Lajme

Ambasadori i Shqipërisë sërish në Nerovë: Nxënësit presin ende shkollën e re!

Në më pak se tre muaj, Ambasadori i Republikës së Shqipërisë në Maqedoninë e Veriut, z. Denion Meidani, për herë të dytë vizitoi fshatin Nerovë, duke treguar përkushtim të rrallë për vogëlushët e këtij komuniteti.

I shoqëruar nga deputeti i zonës Musa Xhaferi, drejtori i Institutit të Trashëgimisë Shpirtërore dhe Kulturore të Shqiptarëve, z. Besnik Emini, si dhe përfaqësues të shtëpisë botuese Logos, Ambasadori shpërndau çanta, abetare, libra dhe materiale didaktike për nxënësit nga klasa e parë deri në të pestën.

Mirëpo, pas gjithë këtij gjesti mbresëlënës, një e vërtetë e hidhur qëndron mbi kokat e fëmijëve të Nerovës: mësimi ende nuk ka filluar në shkollën e re, ndonëse ajo tashmë është ndërtuar dhe gati për t’u hapur.

Prindërit dhe mësuesit e fshatit theksuan se pavarësisht premtimeve të shumta, nxënësit vazhdojnë të mësojnë në kushte të vështira, ndërsa objekti i ri, që do t’u siguronte mjedis më dinjitoz dhe më bashkëkohor, ende pret të legalizohet e të hapë dyert.

“Fëmijët tanë meritojnë të mësojnë në kushte më të mira, jo të presin pafund për një të drejtë elementare – arsimin. Falënderojmë Ambasadorin Meidani për interesin dhe përkushtimin, por thirrja jonë shkon drejt institucioneve vendase: hapeni sa më shpejt shkollën e Nerovës!” – shprehen banorët.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.

Lajme

DAP me paralajmërim për qytetarët: Dërgohen mesazhe të rreme, mos hapni linqe

Drejtoria e të Ardhurave Publike paralajmëron për mesazhe të rreme SMS, përmes të cilave qytetarët njoftohen se rimbursimi i tatimit është gati.

Në mesazhe përfshihet një link, i cili mund të përdoret për keqpërdorimin e të dhënave personale dhe bankare.

Nga DAP-i apelojnë qytetarët të mos e hapin linkun dhe të mos vendosin të dhëna të ndjeshme.

Të gjitha informacionet duhet të kontrollohen ekskluzivisht përmes kanaleve zyrtare të DAP-it dhe ueb-faqes ujp.gov.mk.

Qytetarëve u bëhet thirrje të jenë të kujdesshëm dhe t’i paralajmërojnë edhe të afërmit e tyre për mashtrimin e mundshëm.

Lajme

Dera e ashensorit u hap dhe u mbyll papritur, lëndohet rëndë një vajzë 3-vjeçare nga Shkupi

Më 24.08.2026, në orën 20:00, në SPB Shkup, E.Z. (30) nga Shkupi ka denoncuar se më 22.08.2026 rreth orës 18:15, derisa ajo dhe fëmijët e saj ndodheshin në ashensorin e një ndërtese banimi në territorin e Radishanit, dera e ashensorit papritmas është hapur dhe mbyllur,.

Nga hapja e mbyllja e shpesh vajza trevjeçare është tërhequr dhe ka pësuar lëndime të rënda trupore, të konstatuara në Institucionin e Shëndetit Publik “Shën Naum Ohridski” në Shkup.

Po ndërmerren masa për zbardhjen e rastit./ZYRTARE.net