Lajme

Toshkovski: Nuk mund të telefononi më askënd për t’ju hequr dënimin!

Ministri i Punëve të Brendshme Pançe Toshkovski në prezentimin e 100-ditëshit të qeverisë paralajmëroi se do të hapet shkollë e re e mesme policore, e cila siç tha ai u shfuqizua në vitin 2000. Ai tha se intensivisht po punohet në rikonstruimin e Qendrës për Trajnime në Idrizovë, ku do të jetë shkolla dhe aktualisht janë duke u investuar mbi 3 milionë euro.

PANÇE TOSHKOVSKI MINISTËR I PUNËVE TË BRENDSHME

“Po paralajmëroj shkollën e re të mesme të policisë. Pas vitit të parë dhe të dytë të arsimit të mesëm, policët e ardhshëm do të mund të kalojnë vitin e tretë dhe të katërt në shkollën e mesme të policisë. Përvoja jonë tregon se kapaciteti profesional i policëve që janë shkolluar në shkollë të mesme është shumë më i lartë dhe shumë më i madh në krahasim me të tjerët”.

Toshkovski, i pyetur për numrin e shqiptarëve në poste drejtuese në MPB, tha se për të asnjëherë nuk ka pasur rëndësi përkatësia etnike por profesionalizmi. Ai gjithashtu shpalli shifra konkrete për përfaqësimin etnik në MPB.

PANÇE TOSHKOVSKI MINISTËR I PUNËVE TË BRENDSHME

“Në kuadër të shërbimeve Drejtuese në Shkup, 51,96 % janë maqedonas, 39,37 % janë shqiptarë dhe 8,67 % janë të nacionaliteteve tjera. Në Tetovë ka 23,6 % maqedonas, 66,29 % shqiptarë, në Kumanovë 52,83 % maqedonas, 45,28 % shqiptarë dhe 1,89% të nacionaliteteve tjera. Duhet të fokusohemi te profesionalizmi për të mirën e popullit”.

Toshkovski duke folur për projektin “Safe City”, apo kamerat e vendosura nëpër rrugë tha se një nga arsyjet për vendosjen e kamerave është siguria. Ai potencoi se shifrat e viktimave që humbin jetën nga aksidente janë alarmante dhe kryesisht ata janë të gjithë të rinjë. Ndërkaq e dyta siç tha ai është se ata që do ta shkelin ligjin do të kapen më lehtë dhe nuk kanë më mundësi të telefonimit për shlyerje të dënimit.

Lidhur me aplikacionet kompujterike si rastet e fundit, ku janë mashtruar qytetarët me investime në para, ai tha se momentalisht nuk është ngritur asnjë kallëzim penal zyrtar, por shprehu shqetësim të madh dhe tha se raste të tilla kanë ndodhur disa herë.

Toshkovski këshilloi qytetarët që të kenë kujdes për këto lloj investimesh, të konsultohen me ekspertë të fushës dhe t’i drejtohen Ministrisë së Brendshme.

Lajme

Ahmeti: Deklaratat e Kurtit për gjuhën shqipe u përdorën nga antishqiptarët, më gërryente në shpirt

Kryetari i Bashkimi Demokratik për Integrim, Ali Ahmeti, ka folur lidhur me statusin e gjuhës shqipe në Maqedonia e Veriut.

Në Debat Plus, Ahmeti tha se qëndrimet e kryeministrit të Kosovës, Albin Kurtit kanë ndikuar në “delegjitimimin” e kërkesave të shqiptarëve dhe i kanë dhënë argumente politike kryeministrit të Maqedonisë së Veriut, Hristijan Mickoski.

Kurti: S’po rrezikohet gjuha shqipe në Maqedoni të Veriut, pasi s’ka qenë kurrë gjuhë zyrtare

Sipas tij, edhe deklarimet se gjuha shqipe nuk ka qenë gjuhë zyrtare kanë krijuar një situatë shqetësuese, duke u përdorur nga qarqe antishqiptare.

Ahmeti u shpreh se kjo ka ndikuar negativisht në të drejtat dhe përfaqësimin e shqiptarëve, duke theksuar se “gjuha po kontestohet dhe nuk përdoret më si më parë në institucione”.

“Që ne na delegjitimoi dhe që u dha argument Kristian Mickoskit dhe fuqi politike, që kryeministri po i mbështesë ata forca politike. Kryeministri i Kosovës po del dhe thotë se gjuha shqipe kurrë s’ka qenë zyrtare. Dhe javë të tëra antishqiptarët më të mëdhenj, e vendosnin në ekran kryeministrin e Kosovës, që mua më gërryente në shpirt, ja kryeministri i Kosovës thotë që gjuha shqipe s’ka qenë zyrtare dhe nuk është.

Ishte kryeministri i Kosovës që shqiptarëve këtu ua hoqi të drejtën legjitime, legjitimitetin… kjo me ka brengosur nga kryeministrit. Sepse i tërë devalvimi i situatës këtu, asnjë hap prapa nuk ka shkuar. Që dy vjet këtu nga një hap shkohet. Kontestohet gjuha, dhe nuk përdoret më, siç është përdorur nëpër institucione. Përfaqësimi i drejtë është heq”, ka thënë Ahmeti.

Këto komente vijnë në një kohë kur debati për gjuhën shqipe është intensifikuar në Maqedoninë e Veriut, pas protestave të studentëve shqiptarë në Shkup, të cilët kërkojnë që provimet profesionale të mund të mbahen edhe në gjuhën shqipe, në përputhje me legjislacionin ekzistues.

Lajme

Ministri izraelit i Mbrojtjes: Lufta me Iranin mund të rifillojë “së shpejti”

Ministri i Mbrojtjes i Izraelit, Israel Katz, ka paralajmëruar se lufta me Iranin mund të rifillojë “së shpejti”, transmeton Anadolu.

“Është e mundur që së shpejti të na duhet të veprojmë përsëri për të siguruar arritjen e objektivave”, tha Katz gjatë një aktiviteti ushtarak në selinë e Ministrisë së Mbrojtjes në Tel Aviv.

“Irani ka pësuar goditje jashtëzakonisht të rënda gjatë vitit të kaluar, goditje që e kanë kthyer vite prapa në të gjitha fushat”, shtoi ai në deklaratat e tij të raportuara nga gazeta Yedioth Ahronoth.

Kërcënimet izraelite për një rifillim të mundshëm të sulmeve ndaj Iranit shihen nga vëzhguesit si pjesë e përpjekjeve për të shtyrë SHBA-në drejt një veprimi të ri ushtarak.

Javën e kaluar, Katz tha se Izraeli po pret një “dritë jeshile” nga SHBA-ja për të rifilluar luftën kundër Iranit.

Sipas Axios, Komanda Qendrore e SHBA-së (CENTCOM) ka përgatitur plane që mund të përfshijnë sulme ndaj infrastrukturës iraniane, si dhe opsione më të gjera si rritja e presionit detar në Ngushticën e Hormuzit.

Propozimet thuhet se synojnë ta detyrojnë Iranin të kthehet në negociata me më shumë fleksibilitet, veçanërisht për çështjen bërthamore.

SHBA-ja dhe Izraeli nisën sulme ndaj Iranit më 28 shkurt, duke nxitur kundërpërgjigje nga Teherani ndaj aleatëve të SHBA-së në Gjirin Persik dhe duke mbyllur Ngushticën e Hormuzit.

Një armëpushim u shpall më 8 prill përmes ndërmjetësimit të Pakistanit, i ndjekur nga bisedime në Islamabad më 11 prill, por nuk u arrit marrëveshje. Presidenti amerikan, Donald Trump, më vonë e zgjati armëpushimin pa një afat të ri, me kërkesë të Pakistanit.

Lajme

Qeveria: Ulja e çmimeve të karburanteve vazhdon deri më 18 maj

Qeveria informon opinionin se, pas diskutimeve me kompaninë OKTA dhe me qëllim të zbutjes së presioneve të çmimeve mbi qytetarët dhe ekonominë, zbritja e karburanteve vazhdon deri më 18 maj 2026.

Kjo është një masë që siguron ulje të çmimeve me pakicë, me zbritjen që arrin në 3 denarë për litër për naftën dhe 2 denarë për litër për benzinat me 95 dhe 98.

Nga Qeveria thonë se mbesin të përkushtuar për të marrë masa në kohë dhe efektive për të mbrojtur standardet e jetesës së qytetarëve, veçanërisht përballë një krize çmimesh të importuara dhe sfidave globale të energjisë.

“Në koordinim me institucionet kompetente dhe operatorët ekonomikë, ne do të vazhdojmë të monitorojmë situatën dhe të reagojmë në përputhje me rrethanat, me qëllim sigurimin e stabilitetit dhe parashikueshmërisë në treg. Kujdesi për qytetarët dhe mbështetja e ekonomisë mbeten përparësia jonë kryesore”, njoftojnë nga Qeveria.