Sport

Shkëndija – FCSB 1:0… kur flasim për pasurinë e pronarëve të klubeve!

Të martën (20:00) në Arenën “Todor Proeski” luhet ndeshja e parë mes Shkëndijës dhe FCSB-së në kuadër të raundit të dytë kualifikues për Ligën e Kampionëve. Ndeshja e kthimit zhvillohet më 30 korrik në Bukuresht.

Favoriti është i qartë. FCSB, një ish-kampione e Europës, e pamposhtur ndaj klubeve nga Maqedonia, mban statusin e skuadrës më të fortë. Por futbolli i ka rregullat e veta dhe Shkëndija në të kaluarën ka ditur të befasojë kundërshtarë me emër. Paraqitja bindëse ndaj TNS-it është dëshmi e kësaj.

Nëse kjo do të mjaftojë për ta kaluar pengesën rumune, mbetet të shihet. Por një epërsi tashmë është krijuar dhe ajo vjen jashtë fushës.

Shkëndija ka kaluar në epërsi 1:0 ndaj FCSB-së kur krahasojmë pasurinë e pronarëve të klubeve. Sipas të dhënave që qarkullojnë në internet (pa konfirmim zyrtar), pronari i Shkëndijës dhe kompanisë “Ecolog”, Lazim Destani, zotëron një pasuri që sillet rreth 5 miliardë euro.

Në anën tjetër, mediat rumune raportojnë se pasuria e Gigi Becali, pronarit të FCSB-së, është rreth 1.2 miliardë euro. Kështu që, përpara se të ndodhë çfarëdo në fushë, Shkëndija tashmë ka një avantazh simbolik.

Por të kthehemi te futbolli. Buxheti i FCSB-së është dukshëm më i madh, si edhe vlera e skuadrës. Ata janë favoritë me të drejtë.

Lazim Destani, megjithatë, nuk përzihet në vendimet e brendshme të ekipit. Ai ndjek ndeshje të rëndësishme në Tetovë ose Europë, por nuk ndërhyn në përzgjedhjen e skuadrës.

Ndryshe nga ai, Gigi Becali është shumë më aktiv, shpesh, sipas mediave rumune, ndërhyn në formacion dhe vendimet taktike, dhe pëlqen të ketë fjalën e fundit në gjithçka që lidhet me klubin e tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.

Sport

Indrit Çullhaj shpallet Kampion i Ballkanit, ngre sërish flamurin kuqezi në majën e podiumit

Xhudisti shqiptar Indrit Çullhaj ka shkruar një tjetër kapitull të artë në sportin shqiptar, duke u shpallur Kampion i Ballkanit pas një paraqitjeje mbresëlënëse në Kampionatin Ballkanik.

Çullhaj dominoi garën nga fillimi deri në fund, duke mposhtur radhazi kundërshtarët nga Kosova, Rumania dhe Greqia, ndërsa në finalen e madhe triumfoi ndaj përfaqësuesit të Malit të Zi, duke fituar me meritë medaljen e artë në kategorinë e tij.

Pas këtij suksesi të jashtëzakonshëm, kampioni shqiptar shprehu mirënjohjen për familjen e tij, Federatën Shqiptare të Xhudos, trajnerët dhe të gjithë ata që e kanë mbështetur gjatë rrugëtimit drejt këtij triumfi.

Kjo medalje e artë shënon një tjetër arritje historike për Çullhajn, i cili bëri që flamuri kuqezi të ngrihej për herë të katërt falë medaljeve të fituara prej tij në Kampionatet Ballkanike, duke konfirmuar edhe një herë se është një nga xhudistët më të suksesshëm që ka përfaqësuar Shqipërinë në arenën ndërkombëtare.

Triumfi i Indrit Çullhajt përfaqëson jo vetëm një sukses personal, por edhe një krenari të madhe për sportin shqiptar, duke dëshmuar se puna, përkushtimi dhe sakrifica shpërblehen me rezultate në skenën ndërkombëtare.

Sport

Shqiptari që mahniti Bayernin, Arijon shkëlqen me dy gola e tri asistime

19-vjeçari spikati në fitoren 15:0 ndaj Rottach-Egern, ndërsa Kosova vazhdon përpjekjet për ta bindur ta veshë fanellën dardane, transmeton albinfo.ch.

Talenti shqiptar Arijon Ibrahimoviç ka dhuruar një paraqitje mbresëlënëse në ndeshjen miqësore të Bayern Munich, duke qenë një nga lojtarët më të dalluar në fitoren e thellë 15:0 ndaj Rottach-Egern.

19-vjeçari realizoi dy gola dhe dhuroi tri asistime, duke konfirmuar potencialin e tij të madh dhe duke lënë përshtypje të shkëlqyera edhe te trajneri Vincent Kompany.

Paraqitja e tij ka forcuar bindjen se Ibrahimoviç është një nga talentët më premtues shqiptarë në futbollin evropian dhe se e ardhmja e tij mund të jetë në nivelet më të larta të futbollit.

Ndërkohë, Federata e Futbollit e Kosovës vazhdon kontaktet me lojtarin dhe familjen e tij, me synimin që ai në të ardhmen të zgjedhë ta përfaqësojë Kosovën në arenën ndërkombëtare.

Me formën që po tregon te Bayerni, Arijon Ibrahimoviç shihet si një futbollist me potencial për t’u shndërruar në një nga yjet e së ardhmes së futbollit evropian./Albinfo.ch