Lajme

VLEN po “vlenizon” edhe hiset e kazinove, populli nuk mashtrohet më

Aleanca për Shqiptarët denoncon me shqetësim inskenimin e radhës nga eksponentët e koalicionit VLEN, të cilët përmes propagandës së rreme po tentojnë të maskojnë dështimet dhe hipokrizinë e tyre politike.
Deklarata e fundit e Izet Mexhiti për mbylljen e kazinove pranë shkollave është një manipulim i pastër. Realiteti në terren flet ndryshe: qytetarët shqiptarë, në çdo qytet e lagje, janë dëshmitarë të hapjes së vazhdueshme të kazinove dhe pikave të basteve në afërsi të shkollave dhe zonave të banuara.
Kjo tentativë për të mashtruar opinionin publik nuk është vetëm qesharake, por edhe fyese për inteligjencën dhe kujtesën e qytetarëve shqiptarë. Ironikisht, është po i njëjti Izet Mexhiti që, në vend se të luftojë realisht fenomenin e bixhozit, ka kthyer Lotarinë Shtetërore në një vegël klienteliste. Kujtojmë se Mexhiti e prezantoi zëvendësdrejtorin e Lotarisë Shtetërore, Ahmet Miftarin si kuadër të VMRO-së, ndërkohë që ai rezulton të jetë bashkëpunëtor i afërt i vetë Mexhitit dhe kuadër i Lëvizjes Demokratike. Po ashtu, emërimi i të afërmve të tij në Bordin e Lotarisë dëshmon për abuzimin flagrant me institucionet shtetërore për interesa familjare dhe politike.
Aleanca për Shqiptarët thekson se, ndërsa qytetarët përballen me varfëri, papunësi dhe përjashtim nga institucionet, eksponentët e VLEN-it janë të përqendruar në ndarjen e privilegjeve dhe mbushjen e bordeve me militantë e familjarë.
Prandaj, ASH:
• Kërkon një hetim të plotë dhe të pavarur për funksionimin e Lotarisë Shtetërore dhe të gjitha emërimeve të dyshimta në institucionet publike;
• Kundërshton me vendosmëri propagandën mashtruese që tenton të deformojë realitetin në terren;
• Rikujton se lufta kundër industrisë së bixhozit nuk bëhet me deklarata, por me ligje të qarta, kontroll të rreptë dhe vullnet politik të sinqertë.
Qytetarët shqiptarë nuk do të mashtrohen më nga “liderë” që përdorin fjalët për të fshehur interesat e ngushta personale. Ata e shohin dhe e kuptojnë realitetin më mirë se kushdo tjetër.
Aleanca për Shqiptarët e braktisi qeverinë pikërisht për shkak të mospërmbushjes së zotimeve të bëra para qytetarëve, përfshirë edhe premtimin për mbylljen e kazinove, siç ndodhi në Shqipëri dhe Kosovë.
Qëndrojmë në krah të qytetarëve dhe kërkojmë përgjegjësi për çdo mashtrim e dështim që rëndon mbi shpinën e tyre.

Lajme

Arenë “lufte” edhe sot në protestë, i vihet flaka institucionit financiar dhe Ministrisë së Arsimit

Sot mbahet dita e dytë e protestës studentore në Tiranë.
Studentët e shumë Universitetit të Mjekësisë, UBT-së, Politeknikut, fakultetit të Drejtësisë etj. janë grumbulluar para Ministrisë së Arsimit, ndërsa ka nisur hedhja e sendeve piroteknike drejt godinës, teksa para saj u pozicionua dhe policia.

Tensione ka pasur edhe në Fakultetin e Shkencave të Natyrës, ndërsa disa protestues kanë thyer derën kryesore dhe janë futur në ambientet e brendshme të fakultetit.
Gjimnazistët e shkollës “Partizani” i janë bashkuar studentëve dhe të rinjve në revoltë.
Gjithashtu, edhe në universitetet e Elbasanit dhe Shkodrës kanë nisur bojkotimi i mësimit, në shenjë solidariteti me studentët në Tiranë, ndërsa në Durrës, Vlorë dhe Gjirokastër çdo gjë vijon normalisht. /Topchannel

Lajme

Gani Geci do të qëndrojë 30 ditë në paraburgim

Gjykata Themelore në Prishtinë ka aprovuar kërkesën e Prokurorisë Themelore në Prishtinë, duke ia caktuar masën e paraburgimit në kohëzgjatje prej 30 ditësh ish-deputetit Gani Geci, i dyshuar për kanosjen e gazetarit Lirim Mehmetaj.

Geci po përballet me akuzën për kanosje ndaj gazetarit Lirim Mehmetaj.

Sipas Prokurorisë, ekziston dyshimi i bazuar mirë se më 11 tetor 2026, rreth orës 19:27, në zyrat e portalit “VOX Kosova” në Prishtinë, për shkak të një postimi të publikuar nga gazetari Lirim Mehmetaj në rrjetin social Facebook lidhur me deputetin Fatos Geci, me qëllim që ta detyrojë të dëmtuarin ta largojë ose ta ndryshojë përmbajtjen e postimit, pasi ky i fundit kishte refuzuar kërkesën e tij, thuhet se ka kanosur drejtpërdrejt me fjalët: “Nëse nuk e hek postimin ose nuk e ndryshon, kena me u vra“.

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.