Lajme

Toshkovski: Maqedonia nuk meriton të jetë shtet nëse nuk kemi drejtësi për Koçanin

Maqedonia nuk meriton të jetë shtet nëse në fund të fundit nuk kemi drejtësi për Koçanin, thotë Ministri i Brendshëm, Pançe Toshkovski, për tragjedinë e madhe që i ndodhi vendit.

Ministri, megjithatë, shpreh keqardhje, siç thotë ai, për shkabat politike që po bëjnë një manipulim të rëndë të situatës faktike.

“Si po përpiqen ta shtrembërojnë situatën faktike dhe si po përpiqen ta manipulojnë opinionin në vend. U shërbeftë për të mirë atyre”, tha Ministri në podkastin “OBRM-PDUKM flet”.

Sipas tij, po zhvillohet një hetim jo-selektiv dhe i plotë, i cili përfshin ish-kryetarë komunash, ish-ministra dhe ministra aktualë, ish-inspektorë dhe aktualë, ish-shefa dhe aktualë, oficerë policie…

“Me mbylljen e dy hetimeve dhe ngritjen e aktakuzave, qytetarët e vendit do të jenë në gjendje të shohin se çfarë, pse dhe si është ndërmarrë nga Prokuroria Publike. Mendimi im personal është se Prokuroria Publike po e zhvillon mirë hetimin deri më tani. Besoj se familjet e të ndjerëve tragjikisht dhe çdo qytetar i vendit duhet të shohin drejtësi”, tha Toshkovski.

Lajme

DOKUMENTI: Ja sa paguhej Fatmir Sheholli nga Serbia

Prokuroria Speciale ka zbuluar një shumë të të hollave në vlerë të përgjithshme prej 681 mijë dinarësh, apo afër gjashtë mijë euro, të cilat Fatmir Sheholli i kishte pranuar nga autoritetet në Serbi.

Kjo shumë e përgjithshme e të hollave ishte pranuar nga Sheholli në vitin 2015, në llogarinë e tij në Komercialna Banka, ka zbuluar Prokuroria.

Pagesat i kishin ardhur nga dy institucione: agjencia shtetërore e lajmeve “Tanjug” në Serbi dhe e ashtuquajtura Zyrë për Kosovë në qeverinë serbe.

“Nga dëshmia A#21 rezulton se i pandehuri Fatmir Sheholli, gjatë vitit 2015, ka pranuar në mënyrë të rregullt pagesa mujore në llogarinë e tij në Komercialna Banka A.D. Beograd nga dy institucione shtetërore të Republikës së Serbisë, përkatësisht Agjencia Shtetërore e Lajmeve “Tanjug” në shumën totale prej 386.000 dinarësh dhe “Kancelarija za Kosovo I Metohija” në shumën prej 295.000 dinarësh, apo gjithsej 681.000 dinarë”, thuhet në dosjen e Prokurorisë ndaj të dyshuarit për spiunazh, Fatmir Sheholli.

Sipas Prokurorisë, pranimi i këtyre pagesave periodike “nga institucione shtetërore serbe që direkt janë të lidhura me BIA-në, përbën fakt notor që dëshmon financimin dhe angazhimin e tij në interes të një shteti të huaj, konkretisht nga Serbia dhe në ndërlidhje me provat e tjera të rastit vërtetohet edhe përtej dyshimit të bazuar mirë se i pandehuri ka ndërmarr veprimtari spiunazhi në dobi të BIA-së e në dëm të interesave të Republikës së Kosovës.”

Lajme

“Nuk do të ndalemi këtu” – Mexhiti paralajmëron vende të reja pune në shtator

Bashkëkryetari i VLEN-it, Izet Mexhiti, ka bërë të ditur se sot në Spitalin Klinik të Tetovës janë ndarë 109 vendime pune për kuadrin që prej kohësh ka qenë i angazhuar në këtë institucion.

Sipas Mexhitit, bashkë me 36 vendimet e ndara më herët, tashmë gjithsej 145 pjesëtarë të stafit kanë të rregulluar statusin e tyre të punës.

Mexhiti, së bashku me bashkëkryetarin e VLEN Bilall Kasami njëherit edhe kryetar i Komunës së Tetovës, dhe drejtorin e Spitalit Klinik të Tetovës, Erzen Elezin, ka takuar një pjesë të stafit që sot mori vendimet e punës.

Pjesa më e madhe e vendeve të punës u dedikohet profileve mjekësore, përfshirë mjekë, laborantë, biokimistë, infermierë dhe kuadro të tjera të nevojshme për funksionimin e spitalit. Në këtë proces janë përfshirë edhe 28 specializantë dhe 10 punëtorë teknikë.

Mexhiti ka paralajmëruar se procesi do të vazhdojë edhe gjatë muajit shtator, kur pritet të hapen vende të reja pune për specializantë, ndihmës-infermierë dhe administratë.

“Po punojmë që Spitali Klinik i Tetovës të ketë kuadrin që i nevojitet dhe qytetarët të marrin shërbimin shëndetësor që meritojnë”, ka deklaruar Mexhiti, duke e përmbyllur mesazhin me sloganin politik të VLEN-it: “Sepse ne e mbajmë fjalën.”

Lajme

Mickoski: Së shpejti do të ketë ndryshim të emrave të drejtorëve

Pas rikonstruimit të kabinetit të ministrave, kryeministri Hristijan Mickoski paralajmëron se së shpejti do të ketë ndryshim edhe në pozitat e drejtorëve, për të cilat është diskutuar në kuadër të bisedimeve me partnerët e koalicionit.

“Do të jenë në periudhën që vijon, do të dihen emrat në periudhën e ardhshme”, tha shkurt kryeministri Mickoski.

Mickoski në korrik të këtij viti tha se deri në fund të verës do të mbarojnë bisedimet për drejtorët, sidomos në nivel lokal ku edhe është skanuar puna e ndërmarrjeve publike.

“Më tej do të vazhdojmë edhe në strukturat tjera edhe në nivel lokal. Ne kemi edhe në nivel lokal numër të madh të drejtorëve të ndërmarrjeve publike. Kemi mendimin tonë për punën e një pjesë e atyre njerëzve. Kemi vende ku mundemi më mirë”.
“Ky proces i rikonstruimit, thellësisht dhe thelbësisht do të ndryshojë shumë gjëra deri në fund të verës”, deklaroi Mickoski më 20 qershor të këtij viti.

Njëkohësisht, deri në fund të shtatorit në VMRO-DPMNE vijon procesi i anëtarësimit dhe përditësimit të anëtarësisë në parti.

Ndryshimet bëhen në mes të mandatit, pasi kryeministri bëri një rikonstruim më të madh të eshalonit të parë. Partnerët e koalicionit VMRO-VLEN-ZNAM u ripozicionuan në resorë. VLEN-i mori drejtimin e Ministrisë së Drejtësisë, Kulturës dhe Marrëdhënieve Ndërmjet Komuniteteve, megjithatë humbi Shëndetësinë, Politikën Sociale dhe pozitën e zëvendëskryeministrit për Qeverisje të mirë. ZNAMI po udhëheqë me Ministrinë e Bujqësisë, ndërsa Ivan Stoillkoviqi nga partia serbe me Ministrinë e Vetëqeverisjes Lokale. /Alsat.mk