Lajme

Kandidati për kryetar komune nga CDU në Krefeld, Timo Kühn vizitoi kompaninë prestigjioze E-Bau dhe biznesmenin e suksesshëm Kosovar, Albert Hashimi

Në qytetin gjerman të Krefeldit, i cili numëron rreth 350.000 banorë, u zhvillua një takim domethënës mes kandidatit të CDU-së për kryetar komune, Timo Kühn, dhe biznesmenit të njohur kosovar, Albert Hashimi. Ky takim u zhvillua në ambientet moderne të kompanisë E-Bau, simbol i suksesit të diasporës shqiptare në Gjermani.

Timo Kühn, i cili ka fituar popullaritet falë angazhimit të tij për përfshirjen e komuniteteve të ndryshme në jetën politike dhe sociale të qytetit, theksoi rëndësinë e bashkëpunimit me sipërmarrësit emigrantë, duke vlerësuar lart kontributin e tyre në zhvillimin ekonomik dhe integrimin shoqëror. “Krefeldi është qytet i mundësive dhe i bashkëjetesës harmonike. Një shembull i shkëlqyer është z. Hashimi, i cili ka ndërtuar një perandori biznesi me profesionalizëm dhe përkushtim,” tha ai gjatë vizitës.

Albert Hashimi, i vendosur prej vitesh në Gjermani, është një nga përfaqësuesit më të suksesshëm të komunitetit shqiptar në këtë vend. Me prejardhje nga Kosova, ai ka ndërtuar një karrierë të ndritur si sipërmarrës në sektorin e ndërtimit, duke u bërë një model integrimi dhe suksesi. Ai e mirëpriti vizitën e Timo Kühn me entuziazëm, duke e cilësuar si një hap të rëndësishëm drejt forcimit të marrëdhënieve ndërmjet institucioneve lokale dhe komuniteteve të diasporës.

“Është nder për mua të mirëpres një kandidat si z. Kühn, i cili nuk flet vetëm për përfshirje dhe barazi, por i jeton këto vlera. Kjo vizitë tregon se ne si shqiptarë në mërgatë jemi jo vetëm pjesë e këtij shteti, por edhe kontribuues të rëndësishëm për të ardhmen e tij,” u shpreh z. Hashimi.

Takimi u zhvillua në një atmosferë shumë miqësore dhe pozitive, ku u diskutuan tema të rëndësishme si zhvillimi ekonomik, fuqizimi i biznesit lokal, integrimi i diasporës shqiptare në strukturat vendimmarrëse, dhe përmirësimi i kushteve për komunitetet emigrante në qytetin e Krefeldit.

Kandidati Timo Kühn theksoi se do të jetë gjithmonë një derë e hapur për të gjithë qytetarët, pa dallim prejardhjeje apo kulture. Ai premtoi se nëse fiton postin e kryetarit të komunës, do të punojë ngushtë me përfaqësues të komunitetit shqiptar dhe do të krijojë më shumë hapësira për pjesëmarrje aktive në jetën politike dhe ekonomike të qytetit.

Ky takim është një dëshmi e fuqishme e rolit që luajnë figurat e suksesshme të diasporës në ndërtimin e urave të bashkëpunimit dhe mirëkuptimit mes komuniteteve të ndryshme në Evropë. Ai është gjithashtu një mesazh i fortë se shqiptarët jashtë atdheut jo vetëm që janë të integruar, por janë edhe shtyllë e rëndësishme e zhvillimit në vendet ku jetojnë.

Lajme

Uji në Gostivar pastrohet nga ndotja

Më në fund uji në Gostivar është pastruar nga ndotja fekale dhe tash mund të përdoret si ujë teknik, por jo për pije dhe për përgatitje të ushqimit. Kjo u bë e ditur nga Komiteti Drejtues për menaxhim me kriza. Emilija Anevska nga “Ujësjellësi i Shkupit” tha se janë marrë gjashtë mostra nga konsumatorët në Gostivar dhe për tri ditë radhazi nuk janë evidentuar baktere koliforme. Megjithatë, monitorimi do të vazhdojë deri në konfirmimin se uji është i sigurt edhe për pije.

“Dua të them se uji mund të përdoret teknikisht, por gjithsesi qytetarët të mos e përdorin për pije dhe gatim. Në ditët në vazhdim do ta rrisim numrin e vendeve matëse në komunën e Gostivarit dhe do ta bëjmë kontrollin themelor në përputhje me rregulloren për ujë të pijshëm. Me monitorim të vazhdueshëm do të mund të vërtetojmë se uji në ditët në vazhdim do të mund të përdoret edhe për pije”, tha Emilija Anevska nga “Ujësjellësi i Shkupit”.

Ministri i Punëve të Brendshme, Pançe Toshkovski, u bëri apel drejtorëve të ndërmarrjeve publike dhe të gjithë personave që kanë lidhje direkte ose indirekte me cilësinë e ujit, që të veprojnë me përgjegjësi maksimale. Ai tha se shëndeti dhe siguria e qytetarëve duhet të jenë prioritet dhe se çdo përgjegjës duhet t’i zbatojë obligimet ligjore, veçanërisht në sigurimin e ujit të sigurt për pije.

“Dua t’u dërgoj një mesazh për të ardhmen të gjithë përgjegjësve në kuadër të komunave në territorin e Maqedonisë. Shpresoj që kjo të shërbejë si mësim dhe që, njëherë e përgjithmonë, në të ardhmen të veprojnë me profesionalizëm maksimal dhe në përputhje me kompetencat e tyre të përcaktuara me ligj sa i përket kontrollit të cilësisë së ujit. Sepse me shëndetin dhe sigurinë e qytetarëve nuk bëhet lojë. Çdo përgjegjësi duhet të merret me seriozitetin dhe profesionalizmin më të madh, veçanërisht përgjegjësia që lidhet me ujin, qoftë ujë teknik për përdorim apo ujë për pije”, tha , Pançe Toshkovski.

Edhe nga Komuna e Gostivarit njoftuan se uji nga rrjeti i ujësjellësit tashmë mund të përdoret për qëllime teknike.
Nga Komuna thanë se falë angazhimit të institucioneve lokale dhe qendrore, si dhe të gjitha palëve të përfshira në proces, po ndërmerren masat e nevojshme për sanimin e gjendjes.

Lajme

Nga 1 gushti shtrenjtohet ngrohja qendrore në Shkup, faturat rriten për rreth 140 denarë

Komisioni Rregullator për Energjetikë (KRRE) ka vendosur që çmimi i ngrohjes për konsumatorët e EMV-së të rritet mesatarisht me 5,96%, duke e rritur faturën mesatare mujore për rreth 140 denarë (nga 2.353 në 2.493 denarë), përcjell TV21. Për konsumatorët që furnizohen përmes ish-Ngrohtores “Shkup Veri”, tani kompania Energy Ecolink, çmimi do të rritet mesatarisht me 3,6 për qind, ndërsa për shfrytëzuesit e ESM Energjetika shtrenjtimi do të jetë rreth 5 për qind. Sipas KRRE-së, vendimi është marrë pas analizave ekonomike dhe teknike, ndërsa gjatë sezonit të kaluar sistemit të ngrohjes i janë bashkuar 1.521 konsumatorë të rinj.

Lajme

BDI: VLEN në panik, kur nuk i ke numrat, i porosit anketat

Bashkimi Demokratik për Integrim (BDI) ka reaguar ndaj anketës së publikuar nga koalicioni VLEN, duke e akuzuar atë se po përpiqet të krijojë një epërsi të rreme përmes, siç i quan, “anketave të fabrikuara”.

Sipas BDI-së, anketa nuk ofron transparencën e nevojshme, pasi, sipas reagimit, nuk dihet se kush e ka porositur dhe financuar, si është përzgjedhur mostra, kur është zhvilluar terreni dhe cilat kanë qenë pyetjet e plota të anketimit.

Në reagim thuhet gjithashtu se agjencia që ka realizuar anketën nuk ka pasur aktivitet serioz publik në matjen e opinionit gjatë dy viteve të fundit dhe se është riaktivizuar pikërisht në periudhën kur, sipas BDI-së, VLEN-it i nevojiten rezultate për të mbuluar rënien e mbështetjes politike.

BDI përmend edhe emrin e Vesna Kuzmanoviq, duke ngritur dyshime se, sipas saj, nuk bëhet fjalë për një matje të mirëfilltë të opinionit publik, por për një “operacion propagandistik” me qëllim krijimin e një perceptimi të favorshëm për VLEN-in.

Në fund të reagimit, BDI vlerëson se publikimi i anketave nuk mund të ndryshojë vullnetin e qytetarëve, duke e cilësuar materialin e publikuar si “propagandistik” dhe duke akuzuar VLEN-in për, sipas saj, servilizëm në Qeveri, degradim të përfaqësimit shqiptar dhe përpjekje për të fshehur dobësinë politike.