Lajme

Paga mesatare në Maqedoni të Veriut është më e ulëta në rajon

Në vitet e fundit, pagat për herë të parë kanë pasur një tendencë më serioze të rritjes, por kjo është kryesisht rezultat i masave administrative – rritjes së pagës minimale dhe rritjeve në sektorin publik, si dhe daljes së fuqisë punëtore jashtë vendit.

Në mënyrë që pagat të rriten realisht, ekonomia duhet të rritet. Vitet e fundit, të ardhurat e punëtorëve janë rritur me një ritëm më të shpejtë se ekonomia. Kjo rezulton me një rënie të produktivitetit, është një logjikë e thjeshtë ekonomike – produktiviteti llogaritet sipas formulës së raportit ndërmjet Prodhimit të Brendshëm Bruto dhe numrit të të punësuarve.

Përveç produktivitetit të ulët, shkalla e papunësisë është ende një faktor kufizues për rritjen e pagave.

Megjithatë, kjo po ndryshon ngadalë. Deri kohët e fundit, punëdhënësit thjesht i kursenin punëtorët sepse mendonin se mund të zëvendësoheshin lehtësisht. Kjo është gjithnjë e më pak e zakonshme, kompanitë e kanë kuptuar se është e vështirë të gjesh dhe të mbash një punëtor të mirë, veçanërisht një të kualifikuar. Një rënie e mëtejshme e papunësisë do të rezultojë gjithashtu në një rritje të pagës mesatare.

Në dhjetë vitet e fundit, paga mesatare në Maqedoni është rritur për rreth 94%.

Paga mesatare në gusht 2014 ishte 21.217 denarë, ndërsa sipas njoftimit të fundit të Entit Shtetëror për Statistikat, paga mesatare në gusht 2024 është 41.097 denarë (668 euro).

Përkundër rritjes së vazhdueshme, Maqedonia mbetet e ankoruar pothuajse në fund të Evropës sipas lartësisë së pagës mesatare.

Punëtorët në Serbi fitojnë më mirë se ne, mesatarisht 836 euro në muaj, në Bosnje dhe Hercegovinë marrin 710 euro, në Mal të Zi 861, në Kroaci 1324 dhe në Slloveni 1495 euro në muaj.

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.