Lajme

Maksim Dimitrievski me energji pozitive hap shtabet zgjedhore në Llopatë, Reçanovcë dhe Ljubodrag: Kumanova bashkohet rreth konceptit qytetar

Fushata zgjedhore e kryetarit aktual të Komunës së Kumanovës dhe kandidatit të lëvizjes ZNAM, Maksim Dimitrievski, po vazhdon me intensitet të lartë dhe me përkrahje gjithnjë në rritje nga qytetarët.

Mbrëmjen e djeshme, Dimitrievski hapi zyrtarisht shtabin zgjedhor në fshatin Lopatë, ku u prit me entuziazëm dhe energji pozitive nga banorët. Ai theksoi se koncepti qytetar që përfaqëson bashkon të gjithë qytetarët, pa dallim, për një të ardhme më të drejtë, të zhvilluar dhe të sigurt për të gjithë.

“Energjia pozitive që po ndjejmë në çdo vendbanim tregon qartë se qytetarët janë të gatshëm për ndryshim të vërtetë. Po bashkohemi rreth një vizioni të përbashkët,” u shpreh Dimitrievski.

Pas Lopatës, Dimitrievski vazhdoi me hapjen e shtabeve edhe në fshatin Reçanoc dhe në fshatin Lubodrag, ku u mirëprit me mbështetje të ngrohtë dhe entuziazëm. Në çdo takim me qytetarët, ai theksoi se ZNAM nuk është një parti, por një lëvizje qytetare, që vjen nga vetë njerëzit dhe punon për interesin e tyre të drejtpërdrejtë.

“Mbështetja është e madhe dhe ndihet në çdo cep të Kumanovës. Ne nuk premtojmë me fjalë, por dëshmojmë me vepra,” shtoi ai.

Maksim Dimitrievski garon për një mandat të ri si kryetar i Kumanovës, duke kërkuar vazhdimësinë e projekteve dhe reformave që, siç thekson ai, kanë vendosur themele të forta për një Kumanovë moderne, gjithëpërfshirëse dhe të drejtë për të gjithë qytetarët.

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.