Sport

Shkëndija prezanton sulmuesin Liridon Latifin

Shkëndija ka prezantuar këtë të shtune sulmuesin, Liridon Latifin. Kuqezinjtë me 30 vjeçarin kanë firmosur kontratë një vjeçare me opsion rinovimi edhe për një vit tjetër.

“Të jesh pjesë e Shkëndijës është nder. Gjithë karrierën kam luajtur për të dalë kampion, diçka që kërkohet gjithmonë edhe nga Shkëndija. Këtu ka një grup shumë të mirë të lojtarëve, shumë kualitet dhe shpresoj që edhe unë si një forcë shtesë të ndihmoj Shkëndijën të dalim kampion”, u shpreh mes tjerash Liridon Latifi.

Ky i fundit gjatë karrierës së tij ka luajtur për Flamurtarin dhe Prishtinën në Kosovë, Skënderbeun dhe Kukësin në Shqipëri, para se të transferohej në Pushkash në Hungari dhe Sherif Tiraspol në Moldavi. Pas rikthimit në futbollin shqiptar përmes Vllaznisë së Shkodrës, sezonin e kaluar Latifi u aktivizua me Tiranën, ndërkohë kjo do të jetë eksperienca e parë në futbollin e Maqedonisë. Kujtojmë se në nivel ndërkombëtar, Latifi ka përfaqësuar Shqipërinë në kategoritë e moshave dhe ka regjistruar 5 paraqitje zyrtare me Kombëtaren A të Shqipërisë, teksa gjithashtu ka dy paraqitje në fazën e grupeve të Liga Europës me Skenderbeun e Korçës.

Lajme

Pëson lëndim të rëndë, Shkëndija mbetet pa Drilon Islamin

Ndeshja përballë Shkëndijës së Haraçinës ka rezultuar fatale për mesfushorin e Shkëndijës së Tetovës, Drilon Islami, i cili pësoi një lëndim të rëndë pas një përplasjeje në fushë.

Nga skuadra tetovare sot përmes një komunikate kanë bërë të ditur se mesfushori i tyre ka thyer klavikulën e krahut të djathtë, ku kosovari u detyrua ta braktisë lojën dhe u transportua me ambulancë në spital në duelin e zhvilluar në Çair.

Shkëndija bënë të ditur se për momentin, ekipi mjekësor ende nuk ka vendosur nëse trajtimi do të kërkojë ndërhyrje kirurgjikale apo nëse rehabilitimi do të realizohet përmes terapisë.

Megjithatë, ajo që është e sigurt është se Islamin e pret një periudhë më e gjatë jashtë terreneve sportive, duke qenë një mungesë e rëndësishme për skuadrën tetovare./Sportmania/

Lajme

Mbrëmja e “Duelit Sportiv” përfundon me incident në mes të Liridon Lecit dhe Edonisa Aliut

Televizioni Dukagjini ka njoftuar ndërprerjen e menjëhershme të bashkëpunimit me panelistin Liridon Leci, pas një incidenti që ka ndodhur të dielën mbrëma, pas përfundimit të emisionit “Dueli Sportiv”.

Sipas reagimit të televizionit, incidenti ka ndodhur mes Lecit dhe mysafires së emisionit, ish-futbollistes Edonisa Aliu.

Drejtori i Informacionit në TV Dukagjini, Dibran Istrefi, ka bërë të ditur përmes një njoftimi në rrjetin social Facebook, se vendimi është marrë pas shqyrtimit të rrethanave të rastit.

Televizioni ka theksuar se situata të tilla janë të papranueshme, ndërsa ka bërë të ditur se me rastin po merren organet e rendit dhe të drejtësisë.

TV Dukagjini ka shprehur gatishmërinë për bashkëpunim të plotë me organet përkatëse, të cilat pritet të sqarojnë rrethanat e incidentit.

Lajme

“Ballistët” formojnë strukturën e re organizative!

Tifogrupi i Shkëndijës ka formuar sonte strukturën e re organizative, pas mbledhjes së mbajtur më 4 tetor. Kryesia e ngushtë do të përbëhet nga 6 anëtarë, ndërsa për kryetar është zgjedhur Shaban Zeneli.

Kryesia e re do të ketë përkrahjen edhe të një grupi punues, i cili do të funksionojë si strukturë më e gjerë në mbështetje të kryesisë dhe tifogrupit.

Organizimi i parë i këtij kapitulli të ri do të jetë të dielën, më 11 tetor, në udhëtimin për ndeshjen Shkëndija e Haraçinës – Shkëndija, që do të zhvillohet në stadiumin e Çairit.