Lajme

AKI hap shtab në lagjet Treg dhe Beg të Gostivarit, Valbon Limani merr mbështetjen nga banorët

Me një pjesëmarrje të gjerë dhe atmosferë entuziaste, Lagjja e Tregut, vendbanimi dhe baza e kandidatit për kryetar komune Valbon Limani, i dha një mbështetje të fuqishme dhe të padiskutueshme Aleancës Kombëtare për Integrim (AKI), duke dëshmuar lidhjen e fortë të komunitetit me kandidatin e tyre.

Në këtë ngjarje madhështore, që shënoi hapjen zyrtare të shtabit zgjedhor të AKI-së në zemër të qytetit – pikërisht në Lagjen e Tregut – morën pjesë qindra qytetarë, aktivistë dhe përkrahës të “Besëlidhjes”, duke krijuar një atmosferë energjike dhe mobilizuese.

Të pranishëm ishin edhe figurat kyçe të partisë, përfshirë kryetarin aktual të Komunës së Gostivarit dhe kandidatin për një mandat të ri, z. Valbon Limani, bartësin e listës për Këshillin Komunal, z. Valdet Xhaferi, si dhe kandidatët e tjerë për këshilltarë komunalë nga koalicioni.

Në fjalimet e mbajtura gjatë ceremonisë, z. Limani falënderuan nga zemra banorët e lagjes së vetë për mikpritjen dhe përkrahjen e madhe, duke e cilësuar këtë përkrahje si një mesazh të qartë për vazhdimësinë e rrugës së nisur dhe për fitore të sigurt më 19 tetor.

“Lagjja ime më dha zemrën sonte, dhe kjo është përgjegjësi e madhe për të ecur përpara edhe më të vendosur,” u shpreh Limani, ndërsa shtoi se mbështetja nga kjo lagje ka domethënie të veçantë për të dhe për gjithë ekipin e AKI-së.

Pjesëmarrja masive dhe thirrjet për bashkim e mobilizim të strukturave dhe qytetarëve duket si një sinjal i fuqishëm që AKI është duke forcuar ndjeshëm pozitat në qytet dhe se fitorja në Gostivar po formësohet si një realitet politik i afërt e procesi zgjedhor do të mbyllet që në raundin e parë.

Nga AKI u theksua se fitorja në Gostivar nuk është vetëm një betejë lokale, por një hap drejt ndryshimeve të mëdha në nivel qendror, ku qytetet si Gostivari do të jenë shembulli i transformimit dhe integrimit të vërtetë politik.

Lajme

Elezi: VLEN po e kthen përfaqësimin e drejtë dhe adekuat në ligj

Përfaqësuesi i VLEN-it, Afan Elezi, ka deklaruar se përfaqësimi i drejtë dhe adekuat nuk është dhuratë politike, por parim kushtetues që buron nga Marrëveshja Kornizë e Ohrit dhe një nga shtyllat kryesore të karakterit multietnik të shtetit.

Sipas tij, për më shumë se dy dekada kjo çështje ka mbetur pa një zgjidhje ligjore të qëndrueshme, duke u trajtuar përmes mekanizmave të përkohshëm dhe interpretimeve të ndryshme, por pa një ligj të veçantë.

“Për gati 23 vite kjo çështje mbeti pa ligj të veçantë. Arsyet i dimë, kishim arnime, mekanizma të përkohshëm dhe interpretime të ndryshme, por asnjëherë ligj”, ka theksuar Elezi.

Ai ka vlerësuar se me ardhjen e VLEN-it në përfaqësimin e shqiptarëve janë hapur procese që, sipas tij, nuk janë iniciuar gjatë dy dekadave të kaluara.

“Për vetëm 24 muaj ne sollëm ligj dhe po e avancojmë Marrëveshjen e Ohrit. Ky është një hap historik dhe një përgjigje serioze ndaj boshllëkut institucional që u krijua pas shfuqizimit të balancuesit”, ka deklaruar Elezi.

Në fund, ai ka bërë thirrje që të gjitha subjektet politike të mbështesin këtë proces, duke theksuar se tashmë është koha për vendime konkrete dhe jo për retorikë politike.

“Ky është momenti kur secili duhet të tregojë nëse është në anën e historisë. Nuk ka më vend për patriotizëm të rrejshëm. VLEN nuk bën zhurmë për të drejtat e shqiptarëve, por i kthen ato në ligj. VLEN shqiptarët po i bën ligj”, ka përfunduar Elezi.

Lajme

Deputetja e VLEN Mimoza Musa merr pjesë në Konferencën e 5-të në Parlamentin Evropian në Bruksel

Deputetja e Kuvendit të Republikës së Maqedonisë së Veriut nga koalicioni VLEN, Mimoza Musa, mori pjesë më 23 dhe 24 qershor në Konferencën e 5-të me temë “Kapërcimi i hendekut ndërmjet pjesëmarrjes politike të të rinjve dhe politikave rinore”, e mbajtur në Parlamentin Evropian në Bruksel.

Në këtë aktivitet, së bashku me deputetë dhe përfaqësues të shoqërisë civile nga vendet e Ballkanit Perëndimor, u diskutuan tema të rëndësishme që lidhen me politikat rinore dhe përfshirjen e të rinjve në proceset vendimmarrëse.

Gjatë punimeve të konferencës, u trajtuan çështje si avancimi i politikave për të rinjtë, sfidat e shëndetit mendor te gjeneratat e reja, si dhe nevoja për rritjen e pjesëmarrjes së tyre në jetën publike dhe politike. Po ashtu, u theksua rëndësia e perspektivës evropiane për vendet e rajonit dhe forcimi i bashkëpunimit ndërmjet Ballkanit Perëndimor dhe Bashkimit Evropian.

Pjesëmarrësit shkëmbyen përvoja dhe ide mbi mënyrat se si mund të krijohen më shumë mundësi për të rinjtë, duke synuar politika më gjithëpërfshirëse dhe më afër nevojave të tyre.

Deputetja Musa vlerësoi rëndësinë e këtyre forumeve ndërkombëtare si hapësira ku ndërtohen ura bashkëpunimi dhe ku forcohet dialogu për të ardhmen e gjeneratave të reja në rajon.

https://www.facebook.com/share/p/1HGPU1rqzd/

Lajme

Ali Ahmeti priti në selinë e BDI-së të riun nga Gostivari, Naser Veliun

Kreu i Bashkimit Demokratik për Integrim (BDI), Ali Ahmeti, priti sot në selinë e partisë Naser Veliun nga Gostivari, nipin e bashkëveprimtarit të tij të hershëm, të ndjerit Naser Veliu.

Gjatë takimit, Veliu u prezantua si elektroinxhinier i diplomuar në universitete prestigjioze në Mbretërinë e Bashkuar. Takimi u vlerësua si një mundësi për bashkëbisedim me të rinj të arsimuar dhe me përgatitje profesionale, të cilët, sipas Ahmetit, përfaqësojnë një brez me potencial për të kontribuar në zhvillimin shoqëror dhe institucional.

Ahmeti theksoi rëndësinë e përfshirjes së të rinjve në procese shoqërore dhe profesionale, duke vlerësuar se kapitali njerëzor i arsimuar jashtë vendit është një vlerë e shtuar për komunitetin dhe vendin.

Në përfundim të takimit, ai i uroi Naser Veliut suksese të mëtejshme në rrugëtimin e tij profesional dhe personal.

Ja postimi plotë:

Sot kisha kënaqësinë ta pres në selinë e BDI-së Naser Veliun, të riun nga Gostivari, nipin e bashkëveprimtarit tim të hershëm, të ndjerit Naser Veliu.

Naseri është elektroinxhinier, i diplomuar në universitete prestigjioze në Angli. Takime me të rinj të arsimuar, të përgatitur profesionalisht dhe me vizion për të ardhmen janë gjithmonë të këndshme dhe japin shpresë se brezat e rinj do të vazhdojnë të kontribuojnë me dije, përkushtim dhe përgjegjësi për zhvillimin e shoqërisë sonë.

I uroj suksese të mëtejshme në rrugëtimin e tij profesional dhe personal.