Lajme

Drita Beqiri: Bujar Osmani, kandidati për Çairin i cili turpërohet nga BDI-ja dhe nga e kaluara e tij politike

Në Çair, Bujar Osmani sillet sikur po kandidon nga një botë tjetër! Nuk përmend BDI-në, nuk e përdor emrin e partisë që e rriti dhe e mbajti nëpër funksione të ndryshme të pushtetit për mbi 20 vite. Përkundrazi, ai po tenton t’i shesë qytetarëve një imazh të rremë sikur është kandidat i “AKI-së” me qëllim për të maskuar dështimet dhe rrënimin moral të partisë së tij. Pyetja është e thjeshtë, pse po ikën nga përdorimi i emrit BDI, Bujar? Nga çka po fshihesh?

Shkruan, Drita Beqiri

E vërteta është e hidhur, Bujar Osmani nuk do të përmend BDI-në sepse çdo kapitull i karrierës së tij lidhet me premtime të parealizuara, projekte të dështuara dhe zhgënjim publik. Ai është fytyra klasike e “funksionarit të përjetshëm”, gjithmonë diku në krye, gjithmonë me fjalë të mëdha, por asnjëherë me vepra konkrete.

Si ministër i Shëndetësisë gjatë periudhës 2008 – 2011, Bujar Osmani premtoi spitale të reja në Shkup, Tetovë e Kumanovë. Asnjë spital nuk u ndërtua. Banorët e Çairit nuk harrojnë se gjatë çdo vizitë në Qendrën Klinike ishte tmerr dhe poshtërim, derisa Bujar Osmani shëtiste nga një studio televizive, në tjetrën.

Ndërkohë, si zëvendëskryeministër për euro integrime gjatë viteve 2017 – 2020 u dha shpresë shqiptarëve për ndërtimin e 12 kilometrave autostradë në drejtimin Shkup-Bllacë. Premtoi disa herë nisjen e punimeve por edhe sot e kësaj dite kjo rrugë ende është makth i përditshëm dhe një turp i pambyllur i mbi 20 vjetëve pushtet të BDI-së dhe Bujar Osmanit.

Bujar Osmani si ministër i Jashtëm e shiste veten si gardian i demokracisë perëndimore, duke shpallur “VETTINGUN” si kusht për çdo parti. Por ironia e zezë e historisë e goditi LIVE, në mes të fushatës, SHBA e futi në listën e zezë shefin e tij, Artan Grubin. Ky është standardi i BDI-së, ky është turpi që Bujar Osmani përpiqet ta fshehë.

Prandaj sot, në Çair, ai nuk guxon ta thotë me gojë BDI, sepse Bashkimi Demokratik për Integrim është sinonim i korrupsionit, i listave të zeza, i dështimeve dhe i zhgënjimeve që ka nënshkruar me dorën e vet. Bujar Osmani e ka të qartë se çdo banor i Çairit ia di CV-në, fjalë të mëdha, ZERO punë dhe kjo është NJOLLA që nuk shlyhet me fletushkat e tij që është duke i shpërndarë e as me fjalime boshe.

Bujar Osmani nuk është kandidati i Çairit, ai është kandidati i dështimeve të veta. Një politikan që mundohet të shpëtojë duke u fshehur nga emri i partisë së tij, është dëshmi e gjallë se nuk ka as moral, as vizion e as guxim dhe banorët e Çairit e dinë shumë mirë se kush ikë nga e kaluara e vet, nuk ka kurrë të ardhme.

Screenshot 198

Lajme

Incident në Pallaticë: Qytetarët raportojnë kërcënime pas një debati mes bashkëfshatarëve

Një rast kërcënimi është raportuar më 12 janar 2026 në SPB Tetovë nga A.B. (64) nga fshati Pallaticë, komuna e Zhelinës. Sipas denoncimit, rreth orës 16:30, derisa ndodhej në objektin e tij hotelierik bashkë me djalin e tij V.S., ka ndodhur një debat paraprak me një bashkëfshatar, pas së cilit personi me iniciale G.N. dyshohet se i ka kërcënuar ata.

Ngjarja ka shkaktuar shqetësim te të përfshirët, ndërsa rasti është raportuar menjëherë në polici. Zyrtarët policorë kanë nisur procedurat hetimore dhe po ndërmarrin masa për zbardhjen e plotë të rrethanave të incidentit, si dhe për dokumentimin e provave përkatëse.

Nga SPB Tetovë njoftojnë se pas kompletimit të rastit do të veprohet në përputhje me dispozitat ligjore.

Lajme

Për një vit, mbi 11 mijë punëtorë nga Maqedonia kanë marrë leje pune në Kroaci

Kryetari i Lidhjes së Sindikatave të Maqedonisë, Slobodan Trendafillov në një postim në Facebook thotë se mbi 11 mijë punëtorë të kualifikuar nga Maqedonia kanë shkuar për të punuar në Kroaci, përcjell TV21. Trendafillov thotë se biznesi po përballet me mungesë të fuqisë punëtore.

“Në vitin 2025, 11.384 punëtorë nga Maqedonia kanë marrë leje pune për të punuar në Kroaci, dhe shumë të tjerë janë larguar drejt Malit të Zi, Sllovenisë, Gjermanisë etj, ndërsa punëdhënësit e Maqedonisë kanë zëvendësuar vetëm 8.500 prej tyre me punëtorë nga Bangladeshi, Nepali dhe India (për të cilët dyshohet se kanë qëndruar në Maqedoni). Punëdhënësit ankohen se nuk kanë punëtorë të kualifikuar, qeveria mendon se nuk duhet të rriten pagat, ndërsa punëtorët largohen nga Maqedonia”, thotë kreu i LSDM-së.

Lajme

LSDM: Mickoski e çon vendin drejt izolimit me fushatë anti-BE

Qeveria aktuale e Kryeministrit Mickoski, në vend të integrimit, po e çon vendin drejt izolimit, akuzojnë sot nga LSDM.

“Një bashkëpunëtor i ngushtë i Mickoskit dhe zv. kryeministrit në qeverinë e tij është Ivan Stoilkoviq, qëndrimet e hapura pro-ruse dhe lidhjet e drejtpërdrejta të të cilit me Moskën përbëjnë një kërcënim serioz për orientimin euroatlantik të vendit.

Vetëm pak ditë më parë, zëvendëskryeministri Ivan Stoilkovic mori pjesë në festimin e Ditës së Republikës Serbe së bashku me grupin “Ujqërit e Natës”, të njohur për mbështetjen e Putinit dhe përhapjen e narrativave anti-perëndimore.

Edhe më keq se kjo është se vetë kryeministri Mickoski, pavarësisht deklaratave publike për bashkëpunim strategjik me SHBA-në dhe integrimin në BE, me veprimet e tij dhe lidhjet e ngushta me Vuçiqin dhe SNS-në, po bën gjithçka të kundërtën, duke e çuar Maqedoninë drejt izolimit.

Reformat e BE-së shmangen qëllimisht, konfliktet me fqinjët krijohen qëllimisht, arsyet shpiken për të bllokuar negociatat. E gjitha është një skenar i sajuar, pjesë e një fushate anti-BE që qeveria të vazhdojë të plaçkitë vendin.

Sipas hulumtimit të fundit nga viti 2025, deri në 70% e qytetarëve të Maqedonisë së Veriut mbështesin anëtarësimin në BE, dhe 77% e shohin anëtarësimin në NATO si pozitiv”, thonë nga LSDM.