga 112 shtyllat e vendosura janë dëmtuar, shkatërruar ose larguar. “Ky është një dëm i madh për një projekt të realizuar me mbështetjen e Ambasadave të Austrisë, Republikës Çeke dhe Sllovakisë, me pjesëmarrjen e vullnetarëve dhe bizneseve lokale nga Komuna e Bogovinës dhe Tetovës. Turizmi malor është një potencial i jashtëzakonshëm për zhvillimin e Komunës së Bogovinës. Prandaj, çdo akt vandalizmi dëmton jo vetëm një investim, por edhe përpjekjet tona për ta zhvilluar dhe promovuar Malin Sharr si destinacion turistik”, shkruan në reagimin e tij kryetari i Komunës së Bogovinës Feti Abazi.

Ka reaguar edhe Ambasada e Austrisë. Nga Ambasada theksojnë se dëmi nuk është vetëm financiar, pasi shkatërrimi i shënjimeve mund të rrezikojë drejtpërdrejt sigurinë e alpinistëve, veçanërisht gjatë kushteve të vështira dimërore me borë, mjegull, erëra të forta dhe dukshmëri të reduktuar. Ambasada pret që institucionet kompetente të zbardhin të gjitha rrethanat dhe të ndërmarrin masat e nevojshme ligjore ndaj personave përgjegjës. “Shënjimi i shtigjeve malore nuk është vetëm një shtyllë apo një shenjë. Në kushte me borë, mjegull dhe stuhi, ai mund të bëjë dallimin ndërmjet kthimit të sigurt dhe humbjes në mal”, thuhet në reagim.

Shënjimi i kësaj traseje, e gjatë rreth 11 kilometra, u vendos nga nëntori i vitit 2025 deri në fund të korrikut 2026, me pjesëmarrjen e më shumë se 25 vullnetarëve, të cilët investuan një angazhim të konsiderueshëm dhe orë pune në transportin dhe vendosjen e pajisjeve. Nga Parku Kombëtar “Mali Sharr” thonë se në kushtet e dimrit, shenjëzimi veror mbulohet nga bora, ndërsa në pjesë të caktuara shtegu dimëror devijon qëllimisht nga ai veror për shkak të rrezikut nga ortekët dhe rreziqeve të tjera. “Shtyllat janë të prodhuara për kushte të vështira malore dhe janë të shënuara me shenja shumë të dukshme me ngjyrë të kuqe dhe të verdhë, në mënyrë që të jenë të dallueshme edhe në borë, mjegull, gjatë natës dhe në kushte me dukshmëri të reduktuar. Kjo nuk është vetëm dëm material. Çdo shtyllë e hequr ose e shkatërruar nënkupton edhe humbjen e një pike orientimi, e cila në kushte të vështira dimërore mund të jetë vendimtare për sigurinë e alpinistëve”, thonë nga Parku Kombëtar “Mali Sharr”. Rasti është raportuar në Stacionin Policor. Më 19 gusht 2026, një ekip profesional i policisë, në prani të përfaqësuesve të Parkut Kombëtar Mali Sharr, ka kryer inspektim në terren dhe ka dokumentuar lokacionet ku është konstatuar dëmtimi dhe largimi i pajisjeve.

Shoqatat malore theksojnë se ky nuk është vetëm dëm material. “Pas pajisjeve të shkatërruara qëndron diçka shumë më e rëndësishme, pra mundi i njerëzve që punuan që Mali Sharr të jetë më i sigurt dhe më mirë i përgatitur për alpinistët dhe vizitorë”, thuhet mes tjerash në reagimin e shoqatave malore. (koha.mk)