Lajme

Për të tretën ditë me radhë Kumanova dhe Likova mbeten pa ujë për pije

Pas reshjeve të mëdha të breshëritë që e përfshinë rajonin e Kumanovës dhe Likovës për të tretën ditë me radhë, kumanovarët nuk mund ta shfrytëzojnë ujin për pije. Shumica e banorëve me ujë të pijshëm furnizohen nga dyqanet, por thonë se ka edhe nga ata që pinë ujin e çezmës pasi ta kenë vluar.

“Jemi duke blerë ujë. Cila ditë me radhë është kjo? E treta…Disa e vlojnë, disa nuk e vlojnë. Ne më së shumti prej bojlerit e përdorim për me pastru enë, ndërsa për ta pirë nuk e pimë”, tha një banor.

“Jo njëherë jo, akoma. Po blejmë ujë nëpër shitore, por këtë ujë akoma nuk po e përdorin derisa të na thonë që ta përdorim… Është pak si vështirë, për ta pirë, se për të larë prapë më mirë”, u shpreh një tjetër banor.

“Është vështirë por çfarë të bëjmë, nuk kemi zgjidhje tjetër. Po blejmë ujë prej shitores, nëse nuk na lënë me pi, duhet të përdorim atë që e shesin në shitore. -Çfarë u kërkoni autoriteteve? Sa më shpejtë me rregulla situatën”, theksoi një banor.

“Jo, tashmë tre ditë po pimë ujë të blerë”, u shpreh një tjetër banor.

“Jo nuk jemi duke e përdorë. Po blejmë, me të blerë. Kumanova dhe rrethi i Kumanovës që e shfrytëzojnë këtë ujë, nuk kanë për pije po thonë, tani ne nuk kemi çfarë bëjmë, duhet patjetër të blejmë”, theksoi një banor.

Nga ndërmarrja publike për ujësjellës po presin të përfundojnë analizat e nevojshme nga Qendra e Shëndetit Publik, ku në rast se ato rezultojnë pozitive, presin që uji të jetë i pijshëm nga e marta eventualisht e mërkura e javës së ardhshme.

“Sipas udhëzimeve të shtabit të krizës, pranë komunës së Kumanovës, që uji të mund të shfrytëzohet për pije, duhet që Qendra e Shëndetit Publik të merr 3 herë mostra nëpër lokacione të ndryshme prej komunës së Kumanovës. Nëse të gjitha rezultatet dalin pozitive, të mira, Qendra për Shëndet Publik, eventualisht të martën ose të mërkurën mund të jep pajtueshmëri që uji të jetë i pijshëm”, deklaroi Oliver Stojmanovski, N.P “Ujësjellësi” Kumanovë.

Lajme

27 vjet nga marrëveshja e Kumanovës

Sot bëhen 27 vjet nga nënshkrimi i marrëveshjes ushtarako-teknike të Kumanovës, me të cilin iu dha fund luftës në Kosovë, duke u dorëzuar ish-ushtria e Jugosllavisë dhe kapitullimi i kriminelit Sllobodan Millosheviq.

Me këtë marrëveshje, Serbia është detyruar të tërheqë të gjitha forcat e saj policore dhe ushtarake nga Kosova. Marrëveshjen e Kumanovës, ndërmjet NATO-s dhe RFJ-së, e nënshkruar më 9 qershor 1999, hyri në fuqi më 11 qershor 1999. Atë e nënshkruan Michael Jackson, komandanti i parë i KFOR-it në Kosovë, dhe ish-shefi i Shtabit të Armatës serbe, gjenerali Nebojsha Pavkoviq, i akuzuari i Hagës për krime lufte dhe gjenocid.

Marrëveshja është arritur pas fushatës së bombardimeve të NATO-s mbi caqet serbe, e cila ka zgjatur për 78 ditë me radhë, si dhe pas përpjekjeve të ndryshme diplomatike për t’i dhënë fund luftës në Kosovë, gjatë të cilës mbi 10 mijë njerëz janë vrarë, rreth 5 mijë të tjerë të zhdukur dhe mbi 1 milion shqiptar të zhvendosur. Shkatërrimet materiale po ashtu kanë qenë masive.

Ndër të tjera në marrëveshje parashihej:

c) që nga Kosova të largohen të gjithë personat dhe organizatat me aftësi militare duke përfshirë armatën e rregullt dhe forcat e marinës, civilë të armatosur, paramilitarë, forcat ajrore, garda kombëtare, policia kufitare, rezervistët, policia ushtarake, shërbimet informative, MUP-it, policia lokale, speciale, antirebeliste, antiterroriste dhe çdo grup i përcaktuar kështu nga KFOR-i.

d) u caktua një zonë sigurie ajrore 25 kilometra përtej kufirit të Kosovës

e) u caktua një zonë 5 kilometrash përtej kufirit me RFJ-në që nuk guxonte të vendosen armatimet e rënda dhe ushtria, përveç ushtarët kufitarë.

Më 12 qershor të vitit 1999, në Kosovë kanë zbarkuar trupat e para të këmbësorisë së NATO-s, ndërsa ka nisur largimi i forcave serbe.

Sekretari i përgjithshëm i NATO-së, Havijer Solana, më 10 qershor 1999 kishte lëshuar urdhrin për ndalimin e bombardimit dhe Këshilli i Sigurisë së OKB-së miratoi rezolutën 1244, ku u dërguan 37.200 ushtarë të KFOR-it nga 36 shtete.

Misioni ishte i ndarë në pesë zona të përgjegjësisë, që i përkisnin KFOR-it amerikan, anglez, francez, gjerman dhe italian.

Me hyrjen e NATO-s, në Kosovë ka nisur edhe vendosja e misionit të përkohshëm të Organizatës së Kombeve të Bashkuara, i cili do të administronte vendin për një periudhë të caktuar kohore.

Në të njëjtën kohë, është shpërbërë edhe Ushtria Çlirimtare e Kosovës, për t’u shndërruar në Trupat Mbrojtëse të Kosovës.

Lajme

Mbi 1,600 gra të lindura në Maqedoni të Veriut lindën foshnje në Gjermani vitin e kaluar

Numri i përgjithshëm i shtetasve të RMV-së të regjistruar si të huaj që jetojnë në Gjermani deri në dhjetor të vitit të kaluar ishte 161.120, që është 2.000 më shumë se në vitin 2024, kur ky numër ishte 158.995.

Nga viti 2015 deri në vitin 2025, numri i qytetarëve të RMV të regjistruar si të huaj në Gjermani është rritur me më shumë se 65,000.

Statistikat tregojnë se vetëm vitin e kaluar në Gjermani kanë lindur 1.620 të porsalindur, të cilët, sipas klasifikimit statistikor gjerman, kanë nëna që kanë lindur në Maqedoni të Veriut.

Gjermania mbetet një nga destinacionet më të dëshirueshme për qytetarët e RMV-së që kërkojnë mundësi më të mira ekonomike, të ardhura më të larta dhe një të ardhme më të sigurt për fëmijët e tyre. Mijëra qytetarë të RMV-së janë zhvendosur atje vitet e fundit dhe disa prej tyre tashmë po krijojnë familje dhe po bëhen prindër, gjë që kontribuon në rritjen e numrit të fëmijëve të lindur në maternitetet gjermane nga prindër me origjinënga RMV-ja.

Lajme

Pesëvjeçari nga Gostivari u helmua me barna, dërgohet në Klinikën e Pediatrisë

Më 8 qershor 2026, rreth orës 18:40, në Stacionin Policor të Gostivarit është raportuar se në Repartin e Pediatrisë ishte pranuar një fëmijë pesëvjeçar nga fshati Çegran, i cili kishte pësuar helmim nga barnat.

Sipas informacioneve fillestare, fëmija ka rënë në kontakt me barna të lëna në një vend të arritshëm dhe i ka gëlltitur ato. Pas marrjes së ndihmës së parë mjekësore, ai është transportuar në Klinikën e Fëmijëve në Shkup për trajtim dhe ekzaminime të mëtejshme.

“Më 08.06.2026 në ora 18:40 në Stacionin Policor Gostivar është
raportuar se në Repartin e Pediatrisë, për shkak të helmimit me barna,
është sjellë një fëmijë pesëvjeçar nga fshati Çegran i Gostivarit. Sipas
raportimit, fëmija ka rënë në kontakt me barna që ishin lënë në një vend
të arritshëm dhe i ka gëlltitur ato. Fëmija është transportuar në Klinikën
e Fëmijëve në Shkup për kujdes dhe ekzaminime të mëtejshme”, thuhet në njoftimin e policisë.