Lajme

Alarm mjedisor: Lumi Vardar në Shkup – në gjendje të rëndë ndotjeje

Në kulmin e sezonit turistik, lumi Vardar që përshkon kryeqytetin është kthyer në një tablo alarmante ekologjike. Shtrati i lumit është i mbushur me mbeturina dhe objekte të hedhura, nga dritare e dyer të vjetra, rroba e mobilje, deri te qeset e mbeturinat tjera që notojnë përgjatë urave dhe brigjeve, shkruan PressOnline.al

Për vite të tëra, pamja është e njëjtë: ndotje masive dhe mungesë reagimi nga autoritetet komunale, as me gjoba për ndotësit, as me pastrime sistematike të shtratit të lumit.

Ndërkohë, qytetarë të ndërgjegjshëm po marrin situatën në dorë. Aktivisti Aleksandar Tortevski së bashku me disa miq ditëve të fundit kanë nxjerrë mbi 100 thasë me mbeturina nga Vardari në pjesën e qendrës së Shkupit. Ai apelon që secili të bashkohet në aksione të ngjashme për një Vardar më të pastër.

Por lumi nuk mbytet vetëm nga mbeturinat. Në të derdhet i gjithë rrjeti i kanalizimit të qytetit, pa asnjë proces filtrimi. Mijëra tonë ujëra të zeza hyjnë çdo ditë në lumin dikur simbol të Shkupit, duke krijuar një erë të padurueshme që shqetëson qytetarët. Ata kërkojnë urgjentisht pastrim të shtratit dhe ndërtimin e stacionit të filtrimit të ujërave të zeza.

Ministria e Mjedisit kishte premtuar se projekti prej 190 milionë eurosh për ndërtimin e stacionit do të niste në mars të këtij viti, por pesë muaj më vonë, punimet ende nuk kanë filluar dhe nuk ka informacion të qartë për ecurinë e projektit.

Sipas matjeve, ndotja e Vardarit sa më poshtë që zbret në rrjedhë, aq më e rëndë bëhet. Në pjesën e sipërme, në Pollog, lumi klasifikohet në kategorinë e dytë sipas standardeve të cilësisë së ujit, por në Shkup – ndotja është ekstreme dhe uji bën pjesë në kategorinë e pestë, pra më ndotura.

Lajme

Superlajm për tifozët e Shkëndijës së Tetovës

Tifozët e KF Shkëndijës dhe dashamirësit e futbollit do të kenë mundësinë të ndjekin sërish nga afër paraqitjen e kuqezinjve në skenën evropiane.

Televizioni Publik TVM2 ka siguruar të drejtat e transmetimit direkt për ndeshjen e rëndësishme të raundit të tretë kualifikues të Ligës së Konferencës.

Ekipi nga Tetova do të përballet në udhëtim me skuadrën skoceze Hibernian, në një duel që premton emocione të mëdha dhe rivalitet të lartë për kalimin në fazën tjetër.

Lajme

Shtrenjtohet edhe më shumë nafta në Maqedoninë e Veriut

Komisioni Rregullor për Energjetikë (KRRE) ka marrë vendim të ri për çmimet e derivateve të naftës, të cilat do të pësojnë ulje dhe ngritje, duke filluar nga mesnata.

Sipas vendimit të fundit, çmimi i benzinave do të ulet për 2 denarë për litër. Nga ana tjetër, çmimi i derivateve të tjera shënon rritje: nafta do të shtrenjtohet për 1 denarë, ndërsa vaji ekstra i lehtë për 0,5 denarë për litër.

Çmimet e reja të derivateve të naftës:

EUROSUPER BS-95: 91,0 denarë/litër

EUROSUPER BS-98: 93,0 denarë/litër

EURODIESEL (Nafta): 99,5 denarë/litër

Vaji ekstra i lehtë (EL-1): 98,5 denarë/litër

Çmimet e reja do të hyjnë në fuqi pas mesnate dhe do të vlejnë në të gjitha pikat e karburanteve në vend.

Lajme

Rrahja brutale në Gostivar, policia identifikon katër veta

Ministria e Brendshme përmes një njoftimi informoi se ka identifikuar tre persona të cilët, sipas një videoje në rrjetet sociale, kanë sulmuar dhunshëm dy të rinj në Gostivar.

Policia shpjegon se personat e identifikuar janë dy të mitur nga Gostivari dhe një 20-vjeçar nga Shkupi.

„Dy të mitur nga Gostivari janë thirrur në stacionin policor për bisedë zyrtare, ndërsa dokumentet e tyre të udhëtimit janë konfiskuar me urdhër të prokurorit publik. Personi i tretë është V.D. (20) nga Shkupi, për të cilin është dërguar njoftim zyrtar në Stacionin Policor në Shkup për procedurë të mëtutjeshme“, njoftoi policia.
Ata theksojnë se ndaj të treve do të zbatohet një procedurë e përshpejtuar para gjykatës sapo të kompletohet dokumentacioni i plotë për rastin. Sipas autoriteteve, sulmi ka ndodhur në orët e para të mëngjesit të 2 gushtit në rrugën „Borçe Jovanoski“, ku dy të rinj janë goditur me mjete dhe shkopinj druri.

Në rrjetet sociale u shfaq një video-incizim shqetësues nga Gostivari, në të cilin shfaqet një përleshje e ashpër fizike mes një grupi më të madh të rinjsh.

Sipas informacioneve të publikuara, gjatë rrahjes, njëri nga djemtë është goditur në pjesën e kokës, pas së cilës ka rënë në tokë dhe ka mbetur i palëvizshëm.
Përkundër faktit se po shtrihej në rrugë, në incizim shihet se sulmi ka vazhduar me goditje të shumta ndaj trupit të tij, gjë që ka shkaktuar reagime dhe dënime të ashpra në rrjetet sociale.(INA)