Lajme

Mbi 100 punonjës të spitalit të Tetovës pa paga

Mbi 100 të punësuar në Spitalin Klinik të Tetovës kanë mbetur pa paga për dy muaj rresht, një problematikë kjo e përsëritur në këtë institucion shëndetësor. Të punësuarit, të cilët kanë ngritur shqetësimet e tyre në disa media, refuzojnë të dalin publikisht për shkak të frikës nga rritja e presionit mbi ta. Pavarësisht se nuk kanë marrë asnjë pagesë, ata vazhdojnë të ofrojnë shërbime për qytetarët, ndërsa kontratat e tyre kanë skaduar tashmë për gati dy muaj.

Për këtë çështje, kemi kontaktuar udhëheqësinë e Spitalit të Tetovës, ku drejtori Agim Berisha refuzoi të fliste para kamerës. Megjithatë, në një deklaratë të shkurtër për Klan Maqedoni, ai pohoi se nuk ka vonesë në procesin e rinovimit të kontratave, duke shtuar se ato janë në shqyrtim dhe pritet të nënshkruhen së shpejti.

“Nuk ka vonesë në procesin e kontratave, ato janë në shqyrtim dhe besoj se në ditët në vijim do të nënshkruhen. Kemi bërë një kërkesë drejt Ministrisë së Shëndetësisë për rritjen e numrit të mjekëve për të siguruar funksionimin e plotë të spitalit,” deklaroi drejtori Berisha.

Megjithatë, ky problem nuk është i izoluar, pasi ankesat për vonesat në paga dhe mungesën e rinovimit të kontratave janë bërë të zakonshme në institucionet publike shëndetësore në Maqedoninë e Veriut. Kjo situatë ngrit pyetje serioze mbi qëndrueshmërinë e sistemit shëndetësor, efektet e mundshme në cilësinë e shërbimeve mjekësore, dhe mbi përgjegjësinë institucionale për të siguruar kushte pune të drejta për punonjësit e sektorit shëndetësor.

Kërkesat për më shumë personel mjekësor vijnë në një kohë kur spitali po përballet me një rritje të numrit të pacientëve, gjë që mund të ndikojë në cilësinë e shërbimeve të ofruara. Mangësitë në staf dhe problemet me pagat mund të çojnë në përkeqësimin e gjendjes në këtë institucion, duke vënë në rrezik shëndetin e pacientëve dhe moralin e punonjësve.

Në këtë drejtim, kërkohet një zgjidhje e shpejtë dhe efektive nga ana e institucioneve përkatëse, duke përfshirë Ministrinë e Shëndetësisë, për të stabilizuar situatën dhe për të siguruar që të drejtat e punonjësve të respektohen, ndërsa spitali vazhdon të funksionojë në përputhje me nevojat e qytetarëve. /tvklan.mk/

Lajme

Mexhiti uron Kurtin për fitoren: Kosova sot votoj për vazhdimësi dhe besim në rrugën e nisur

Bashkëkryetari i partisë VLEN, Izet Mexhiti, ka deklaruar se fitorja e VV-së, është një konfirmim i qartë i besimit të qytetarëve të Kosovës në drejtimin politik të vendit.
“Urime për këtë rezultat dhe për vazhdimin e mandatit të ri, miku im, kryeministër Albin Kurti. Kjo fitore është shenjë e qëndrueshmërisë së vullnetit demokratik dhe e vazhdimësisë së një agjende qeverisëse që ka marrë mbështetje të gjerë.
Kosova sot e ka dhënë mesazhin e saj qartë. Ka votuar për vazhdimësi dhe besim në rrugën e nisur.
Urime Kosovë!”, ka shkruar Mexhiti.

Lajme

Abdixhiku: Shënojmë rritjen më të madhe! Kemi fituar 20 deputetë

Kandidati i LDK-së për kryeministër, Lumir Abdixhiku në konferencën për media u shpreh se Kosova edhe njëherë dëshmoi prekuri demokratike.

Për këtë gjë bëri një falënderim për të gjithë qytetarët dhe siç u shpreh, në veçanti votuesit e LDK-së.

“Kosova dëshmoi edhe njëherë pjekuri demokratike. Për këtë meritoni një falënderim qytetarë. Falënderim të veçantë dua t’u bëj edhe institucioneve përgjegjëse. Dua t’i falënderojë mbështetësit dhe votuesit e Lidhjes Demokratike të Kosovës”, tha ai.

Abdixhiku, për rezultatet e këtyre zgjedhjeve tha se LDK-ja sonte shënon rritjen më të madhe që ndonjë subjekt politik ka siguruar në këto zgjedhje.

“Lidhja Demokratike e Kosovës sonte shënon rritjen më të madhe që një subjekt politik ka siguruar në këto palë zgjedhje. Në vetëm një muaj fushatë, me kaq pak kohë, LDK-ja ka kaluar nga 13 për qind, në 18 për qind, përkatësisht në 20 mandate”, tha ai.

Lajme

Osmani: VV-ja s’e ka asnjë arsye ta refuzojë emrin tim për presidente

Kandidatja për presidente nga radhët e LDK-së, Vjosa Osmani, tha se Lëvizja Vetëvendosje nuk ka fare arsye që ta refuzojë atë që ta rimarrë këtë post.

Këto fjalë i tha në adresimin e parë për media pas daljes së rezultateve preliminare të zgjedhjeve të parakohshme parlamentare.

“Lëvizja Vetëvendosje nuk ka asnjë arsye që ta refuzojë emrin tim për presidente të shtatë të Republikës së Kosovës. Kaq është përgjigja ime”, tha Osmani në konferencë për media.

Lidhja Demokratike të Kosovës numëron 17 për qind bazuar në rezultatet në fjalë.