Lajme

Osmani: Energjia e re ndihet në Çair, qytetarët kërkojnë ndryshim

Kandidati për kryetar të komunës së Çairit, Bujar Osmani, vlerësoi se tubimet e fundit publike dhe pjesëmarrja masive pasqyrojnë energjinë e re që po mbizotëron në komunë dhe që paraqet një mesazh të qartë për nevojën e ndryshimeve. Siç theksoi ai, mesazhi që e ka dëgjuar gjatë takimeve derë më derë dhe në ngjarjet publike është se banorët kërkojnë dinjitet dhe një cilësi më të mirë të jetës.

“Po ndodh diçka e pazakontë. Një lloj mobilizimi që nuk është tipikisht partiak. Kanë ardhur njerëz që na kanë thënë, dhe atë në numër shumë të madh: vitin e kaluar kemi votuar për ata, por kemi gabuar. Tani duam ta mbështesim kauzën tuaj. Kanë ardhur edhe njerëz të papërcaktuar, të cilët më thanë: ne kurrë nuk kemi votuar, kurrë nuk kemi dalë në zgjedhje, kemi qenë apolitikë. Por kësaj here nuk duhet të heshtim. Kjo është një energji që vlon”, tha Osmani.

Ai theksoi se mobilizimi i qytetarëve, pa marrë parasysh përkatësinë e tyre etnike apo politike, është dëshmi e dëshirës për t’u kthyer dinjiteti dhe për t’u ndërtuar një kulturë e re politike në Çair.

“Që nga dita e parë kam thënë: nuk hyra në këtë garë për ta udhëhequr komunën, por për ta kanalizuar këtë energji të zemërimit, të revoltës që e dëgjoj nga çdo njeri që e kam takuar. Kam takuar mijëra njerëz gjatë këtyre tre muajve të fushatës. Dhe ata flasin për dinjitetin tonë kombëtar që na është marrë dhe poshtëruar, por flasin edhe për dinjitetin e jetës në Çair”, theksoi kandidati.

Osmani tha se “ndryshimi historik” tashmë ka filluar dhe se energjia e re që po demonstrojnë qytetarët do të jetë forca shtytëse për një Çair më të mirë.

Lajme

E dhimbshme, tifoz i Fenerbahçes ndërron jetë gjatë ndeshjes

Një tifoz i Fenerbahçes, Yaşar Gerçek, ka ndërruar jetë gjatë ndeshjes pas një sulmi në zemër.

Klubi e ka konfirmuar lajmin me dhimbje, duke shprehur ngushëllime për familjen, të afërmit dhe gjithë komunitetin e Fenerbahçes.

Në të njëjtën ndeshje, Fenerbahçe u mposht në shtëpi nga Beşiktaşi me rezultat 2-1.

Lajme

Skandal në Tetovë! I akuzuari pengoi mjekët teksa po shpëtonin të lënduarin

Tetovë – Incident gjatë një ndërhyrjeje të Ndihmës së Shpejtë në Tetovë. Një 40-vjeçar nga qyteti është shoqëruar në polici pasi dyshohet se ka penguar ekipin mjekësor teksa po i jepte ndihmë një këmbësori të lënduar në një aksident trafiku.

Ngjarja ka ndodhur më 5 shtator, rreth orës 19:10, në rrugën “Ilinden” në Tetovë.

Sipas denoncimit të bërë në SPB Tetovë nga një punonjës i Shërbimit të Ndihmës së Shpejtë, gjatë ofrimit të ndihmës mjekësore, R.U. (40) nga Tetova dyshohet se ka prishur rendin dhe qetësinë publike me bërtitje, ngritje zëri dhe sjellje të papërshtatshme ndaj ekipit mjekësor.

Policia e ka shoqëruar personin në stacion dhe ndaj tij është përgatitur parashtresa përkatëse.

Lajme

163 km/h në rrugë ku lejoheshin 80!

Rumuni “fluturon” nëpër Maqedoni, kapet në Tabanoc

Shpejtësi marramendëse në autostradën A1! Një shtetas rumun është ndaluar nga policia pasi është kapur duke drejtuar automjetin me 163 kilometra në orë, në një pjesë të rrugës ku shpejtësia maksimale e lejuar ishte vetëm 80 km/h.

Ngjarja ka ndodhur më 4 shtator 2026, rreth orës 06:30, në autostradën A1, pranë Demir Kapisë.

Sipas policisë, 49-vjeçari H.V.S. nga Rumania po drejtonte një automjet tip Audi, me targa rumune, kur sistemi i mbikëqyrjes “Qyteti i Sigurt” regjistroi shkeljen.

Ai u identifikua si person që dyshohet se ka kryer veprën penale “drejtim i pamatur i automjetit”, sipas nenit 297-a të Kodit Penal.

Rreth orës 11:20, kur automjeti po dilte nga vendi përmes pikës kufitare Tabanoc, policia e ndaloi dhe e arrestoi shtetasin rumun.

Ai u dërgua në Stacionin Policor të Negotinës për procedurë të mëtejshme, ndërsa ndaj tij pritet të ngrihet kallëzim penal përkatës.

Nga 80 në 163 km/h – më shumë se dyfishi i shpejtësisë së lejuar!