Lajme

Shqipëri, tubim në mbështetje të Palestinës

Në Shqipëri është mbajtur një tubim në mbështetje të Palestinës dhe popullit palestinez, duke u dënuar sulmet dhe masakrat e Izraelit ndaj palestinezëve, gjithashtu duke u kundërshtuar dhe dënuar edhe takimi në Tiranë i përfaqësuesve të Komunitetit Musliman të Shqipërisë (KMSH) me presidentin e Izraelit, Isaac Herzog, raporton Anadolu.

Tubimi është organizuar para selisë së KMSH-së në Tiranë, me thirrjen e disa organizatave të shoqërisë civile dhe me mbështetjen e dhjetëra qytetarëve.

Gjatë tubimi janë dënuar sulmet e Izraelit ndaj palestinezëve dhe është bërë thirrje për ndalimin e masakrave ndaj popullit palestinez dhe për lirinë e Palestinës.

Të pranishmit në tubim me flamuj të Shqipërisë dhe Palestinës mbanin në duar pankarta me mbishkrimet “Ndalo bombardimin në Gaza”, “Të ndalohet rrethimi i Gazës”, “Ndal krimet e luftës së Izraelit në Gaza”, dhe “Stop vrasjen e fëmijëve”, “Fethullah Gylen, pengmarrës i KMSH-së, “Jo në emrin tim”, “Demokraci për KMSH-në” dhe të tjera.

Një nga protestuesit, Ardian Çausholli, për Anadolu theksoi se arsyeja e ardhjes në protestë është mbështetja e kauzës palestineze dhe shtoi se do të vazhdojnë ta mbështesin këtë kauzë.

“Kauza palestineze është një kauzë që duhet mbështetur shumë fuqimisht për arsye se ajo çfarë po i ndodh sot Palestinës dhe sidomos Gazës, mund t’i ndodhë çdo kombi tjetër të vogël. Kjo kauzë na rrëqeth mishin, kur shohim fëmijë të vrarë dhe të plagosur”, tha ai.

Një tjetër protestuese, Denisa Spahillari, u shpreh për Anadolu se do të vazhdojnë ta mbështesin kauzën palestineze.

“Jemi këtu për të mbështetur kauzën palestineze. Jemi kundër gjenocidit. Në radhë të parë jemi humanë dhe si humanë ne duhet të mos mbështesim krimin, të mos mbështesim vrasjen e foshnjave, fëmijëve dhe grave”, tha ajo.

Në tubim është bëhet thirrje për ndalimin e luftës, ndalimin e masakrave nga Izraeli, gjenocidit dhe spastrimit etnik ndaj popullit palestinez në Gaza, si dhe për paqe dhe lirinë e popullit palestinez.

Protestuesit kanë kundërshtuar edhe takimet e presidentit izraelit, Herzog, në Shqipëri me zyrtarët shqiptarë dhe me përfaqësues të KMSH-së, takime që u realizuan gjatë vizitës së tij më 12 shtator.

Për mbarëvajtjen e tubimit u angazhuan dhjetëra forca policore pranë selisë së KMSH-së.

Kujtojmë se edhe më parë në Shqipëri janë organizuar disa tubime në mbështetje të Palestinës dhe popullit palestinez dhe për dënimin e sulmeve dhe masakrave të Izraelit ndaj palestinezëve.

Lajme

Naim Murseli dënohet me burgim të përjetshëm për vrasjen e Liridona Ademajt

Gjykata Themelore në Prishtini dënoi me burgim të përjetshëm Naim Murselin dhe Granit Plavën, ndërsa Kushtrim Kokallën me 30 vjet burgim, për vrasjen e Liridona Ademajt më 29 nëntor të vitit 2023.

Në fjalët përfundimtare në gjyqin ndaj tyre, Prokuroria kishte kërkuar burgim të përjetshëm për ta, duke pretenduar se vrasja e 30-vjeçares, bashkëshorte e Murselit, ishte kryer në mënyrë të planifikuar.

Duke kundërshtuar akuzat e Prokurorisë, avokatët e të akuzuarve thanë se nuk ka prova të drejtpërdrejta se Murseli, Plava dhe Kokalla kanë kryer veprat penale.

Vëllai i Ademajt ka kërkuar burgim të përjetshëm për Murselin, Kokallën dhe Plavën, duke thënë se vrasja ishte e organizuar nga të akuzuarit dhe e ka lënë familjen në dhimbje të madhe.

Çfarë thanë para gjyqit Naim Murseli dhe të tjerët?

Në të dy deklarimet për akuzat që e ngarkojnë, Murseli ka mohuar fajësinë për vrasjen e Ademajt, duke thënë se nuk ka paguar, porositur apo ndihmuar në vrasjen e bashkëshortes së tij.

Ai pretendon se natën kritike familja ishte përballur me një grabitje, dhe se ai nuk ka qenë në veturë në momentin e vrasjes, duke e quajtur çdo akuzë ndaj tij si të pavërtetë.

Lajme

VLEN: Pesë ministra shqiptarë në Drejtësi, por BDI e la shqipen jashtë provimit të jurisprudencës

Koalicioni VLEN ka reaguar duke akuzuar ish-ministrat shqiptarë të Drejtësisë dhe Bashkimin Demokratik për Integrim (BDI) se për vite me radhë nuk kanë mundësuar që provimi i jurisprudencës të jepet në gjuhën shqipe.

Sipas reagimit, pavarësisht disa mandateve të ministrave shqiptarë në këtë institucion, kjo çështje nuk është zgjidhur.
“Për vite me radhë, Ministria e Drejtësisë kaloi nga një emër shqiptar te tjetri, por asgjë nuk ndryshoi. Blerim Bexheti, Adnan Jashari, Valdet Xhaferi, Bilen Saliu dhe Krenar Lloga, ky i fundit përfundoi në prehrin e Ali Ahmetit. Pesë ministra. Pesë mandate. Pesë mundësi për ta ndrequr një padrejtësi. Dhe prapë, studentët shqiptarë mbetën jashtë mundësisë për ta dhënë provimin e jurisprudencës në gjuhën shqipe. Dokumenti i nënshkruar nga Talat Xhaferi e vulos të vërtetën për përjashtimin e shqipes nga provimi i jurisprudencës. Edhe më rëndë, ky ligj kaloi me badenter, pra edhe me votat e deputetëve shqiptarë të asaj kohe. E gjithë kjo e zhvesh deri në palcë BDI-në dhe mashtrimin e saj. Në opinion bëjnë patriotin, në institucione votonin dhe firmosnin kundër shqiptarëve”, thonë nga VLEN.

Lajme

S’ka marrëveshje për presidentin, Abdixhiku: Provova, nuk arrita fatkeqësisht

Ka përfunduar pa një marrëveshje për presidentin edhe takimi i radhës i kryetarit të LVV-së, Albin Kurti dhe të LDK-së, Lumir Abdixhiku.

Kreu i LDK-së pas takimi tha për media se pavarësisht përpjekje të tij nuk u arrit ndonjë marrëveshje dhe se tani do t’i kthehet përpjekjeve për bashkimin e se djathtës.

“Presidenti i Kosovës s’duhet të jetë zgjatim i Qeverisë, s’mund të ketë një qeveri që ka president të një partie.

U përpoqa, provova nuk arrita fatkeqësisht dhe tani do t’i kthehem LDK-së dhe qëllimit për bashkimin e të djathtës”, tha Abdixhiku.

Ai ka thënë se Kurti ka insistuar që posti i presidentit t’i takoj paristë në pushtet, të cilën ai tha se nuk e kanë pranuar.

“Insistonte që pozita e presidentit t’i mbetet Vetëvendosjes. Ne ishim në diskutim për çështjen e presidentit dhe unë refuzova të flas për çështje tjera pa folur për emrin e presidentit. Nuk kemi diskutuar për asnjë emër me LVV-në për presindeitn, përveç Glauk Konjufcës dhe për këtë e dini qëndrimin tonë”, ka thënë ai, duke shtuar se nuk do të ketë më takime me Kurtin për këtë çështje, raporton teve1.info.

Abdixhiku ka thënë se me 15 deputetë kjo parti nuk mund të bëjë më shumë, duke thënë se janë të hapur për diskutime me partitë tjera.