Lajme

VLEN: Nga “Pacienti” te milionat e tenderëve, dosja e errët e Bujar Osmanit!

BDI dhe Bujar Osmani janë në panik. E dinë se në Çair po vjen një humbje e pashmangshme dhe se qytetarët nuk do t’u besojnë më përrallave të tyre të rreme. Bujar Osmani është i vetëdijshëm se karrierizmi i tij politik bosh, pa projekte dhe pa rezultate, këtë herë do të marrë fund.

Bujar Osmani nuk është kandidat i Çairit, për Çairin. O20 vjet karrierë nuk ka realizuar asnjë projekt për komunën, as nuk ka ndihmuar ndonjë banor të Çairit. Ka qenë gjithmonë aty vetëm kur i duhej përfitim politik për veten e tij. Nuk ka bërë asgjë as për ndonjë komunë tjetër shqiptare.

Fakte që Çairi i di: Osmani ka qenë i dyshuar në rastin gjyqësor “Pacienti” dhe ka marrë amnisti për tenderë të paligjshëm. Kujt i detyrohet për atë amnisti, duhet të jap përgjigje. Ka disa raporte negative nga Enti Shtetëror i Revizionit për shpenzime të paligjshme në vlera milionëshe si ministër i Shëndetësisë. Si ministër i Punëve të Jashtme shpenzoi 120 milionë denarë për Samitin e OSBE-së pa asnjë dokument dhe mbulim ligjor. Së bashku me Artan Grubin përkrahu hyrjen e MTEL dhe kazinove serbe në Maqedoni të Veriut, duke hapur derën për kapital të dyshimtë.

Bujar Osmani është mik dhe bashkëpunëtor i hershëm i Artan Grubit, Nikolla Gruevskit dhe Sasho Mijallkovit, njerëz që janë në listën e zezë të partnerëve tanë strategjikë dhe që kanë qenë pjesë e të njëjtit rrjet që shkatërronte shtetin.

Çairi nuk meriton një kandidat që për njëzet vjet jeton nga funksionet politike e jo nga puna për qytetarët. Më 19 tetor, Çairi do të zgjedhë një njeri që është këtu, i njeh problemet, i zgjidh dhe qëndron pranë qytetarëve, e jo një politikan që vjen vetëm për të plotësuar biografinë e tij.

Bujar Osmani le të përgjigjet pse gjatë gjithë jetës së tij sa ka qenë ministër në të gjitha qeveritë, nuk ka siguruar para dhe projekte për komunat shqiptare, pse nuk ka ndihmuar as për një rrugë, bulevard, çerdhe apo shkollë në Çair, pse nuk është ndërtuar asgjë në pjesën perëndimore të shtetit. I rekomandojmë që të vazhdojë me fjalët boshe politike, pa përmbajtje dhe pa përgjegjësi. Kështu do të zbulohet plotësisht karrierizmi i tij.

Lajme

Vjedhje prej 5 milionë eurosh në një nënstacion hekurudhor në Shkup

Në nënstacionin për tërheqje elektrike në Draçevë, mes stacioneve hekurudhore Lisiçe dhe Draçevë, është kryer një vjedhje e përmasave të mëdha, gjatë së cilës është shkatërruar një pjesë e konsiderueshme e pajisjeve elektroenergjetike, njoftoi Ndërmarrja për Infrastrukturë Hekurudhore.

Sipas informacioneve, hajdutët kanë rrëzuar me forcë dy transformatorë me peshë mbi 30 tonë, kanë derdhur vajin e transformatorëve dhe kanë vjedhur mbështjelljet e bakrit, si dhe tela bakri, shina dhe pajisje të tjera të domosdoshme për funksionimin e nënstacionit, i cili tani është plotësisht jashtë funksionit.

Nga ndërmarrja vlerësojnë se bëhet fjalë për një sulm serioz ndaj infrastrukturës kritike hekurudhore, me një dëm material të vlerësuar fillimisht rreth 5 milionë euro. Ata kërkojnë një hetim urgjent dhe përgjegjësi penale për autorët dhe për të gjithë ata që kanë qenë të përfshirë në vjedhje dhe në tjetërsimin e mëtejshëm të materialeve të vjedhura.

Lajme

Ministri i Shëndetësisë: Uji në Gostivar ende nuk është i sigurt

Ministri i Shëndetësisë, Sasho Klekovski, gjatë vizitës në Spiatalin Special për Sëmundjet e Mushkërive dhe Tuberkulozin në Leshkë të Tetovës bëri të ditur se situata me helmimin nga uji në Gostivar po përmirësohet dhe se kriza ka hyrë në një fazë qetësimi. Sipas të dhënave të fundit, numri i personave që kërkojnë ndihmë mjekësore është ulur ndjeshëm. Gjatë ditës janë regjistruar 80 raste të reja, që është rreth dy herë më pak krahasuar me ditët paraprake, ndërsa numri i përgjithshëm i të prekurve arrin rreth 4 mijë persona. Ministria e Shëndetësisë dhe institucionet kompetente tashmë kanë nisur një analizë të plotë epidemiologjike, me qëllim përcaktimin e saktë të zhvillimit të situatës dhe ndarjen e rasteve të shkaktuara nga epidemia prej rasteve të zakonshme të gastroenteritit. Megjithëse numri i pacientëve është në rënie, uji nga rrjeti i ujësjellësit të Gostivarit ende nuk lejohet të përdoret as për qëllime teknike, pasi analizat e fundit kanë treguar nivel të pamjaftueshëm të klorit.

SASHO KLEKOVSKI, MINISTËR I SHËNDETËSISË

“Siguria e ujit vlerësohet edhe përmes sasisë së klorit që përmban ai, por ende nuk është arritur niveli i kërkuar. Aktualisht po kryhen analiza të vazhdueshme në disa pika të ndryshme dhe, sapo klorinimi të arrijë nivelin e duhur, do të jepet leja për përdorimin e ujit teknik”.

Duke iu referuar informacioneve se edhe uji në Leshkë është i papërshtatshëm për konsum dhe nuk duhet të pihet, Klekovski tha se kjo situatë nuk është e re dhe nuk është mbajtur e fshehtë. Sipas tij, problemi në këtë zonë vazhdon prej më shumë se një dekade.

SASHO KLEKOVSKI ,MINISTËR I SHËNDETËSISË

“Gjatë kësaj jave pritet të kryhen dy testime për të vërtetuar se uji nga ujësjellësi nuk do të jetë më vetëm për përdorim teknik, por do të jetë i përshtatshëm edhe për pije, si për spitalin ashtu edhe për të gjithë banorët e zonës”.

Ndërkohë, ditët e fundit nga opozitarja LSDM kanë deklaruar se rasti i Gostivarit nuk është një rast i izoluar, por pasqyron dobësi sistemore dhe mungesë efikasiteti të institucioneve. Duke u thirrur në një raport të siguruar nga sinjalizues, kryetari i LSDM-së, Venko Filipçe, deklaroi se uji në Spitalin Special për Sëmundje të Mushkërive dhe Tuberkuloz në Leshkë ka qenë i ndotur. Ai kërkoi kontroll të jashtëzakonshëm urgjent dhe analiza të të gjitha sistemeve të furnizimit me ujë në vend. /SHENJA/

Lajme

2 turke arrestohen pasi i sulmuan policët në “Bit Pazar” të Shkupit

Më 24.07.2026 në orën 23:40, në zonën e Bit Pazarit, nëpunës policorë nga Stacioni Policor Bit Pazar i privuan nga liria B.D. (23) dhe E.D. (54), të dyja nga Turqia me qëndrim të rregulluar në Shkup, për shkak se kanë sulmuar fizikisht nëpunës policorë të cilët kanë kryer veprime zyrtare.

Të dy u ndaluan në stacion policor dhe pas dokumentimit të plotë të rastit kundër tyre do të ngrihet kallëzim përkatës.