Lajme

Zbulohet kontrabandë me cigare dhe mallra të tjera në Aeroportin e Shkupit

“Paketa të padeklaruara me cigare janë gjetur te një shtetas i Maqedonisë që kishte me vete vetëm pasaportë bullgare,” thuhet në njoftimin e Drejtorisë Doganore.

Në Aeroportin Ndërkombëtar “Shkup”, gjatë kontrollit me rreze X të bagazhit të regjistruar të një pasagjeri që kishte për qëllim të udhëtonte për në Londër, janë zbuluar 18 steka cigare pa banderola akcize dhe 20 kuti duhan me nga 30 dhe 50 gramë, informon Drejtoria Doganore.

Cigaret e padeklaruara janë gjetur te një shtetas i Maqedonisë që posedonte vetëm pasaportë bullgare. Cigarët janë konfiskuar, ndërsa ndaj pasagjerit do të hapet procedurë kundërvajtëse.

Në dy raste të tjera, punonjësit doganorë kanë konfiskuar 56 steka dhe nëntë kuti cigare shtesë.

Njëri prej rasteve u zbulua në bashkëpunim me Ministrinë e Punëve të Brendshme, ku janë konfiskuar 44 steka dhe 9 kuti cigare pa banderola, të gjetura të fshehura në shkurre pranë vijës kufitare.

Në rastin e dytë janë konfiskuar 12 steka cigare, të zbuluara në një kamion mallrash të deklaruar për zhdoganim importi.

Gjithashtu, shërbimi i skanerëve mobilë, gjatë kontrollit të një kamioni të drejtuar nga një shtetas i Maqedonisë, ka konfiskuar 5,476 copë gjilpëra, bojëra dhe mjete të tjera për tatuazhe, për të cilat shoferi nuk posedonte dokumentacion të duhur.

Mallrat janë gjetur në katër paketa në kabinën e automjetit, në shtratin e sipërm, dhe shoferi ka deklaruar se nuk posedon dokumente importi për to.

Në degën doganore të Strumicës, është konfiskuar një motoçikletë e markës “Aprilia”, pasi pas paraqitjes së deklaratës së importit dhe dokumenteve shoqëruese, është vërejtur se bëhej fjalë për një motoçikletë tjetër për të cilën nuk ekzistonte asnjë dokumentacion importi.

Ndaj autorit është iniciuar procedurë kundërvajtëse.

Lajme

Superlajm për tifozët e Shkëndijës së Tetovës

Tifozët e KF Shkëndijës dhe dashamirësit e futbollit do të kenë mundësinë të ndjekin sërish nga afër paraqitjen e kuqezinjve në skenën evropiane.

Televizioni Publik TVM2 ka siguruar të drejtat e transmetimit direkt për ndeshjen e rëndësishme të raundit të tretë kualifikues të Ligës së Konferencës.

Ekipi nga Tetova do të përballet në udhëtim me skuadrën skoceze Hibernian, në një duel që premton emocione të mëdha dhe rivalitet të lartë për kalimin në fazën tjetër.

Lajme

Shtrenjtohet edhe më shumë nafta në Maqedoninë e Veriut

Komisioni Rregullor për Energjetikë (KRRE) ka marrë vendim të ri për çmimet e derivateve të naftës, të cilat do të pësojnë ulje dhe ngritje, duke filluar nga mesnata.

Sipas vendimit të fundit, çmimi i benzinave do të ulet për 2 denarë për litër. Nga ana tjetër, çmimi i derivateve të tjera shënon rritje: nafta do të shtrenjtohet për 1 denarë, ndërsa vaji ekstra i lehtë për 0,5 denarë për litër.

Çmimet e reja të derivateve të naftës:

EUROSUPER BS-95: 91,0 denarë/litër

EUROSUPER BS-98: 93,0 denarë/litër

EURODIESEL (Nafta): 99,5 denarë/litër

Vaji ekstra i lehtë (EL-1): 98,5 denarë/litër

Çmimet e reja do të hyjnë në fuqi pas mesnate dhe do të vlejnë në të gjitha pikat e karburanteve në vend.

Lajme

Rrahja brutale në Gostivar, policia identifikon katër veta

Ministria e Brendshme përmes një njoftimi informoi se ka identifikuar tre persona të cilët, sipas një videoje në rrjetet sociale, kanë sulmuar dhunshëm dy të rinj në Gostivar.

Policia shpjegon se personat e identifikuar janë dy të mitur nga Gostivari dhe një 20-vjeçar nga Shkupi.

„Dy të mitur nga Gostivari janë thirrur në stacionin policor për bisedë zyrtare, ndërsa dokumentet e tyre të udhëtimit janë konfiskuar me urdhër të prokurorit publik. Personi i tretë është V.D. (20) nga Shkupi, për të cilin është dërguar njoftim zyrtar në Stacionin Policor në Shkup për procedurë të mëtutjeshme“, njoftoi policia.
Ata theksojnë se ndaj të treve do të zbatohet një procedurë e përshpejtuar para gjykatës sapo të kompletohet dokumentacioni i plotë për rastin. Sipas autoriteteve, sulmi ka ndodhur në orët e para të mëngjesit të 2 gushtit në rrugën „Borçe Jovanoski“, ku dy të rinj janë goditur me mjete dhe shkopinj druri.

Në rrjetet sociale u shfaq një video-incizim shqetësues nga Gostivari, në të cilin shfaqet një përleshje e ashpër fizike mes një grupi më të madh të rinjsh.

Sipas informacioneve të publikuara, gjatë rrahjes, njëri nga djemtë është goditur në pjesën e kokës, pas së cilës ka rënë në tokë dhe ka mbetur i palëvizshëm.
Përkundër faktit se po shtrihej në rrugë, në incizim shihet se sulmi ka vazhduar me goditje të shumta ndaj trupit të tij, gjë që ka shkaktuar reagime dhe dënime të ashpra në rrjetet sociale.(INA)