Lajme

Sarajevë, qindra qytetarë marshojnë në mbështetje për Palestinën

Në Sarajevë të Bosnjë e Hercegovinës (BeH) qindra qytetarë kanë marrë pjesë në një marsh protestues në mbështetje të popullit të Palestinës, raporton Anadolu.

Marshi protestues u organizua nga një grup joformal qytetarësh në koordinim me Ambasadën e Shtetit të Palestinës në BeH dhe komunitetit palestinez në BeH.
Një numër i madh qytetarësh u mblodhën në shatërvanin Sebilj, nga ku lëvizën përgjatë shëtitores kryesore në Sarajevë drejt sheshit Bosnjë e Hercegovina ku u organizua një tubim i shkurtër për të shprehur mbështetjen për popullin palestinez.
Qytetarët thërrisnin slogane pro-palestineze dhe shumë prej tyre mbanin flamuj të BeH-së, Palestinës, si dhe të Libanit i cili gjithashtu po përballet me sulmet izraelite.

Qëllimi i marshit ishte ndërgjegjësimi për situatën jashtëzakonisht të vështirë në të cilën ndodhen banorët e Palestinës, veçanërisht në Rripin e Gazës ku që nga 8 tetori i vitit të kaluar nga sulmet izraelite janë vrarë të paktën 42 mijë palestinezë.

Safija Tadefi, një nga organizatorët e tubimit, tha se ky është marshi i shtatë që organizojnë në mbështetje të popullit palestinez.

“Mesazhi ynë kryesor është se ne jemi me popullin palestinez, se dënojmë gjenocidin që aktualisht po ndodh në Gaza, aparteidin dhe spastrimin etnik që po ndodh në të gjithë territorin e Palestinës. Ne dënojmë fuqishëm sulmin izraelit ndaj popullin palestinez, vrajen e civilëve. Më shumë se 40 mijë civilë janë vrarë, prej të cilëve 17 mijë fëmijë”, tha Tadefi.

Një nga organizatorët e tubimit të sotëm ëhstë Amer El Mordeha, i cili tha se janë mbledhur për t’i dërguar një mesazh mbarë botës dhe për të treguar se “gjenocidi nuk do të mbetet i pandëshkuar”.

“Ne kemi të dhëna për nëntë muaj se 17 mijë fëmijë janë vrarë në Gaza. Pas nëntë muajsh nuk kemi asnjë institucion që mund të kontrollojë sa saktësisht tani janë nën rrënoja. Ne po dërgojmë një mesazh nga Sarajeva se ky barbarizëm dhe gjenocid nuk do të mbetet pa u ndëshkuar. Çdo gjë ka kohën e vet, kështu që ashtu siç i mundëm nazistët në Luftën e Dytë Botërore, do t’i mposhtim edhe këta nazistët e epokës së re. E vërteta do të mbizotërojë”, tha El Mordeha.

El Mordeha ka lindur në Sarajevë dhe babai i tij palestinez iku nga Jaffa në Liban si fëmijë.

“Në thelb, ne palestinezët në të gjithë botën arabe jetojmë në ato kampe refugjatësh dhe pala tjetër nuk mund të jetë viktimë. Ne kemi qenë viktima për 75 vjet. Ajo nuk ka nisur më 7 tetor, 7 është vetëm një presje. Do të shohim se kur do të jetë pika”, tha El Mordeha.

Ftesë ndaj qytetarëve për të marrë pjesë në tubimin e sotëm paraprakisht dërgoi komuniteti palestinez në BeH.

“Le të jemi zëri i atyre, zërat e të cilëve përpiqen t’i heshtin. Bosnjë e Hercegovina zgjedh të jetë në anën e duhur të historisë, Bosnjë e Hercegovina zgjedh anën e drejtësisë”, tha komuniteti palestinez në BeH.

Lajme

Artan Grubit nesër i përfundon arresti shtëpiak

Ish zëvendëskryeministrit të parë Artan Grubi nesër i mbaron arresti shtëpiak. Vendimi ekzekutohet sipas fuqisë së ligjit pasi kalojnë 60 ditë nga dita e dorëzimit të propozim-akuzës. Megjithatë, Grubi i cili gati 8 muaj ka qëndruar në arrest shtëpie kërkon që t’i kthehet edhe pasaporta. Për këtë ka ofruar prona si garanci në vlerë mbi 335 mijë euro. Nga Gjykata Penale e Shkupit theksojnë shkurt për Alsat se për këtë propozim ende nuk kanë vendosur pasi e presin mendimin nga Prokuroria, e cila pritet që ta japë gjatë kësaj jave.

Ndërkohë vazhdon gjykimi për Grubin lidhur me keqpërdorimet në “Lotarinë Shtetërore”, megjithatë për dallim nga herët e kaluara, Grubi do të paraqitet në Gjykatë pa shoqërim policor.

Grubi gjykohet për “keqpërdorimin e detyrës zyrtare” pasi ka udhëhequr mbledhjen e Qeverisë ku është miratuar pika e rendit të ditës për nisjen e organizimit të pavarur të lojërave elektronike të fatit, ndonëse sipas Prokurorisë kjo nuk ka qenë e ligjshme. Sipas tyre, këtë e ka bërë në bashkëpunim me të akuzuarin e parë, ish drejtorin Përparim Bajrami.

Me këtë, Prokuroria pretendon se Grubi ka hapur rrugën që Lotaria Shtetërore t’i blejë VLT aparatet në vlerë mbi 9,7 milionë euro edhe pse të njëjtat nuk kanë qenë të nevojshme.

Pretendimet e këtilla Grubi i ka hedhur poshtë nën arsyetimin se për vendimin në mbledhje të Qeverisë kanë votuar 20 anëtarë, të gjithë “për”. Nga ana tjetër, teza e mbrojtjes së Grubit, por edhe të akuzuarve të tjerë është se ata kanë mbrojtur interesin shtetëror, me qëllim që përfitimi të shkojë direkt te Lotaria Shtetërore dhe jo të ndahet me partnerë të tjerë.

Lënda u hap në dhjetor të vitit 2024, rreth një javë pasi Shtetet e Bashkuara të Amerikës e futën në Listë të Zezë për korrupsion së bashku me ish gjyqtarin e Apelit Enver Bexheti. SHBA-ja i akuzoi për përfshirje në korrupsion të rëndësishëm, duke pretenduar se kishin pranuar ryshfet për të penguar proceset gjyqësore të lidhura me dënimin e ish shefit të Policisë Sekrete Sasho Mijallkov.

Megjithatë, Artan Grubi u largua nga Maqedonia më 15 dhjetor, duke kaluar pikën kufitare të Bllacës drejt Kosovës. Pas alarmit për arratisje, Grubi njoftoi në Facebook se ka udhëtuar për vizitë private dhe sapo t’i kryejë obligimet do të kthehet në shtëpi.

Megjithatë, obligimet e Grubit zgjatën mbi 14 muaj, për çka shteti shpalli fletëarrest të brendshëm ndërkombëtar. Në mëngjesin e 23 shkurtit, Grubi në Maqedoni hyri nga kishte dalë. Nëpër media dolën filmimet në të cilat shihej Grubi me pranga, pasi ishte vetëdorëzuar. Prej Pikës Kufitare Bllacë, Grubi dërgohet në Burgun e Shutkës, megjithatë vetëm pas disa orësh ai dërgohet në shtëpi pasi organet e sigurisë kishin alarmuar se rrezikohet jeta e Grubit në paraburgim. Për vendimin e këtillë pati reagime të ashpra në opinion.

Lajme

Astrit Iseni pas suspendimit të gjashtë policëve: Askush nuk është mbi ligjin

Gjashtë policë janë suspenduar pas dhunës brutale të ushtruar ndaj dy të rinjëve nga Saraji, Institucionet reaguan në kohë rekord, rasti nuk u la pa përgjigje, kështu deklaroi zëvendësministri i Punëve të Brendshme, Astrit Iseni, nga VLEN, I cili theksoi se MPB-ja ka kryer pjesën e saj të punës, ndërsa procedurat e mëtejshme i udhëheq Prokuroria. Sipas tij dhuna policore nuk ka vend në vendin tone dhe se uniforma është për ta mbrojtur qytetarin, jo për ta rrahur.

Iseni tha se sapo dolën pamjet, opozita shqiptare ka tentuar ta kthente dhunën ndaj dy të rinjve në betejë politike. Ku sic tha Iseni filluan akuzat, propaganda dhe përpjekjet për t’i dhënë ngjyrim etnik këtij rasti.

ASTRIT ISENI-ZËVENDËSMINISTËR I PUNËVE TË BRENDSHME

“Nuk harrohet “Sopoti”, ku i latë njerëzit të kalben burgjeve. Nuk harrohet djegia e dyqaneve shqiptare, ndërsa ju vazhdonit të rrinit si dekor në pushtet. Nuk harrohet “Monstra”, as fyerja ndaj shqiptarëve me termin “indijanci”. Nuk harrohet vdekja e Rexhail Qerimit në burg. Nuk harrohet vrasja e Harun Aliut. Nuk harrohet as vrasja e Xhemail Rexhepit (Komandant Shqiponjës). Për të gjitha këto raste, dhe shumë të tjera, çka bëtë JU? Asgjë. Heshtët!”.

Iseni theksoi se BDI për njëzet vjet ishin në pushtet, dhe se gjatë qeverisjes së tyre kanë ndodhur ngjarjet makabre, ku shumë prej rasteve janë lidhur me veprimet e policisë dhe të institucioneve të drejtësisë. Ai gjithashtu shtoi se sado që BDI mundohen t’i fshehin me gomë nga memoria kolektive e shqiptarëve, nuk do t’ia dalin sepse sic tha ai shqiptarët e mbajnë mend mirë. Ju jeni parti me shumë mëkate, fund e krye, deklaroi Iseni.

Lajme

40 kamera të reja në funksion, “Safe City” shtrihet në pesë komuna!

Sistemi i kamerave “Safe City” ka nisur funksionimin edhe në rajonin e Ohrit, me rreth 40 kamera të vendosura në disa komuna dhe akse të rëndësishme rrugore.

Kamerat do të mbulojnë Ohrin, Strugën, Kërçovën, Debërcën dhe Dibrën, si dhe rrugët drejt pikës kufitare Qafasan, Shën Naumit dhe autostradën Ohër–Kërçovë.

Sistemi do të regjistrojë shkeljet në trafik, përfshirë tejkalimin e shpejtësisë, parkimin e parregullt dhe kalimin në semafor të kuq.

Nga policia u bëjnë thirrje shoferëve të respektojnë rregullat dhe kufizimet e shpejtësisë, me qëllim rritjen e sigurisë dhe uljen e aksidenteve rrugore.