Lajme

Arrestohet shtetasi i Maqedonisë në hyrje të Kosovës me 16 mijë franga të falsifikuara

Një rast serioz i falsifikimit të parasë është zbuluar nga autoritetet doganore dhe policore në Pikën Kufitare të Hanit të Elezit, ku është sekuestruar një sasi e konsiderueshme e monedhave të falsifikuara të valutës zvicerane, raporton Gazeta Sinjali.

Burime të sigurta brenda hetuesisë bëjnë me dije se më 12 korrik 2025, rreth orës 21:15, në hyrje të Kosovës ka hyrë një veturë Audi A2, ngjyrë e gjelbër metalike, e cila drejtohej nga S.Xh, rreth 44-vjeçar shtetas i Maqedonisë së Veriut.

Fillimisht, zyrtarët kufitarë dhe doganorë kanë bërë kontrollin e dokumentacionit, ndërsa vetura është selektuar për kontroll të detajuar në vijën e dytë. Pasi i dyshuari kishte deklaruar se nuk posedonte asgjë për të raportuar, gjatë kontrollit nën ulëset e përparme janë gjetur 16 qese me monedha metalike të dyshuara të falsifikuara – gjithsej 8,076 copë, me vlerë të deklaruar dy franga për secilën, për një shumë totale mbi 16 mijë franga zvicerane.

Në vendin e ngjarjes ka dalë njësia e hetimeve rajonale nga DRPK Lindje – Kaqanik, ku pas verifikimeve të para, është konstatuar dyshimi për veprën penale “Falsifikim i parasë”.
Me urdhër të Prokurorit për Krime të Rënda, i dyshuari është arrestuar dhe është dërguar në mbajtje për 48 orë, ndërsa vetura dhe monedhat e falsifikuara janë sekuestruar.

Rasti është proceduar tutje tek Njësia e Hetimeve Rajonale për veprime të mëtejme hetimore.

Lajme

Unioni i Shoqatave Shqiptare në Mërgim shpërndan 6 mijë litra ujë për banorët e Gostivarit

Unioni i Shoqatave Shqiptare të Gostivarit në Mërgim ka realizuar sot një aksion humanitar për shpërndarjen e ujit të pijshëm për banorët e komunës së Gostivarit, në kushte të mungesës së ujit.

Gjatë aksionit u shpërndanë 6 mijë litra ujë, të paketuar në 600 bidonë, në afërsi të tregut të madh të qytetit, me synimin që ndihma të arrijë edhe te banorët e lagjeve më të largëta.

Në kumtesën e Unionit thuhet se aksioni nuk synon ta zgjidhë problemin me furnizimin me ujë, por të ofrojë mbështetje për qytetarët në këtë situatë.

“Jemi të vetëdijshëm se me këtë aksion nuk do ta zgjidhim problemin me ujin në Gostivar, por dëshmojmë se jemi krah i Gostivarit dhe i vëllezërve tanë në këto ditë të vështira të mungesës së ujit për pije”, thuhet në kumtesën e Unionit.

Unioni falënderoi ekipin, shoqatat anëtare, vullnetarët dhe donatorët që kontribuan në realizimin e aksionit.

Lajme

6 ditë pas stuhisë, Shkupi ende i mbuluar nga pemët rrëzuara

Ndonëse sot është dita e gjashtë prej kur Shkupi u përfshi nga një stuhi e fuqishme me erë prej 130 km/h, autoritetet komunale ende nuk kanë arritur të mënjanojnë dëmet. Nëpër rrugë e parqe gjithandej, pemët dhe degët e thyera vazhdojnë të pengojnë lëvizjen e lirë të qytetarë.

Komunat më të goditura nga stuhia ishin Karposhi, Çairi, Aerodromi dhe Qendra. Alsat vizitoi edhe sot disa parqe dhe rrugë të Çairit. Në shumë vende përsëri hasëm në degë të thyera. Disa prej tyre ishin grumbulluar në një vend, e të tjera ishin ashtu si kanë mbetur nga dita e martë.

“Ndonëse kanë kaluar gati një javë që nga dita kur stuhi e fuqishme goditi Qytetin e Shkupit, gjithandej nëpër bulevarde dhe parqe shohim se degët nga drunjtë e thyer ende kanë mbetur të pa pastruara”, raporton Zekirija Haxhiu, gazetar.

Drunjtë e rrëzuar dhe degët e thyera, nga stuhia lanë pas vetes shumë vetura e oborre të dëmtuara. Dhjetëra qytetarë nga komuna të ndryshme, kanë paraqitur dëmet tek autoritetet lokale dhe presin komisionet që të bëjnë vlerësimin e tyre.

Lajme

Bastisje në Shkup, arrestohet një 23-vjeçar nga fshati Brezë

Një 23-vjeçar nga fshati Brezë i Shkupit është arrestuar pasi gjatë një bastisjeje në shtëpinë dhe objektet e tij ndihmëse është gjetur një sasi e konsiderueshme kokaine.

Sipas njoftimit të Ministrisë së Punëve të Brendshme, bastisja është kryer nga zyrtarët e Njësisë për Luftimin e Trafikimit të Paligjshëm në bashkëpunim me Njësinë e Policisë Intervenuese pranë SPB Shkup.

“Personi S.B. (23) është privuar nga liria në Stacionin Policor Gazi Babë sipas nenit 215 të Kodit Penal dhe, pas dokumentimit të plotë të rastit, ndaj tij do të parashtrohet kallëzimi përkatës”, thuhet në njoftimin e MPB-së.