Një tragjedi e rëndë ka tronditur Bogdancin, ku trupi i djegur i një vajze 17-vjeçare është gjetur brenda një automjeti të përfshirë nga flakët, ndërsa në afërsi është zbuluar edhe trupi i pajetë i të dashurit të saj 21-vjeçar.
Sipas informacioneve jozyrtare të televizionit Sitel, hetuesit dyshojnë se i riu mund ta ketë vrarë të miturën dhe më pas t’i ketë dhënë fund jetës duke u varur. Megjithatë, rrethanat dhe shkaqet e vdekjes ende nuk janë konfirmuar zyrtarisht.

Rastin e bën edhe më shqetësues fakti se 17-vjeçarja dyshohet se kishte qenë viktimë e dhunës së vazhdueshme nga partneri i saj. Më 1 tetor, policia kishte arrestuar 21-vjeçarin pasi ai dyshohej se e kishte sulmuar fizikisht vajzën në shtëpinë e tij. Ende nuk dihet se çfarë masash ishin ndërmarrë më pas nga institucionet kompetente.

Tragjedia u zbulua rreth orës 18:40, në lokalitetin „Içeva Çeshma“, pasi një banor kishte denoncuar një automjet të djegur dhe një trup të pajetë pranë tij.

Policia identifikoi të riun me inicialet V.G. (21), ndërsa pas shuarjes së zjarrit, brenda automjetit u gjet edhe një trup i karbonizuar.

Me urdhër të Prokurorisë së Gjevgjelisë, trupat janë dërguar për autopsi, ndërsa hetimet vazhdojnë për zbardhjen e plotë të ngjarjes.

Rasti ngre pikëpyetje serioze për trajtimin institucional të denoncimeve të mëparshme për dhunë ndaj të miturës, ndërkohë që përgjegjësitë eventuale mbeten për t’u sqaruar nga hetimet.

Sistemi “Safe City” do të zgjerohet edhe me kamera mobile të vendosura në automjetet e policisë, përfshirë edhe ato civile. Ministri i Punëve të Brendshme, Pançe Toshkovski, njoftoi se një numër i madh i automjeteve të Ministrisë së Punëve të Brendshme do të pajisen me pajisje që do të regjistrojnë automatikisht shkeljet e trafikut, kryesisht tejkalimin e shpejtësisë së lejuar.

Sipas Toshkovskit, qëllimi është të ndalet praktika e vozitësve që respektojnë rregullat vetëm në vendet ku dinë se ka kamera, ndërsa në pjesët e tjera të rrugëve vozitin me shpejtësi të papërshtatshme.

“Tani i kemi mësuar ku janë kamerat dhe dimë se ku ka kamerë vozitim ashtu si duhet, ndërsa ku nuk ka kamerë përsëri kemi një lloj tjetër të drejtimit të automjetit. Në të ardhmen, një numër i madh i automjeteve të policisë, përfshirë edhe ato civile, do të pajisen me pajisje me të cilat mund të konstatojmë disa shkelje”, njoftoi Toshkovski.

Ai sqaroi se shkeljet e regjistruara nga automjetet e policisë do të futën drejtpërdrejt në sistemin elektronik.

“Vozitësit nuk do të mund të hamendësojnë më se ku do të jenë automjetet e policisë, ndërsa ato do të mund të konstatojnë shkelje që do të futën drejtpërdrejt në sistemin digjital”, tha ministri.

Toshkovski për momentin nuk zbuloi sa automjete policore do të pajisen me pajisjet e reja, as kur do të fillojë aplikimi i tyre, por njoftoi se kontrolli mobil duhet të kontribuojë për disiplinë dhe siguri më të madhe në trafik dhe në rrugët ku nuk ka kamera fikse.

Ish-drejtori i Lotarisë Shtetërore, Përparim Bajrami sot doli nga paraburgimi në burgun e Shutkës, përcjell TV21. Bajrami, i akuzuari i parë në rastin “Lotaria”, u lirua pasi dorëzoi garancinë në patundshmëri në vlerë prej 1.140.781 eurosh. Avokati Elenko Millanov në një deklaratë për TV21 tha se Bajrami nuk ka pasuri të paluajtshme në emër të tij, respektivisht se pasuria e dorëzuar i takon babait të tij dhe një të afërmi të tij.

“Bëhet fjalë për pasuri të paluajtshme që i përkasin babait të tij dhe të një subjekti ligjor të një të njohuri ose të afërmi të tij. Sinqerisht, nuk e di. Gazetari: Pra, ai nuk ka asnjë pronë në emër të tij për t’u përdorur si garanci? Jo, nuk është për shkak se është shtëpia ku jeton, dhe për më tepër, është në emër të babait të tij, kështu që është ende pronë familjare”, tha Elenko Millanov, avokat i Bajramit.