Lajme

U mbajt mbledhja e rregullt e Rijasetit të BFI-së

Sot në hapësirat e Bashkësisë Fetare Islame në Shkup u mbajt mbledhja e rregullt e Rijasetit të BFI-së. Në këtë mbledhje Rijaseti debatoi në bazë të rendit të ditës, ku mes tjerash u diskutua për parapërgtitje për Haxhin 2025; për projektin e jetimëve; akreditimin e Medresesë dhe çështje tjera që janë në kompetencë të Rijasetit.

Mes tjerash, Reisul Ulema, informoi Rijasetin me aktivitetet në mes dy mbledhjeve, me theks të veçantë bashkëpunimin e BFI-së me botën islame, duke theksuar se tashmë BFI është faktor kryesor në rajon dhe me gjerë dhe kjo dëshmohet me ftesa për pjesëmarrje në shumë Konferenca ndërkombëtare dhe rajonale të organizuara nga Organizatat relevante të botës islame dhe me këtë është konsoliduar lidhja institucionale mes BFI-së dhe organizatave të ndryshme botërore të vendeve islame.

Rreth projektit të jetimëve, u kërkua nga Muftinitë të përshpejtojnë procedurat për regjistrimin e kandidatëve, sepse aplikimi në sistemin e Gjysmëhënës së Kuqe të Emirateve të Bashkuara Arabe tashmë ka filluar. Ndërsa nga ne kërkojnë aplikim sa më të shpejtë dhë të kompletuar me dokumentacionin e duhur.

Rreth akreditimit të Medresesë “Isa Beu”, drejtori i saj informoi se tashmë procedurat lidhur me akreditimin janë në fazën e fundit.

Implementimi i programit sipas akreditimit të Medresesë tashmë ka filluar. Nga ana jonë janë bërë të gjitha procedurat e kërkuara nga Ministria e arsimit për shkollat e mesme Medreseja Isa Beu.

Rijaseti unanimisht si përgjegjës të jetës fetare në diasporë emëroi Mr. Mafiz Rustemin një kuadër i dëshmuar në vend dhe diasporë.

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.