Lajme

Bujar Osmani: Skandaloze përjashtimi i diasporës nga vendimmarrja, ata e mbajnë ekonominë dhe familjet tona

„Diaspora jonë nuk është diasporë e ndarë. Ata janë këtu me ne – kanë shtëpi, anëtarë familjarë, paguajnë taksa, jetojnë gjysmën e vitit këtu. E tani, pasi u regjistruan dhe doli që numri i shqiptarëve është më i lartë se i të tjerëve, merret vendim për përjashtimin e diasporës“, tha Bujar Osmani, duke reaguar ndaj vendimit të KSHZ-së për uljen e numrit të këshilltarëve në komunat.

Sipas tij, ky vendim është pjesë e një strategjie më të gjerë për kthimin e sistemit të shumicës etnike dhe rrënimin e parimeve të Marrëveshjes së Ohrit.

„Kjo është skandaloze. Asnjëherë më parë rregullat zgjedhore nuk janë vendosur me mbivotim. Kjo është precedent. Ka pasur përpjekje që kjo të bëhet përmes Kodit Zgjedhor, që u ndalua me Badenterin, por tani po bëhet përmes KSHZ-së. Ky është fillimi i asaj për të cilën kemi paralajmëruar – kthimi në kohën e margjinalizimit dhe përjashtimit“, deklaroi Osmani.

Ai kujtoi se tashmë është hedhur edhe hapi i parë me uljen e përqindjes për shpërndarjen e mjeteve për komuna dhe shkolla nga 29% në 24.5%, me arsyetimin se diaspora nuk duhet të merret parasysh. Tani, sipas tij, po vjen edhe ulja e numrit të këshilltarëve pikërisht në komunat me shumicë shqiptare.

„Nuk është vetëm ulja problemi. Problemi është vendosja e praktikës së majorizimit dhe përjashtimit. Kjo është një goditje e drejtpërdrejtë ndaj bashkëjetesës, ndaj parimit të konsensusit dhe barazisë. Arsyeja pse u pranua Marrëveshja e Ohrit ishte pikërisht ideja që të mos ketë më mbivotim etnik“, tha Osmani.

Ai bëri thirrje që këto hapa të mos normalizohen, sepse çojnë prapa në një kohë që Maqedonia e Veriut e ka tejkaluar prej kohësh.

Lajme

Incident në Pallaticë: Qytetarët raportojnë kërcënime pas një debati mes bashkëfshatarëve

Një rast kërcënimi është raportuar më 12 janar 2026 në SPB Tetovë nga A.B. (64) nga fshati Pallaticë, komuna e Zhelinës. Sipas denoncimit, rreth orës 16:30, derisa ndodhej në objektin e tij hotelierik bashkë me djalin e tij V.S., ka ndodhur një debat paraprak me një bashkëfshatar, pas së cilit personi me iniciale G.N. dyshohet se i ka kërcënuar ata.

Ngjarja ka shkaktuar shqetësim te të përfshirët, ndërsa rasti është raportuar menjëherë në polici. Zyrtarët policorë kanë nisur procedurat hetimore dhe po ndërmarrin masa për zbardhjen e plotë të rrethanave të incidentit, si dhe për dokumentimin e provave përkatëse.

Nga SPB Tetovë njoftojnë se pas kompletimit të rastit do të veprohet në përputhje me dispozitat ligjore.

Lajme

Për një vit, mbi 11 mijë punëtorë nga Maqedonia kanë marrë leje pune në Kroaci

Kryetari i Lidhjes së Sindikatave të Maqedonisë, Slobodan Trendafillov në një postim në Facebook thotë se mbi 11 mijë punëtorë të kualifikuar nga Maqedonia kanë shkuar për të punuar në Kroaci, përcjell TV21. Trendafillov thotë se biznesi po përballet me mungesë të fuqisë punëtore.

“Në vitin 2025, 11.384 punëtorë nga Maqedonia kanë marrë leje pune për të punuar në Kroaci, dhe shumë të tjerë janë larguar drejt Malit të Zi, Sllovenisë, Gjermanisë etj, ndërsa punëdhënësit e Maqedonisë kanë zëvendësuar vetëm 8.500 prej tyre me punëtorë nga Bangladeshi, Nepali dhe India (për të cilët dyshohet se kanë qëndruar në Maqedoni). Punëdhënësit ankohen se nuk kanë punëtorë të kualifikuar, qeveria mendon se nuk duhet të rriten pagat, ndërsa punëtorët largohen nga Maqedonia”, thotë kreu i LSDM-së.

Lajme

LSDM: Mickoski e çon vendin drejt izolimit me fushatë anti-BE

Qeveria aktuale e Kryeministrit Mickoski, në vend të integrimit, po e çon vendin drejt izolimit, akuzojnë sot nga LSDM.

“Një bashkëpunëtor i ngushtë i Mickoskit dhe zv. kryeministrit në qeverinë e tij është Ivan Stoilkoviq, qëndrimet e hapura pro-ruse dhe lidhjet e drejtpërdrejta të të cilit me Moskën përbëjnë një kërcënim serioz për orientimin euroatlantik të vendit.

Vetëm pak ditë më parë, zëvendëskryeministri Ivan Stoilkovic mori pjesë në festimin e Ditës së Republikës Serbe së bashku me grupin “Ujqërit e Natës”, të njohur për mbështetjen e Putinit dhe përhapjen e narrativave anti-perëndimore.

Edhe më keq se kjo është se vetë kryeministri Mickoski, pavarësisht deklaratave publike për bashkëpunim strategjik me SHBA-në dhe integrimin në BE, me veprimet e tij dhe lidhjet e ngushta me Vuçiqin dhe SNS-në, po bën gjithçka të kundërtën, duke e çuar Maqedoninë drejt izolimit.

Reformat e BE-së shmangen qëllimisht, konfliktet me fqinjët krijohen qëllimisht, arsyet shpiken për të bllokuar negociatat. E gjitha është një skenar i sajuar, pjesë e një fushate anti-BE që qeveria të vazhdojë të plaçkitë vendin.

Sipas hulumtimit të fundit nga viti 2025, deri në 70% e qytetarëve të Maqedonisë së Veriut mbështesin anëtarësimin në BE, dhe 77% e shohin anëtarësimin në NATO si pozitiv”, thonë nga LSDM.